Unsang Dungog ang Imong Giugmad?

NAKABASA ka na bag lindog sa mga namatay diha sa inyong lokal nga mantalaan o nakakitag taas nga taho bahin sa kinabuhi ug mga nalampos sa usa ka tawo nga namatay na? Nangutana ka ba sa imong kaugalingon, ‘Unsay isulti sa mga tawo bahin kanako?’ Pila ka tawo ang naghunahuna gayod kon sa unsang paagi mahinumdoman sila human sa ilang kamatayon? Busa, tagda kining prangka nga mga pangutana: Unsay isulti sa mga tawo bahin kanimo karon kon ikaw namatay gahapon? Unsang matanga sa dungog ang imong giugmad? Sa unsang paagi gusto nimong mahinumdoman sa imong mga kaila ug sa Diyos?

Ang maalamong magsusulat sa basahong Ecclesiastes sa Bibliya miingon: “Ang usa ka ngalan mas maayo pa kay sa maayong lana, ug ang adlaw sa kamatayon kay sa adlaw nga natawhan.” (Ecclesiastes 7:1) Nganong ang adlaw sa pagkamatay sa usa ka tawo mas maayo kay sa adlaw sa iyang pagkatawo? Kay sa panahon sa pagkatawo ang usa wala pay naugmad nga dungog. Bug-os nga blangko pa ang iyang personal nga rekord. Ang iyang pagkinabuhi mahimong mosangpot sa maayo o sa daotang dungog. Alang niadtong nakaugmad ug maayong ngalan paglabay sa katuigan, ang adlaw sa kamatayon mas maayo gayod kon bahin niana kay sa adlaw sa pagkatawo.

Busa makapili kita. Sa pagkatinuod, kada adlaw kita adunay daghang kapilian nga maoy magtino sa atong dungog sa adlaw sa atong kamatayon, ilabina kon sa unsang paagi kita mahinumdoman sa Diyos. Busa, ang samang maalamon nga Hebreohanon misulat: “Ang handomanan sa matarong pagapanalanginan, apan ang ngalan sa mga daotan madunot.” (Proverbio 10:7) Ang pagkamahinumdoman sa Diyos aron panalanginan—pagkatalagsaong pribilehiyo!

Kon kita maalamon, ang atong tumong mao nga pahimut-an ang Diyos pinaagi sa pagkinabuhi nga nahiuyon sa iyang mga sukdanan. Nagpasabot kana sa pagsunod sa paninugdang mga prinsipyo nga gipahayag ni Kristo: “‘Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.’ Kini mao ang kinadak-an ug unang sugo. Ang ikaduha, nga susama niini, mao kini, ‘Higugmaon mo ang imong silingan sama sa imong kaugalingon.’ Niining duha ka sugo nagsukad ang tibuok Balaod, ug ang mga Manalagna.”—Mateo 22:37-40.

Ang pipila nahinumdoman ingong mga pilantropo, mga mahinabangon, mga manlalaban sa sibil nga mga katungod, o tungod sa ilang mga nalampos diha sa negosyo, siyensiya, medisina, o ubang mga kalihokan. Apan sa unsang paagi gusto nimong mahinumdoman?

Ang magbabalak nga taga-Scotland nga si Robert Burns (1759-96) nagpahayag sa pangandoy nga unta ang Diyos maghatag kanato sa gasa sa pagkakita sa atong kaugalingon sumala sa pagkakita sa uban kanato. Maisip mo ba ang imong kaugalingon sa dili madapigong paagi ug makaingon nga ikaw adunay maayong dungog uban sa ubang mga tawo ug uban sa Diyos? Sa  kadugayan, ang atong relasyon sa uban mas bililhon gayod kay sa tingali atong dili-malungtarong mga kalamposan diha sa natad sa mga dula o sa negosyo. Busa ang pangutana mao: Sa unsang paagi ang atong pagtagad sa uban—atong pakigkabildo, atong pamatasan, mga pangompas ug panglihoklihok—mag-apektar kanila? Sabton ba kita nila ingong daling maduolan o tigpalain? Ingong maluloton o bagison? Ingong daling-mopahiuyon o estrikto? Ingong mabination ug maluluy-on o dili-mahigalaon ug bugnawg tinagdan? Ingong makapaluya nga hinawayon o makapalig-on nga magtatambag? Susihon nato ang pipila ka pananglitan sa nangagi ug sa modernong panahon aron mahibaloan kon unsay atong makat-onan.

[Hulagway sa panid 3]

Si Robert Burns nangandoy nga unta ang Diyos maghatag kanato sa gasa sa pagkakita sa atong kaugalingon sumala sa pagkakita sa uban kanato

[Credit Line]

From the book A History of England