“Paghupot ug Maayong Tanlag”

KANUNAYNG madunggan ang tambag nga, “Tugoti ang imong tanlag nga maoy mogiya kanimo.” Apan aron ang atong tanlag mahimong kasaligang giya, kinahanglan kining maedukar pag-ayo sa kon unsay husto ug sayop, ug kinahanglang magmasensitibo kita sa pagtultol niini.

Tagda ang eksperyensiya sa usa ka tawo nga ginganlag Zaqueo, ingon sa narekord diha sa Bibliya. Si Zaqueo, kinsa nagpuyo sa Jerico, maoy usa ka pangulong maniningil ug buhis ug dato. Giangkon niya mismo nga nabatonan niya ang iyang bahandi pinaagi sa pagpangilkil—usa ka buhat nga seguradong nakapaalaot sa uban. Gitulisok ba si Zaqueo sa iyang tanlag tungod sa iyang dili-matarong nga mga binuhatan? Kon gitulisok man siya niini, dayag nga wala niya kini panumbalinga.—Lucas 19:1-7.

Apan, dihay situwasyon nga nagtukmod kang Zaqueo sa pag-usab sa iyang dalan. Si Jesus nahiabot sa Jerico. Si Zaqueo mubo ug gustong makakita kaniya, apan dili siya makakita kang Jesus tungod sa panon sa katawhan. Busa miuna siya pagdagan ug mikatkat sa kahoy aron makakitag maayo. Kay nakadayeg sa dakong kaikag ni Zaqueo, giingnan siya ni Jesus nga siya moadto sa iyang balay. Malipayong giabiabi ni Zaqueo ang iyang iladong bisita.

Ang nakita ug nadungog ni Zaqueo samtang nakig-uban kang Jesus nakapatandog sa iyang kasingkasing ug nagtukmod kaniya sa pagbag-o sa iyang mga dalan. Iyang gipahibalo: “Tan-awa! Ang katunga sa akong mga kabtangan, Ginoo, ipanghatag ko sa mga kabos, ug pasig-ulian ko ug upat ka pilo ang bisan unsa nga gipangilkil ko kang bisan kinsa pinaagig bakak nga sumbong.”—Lucas 19:8.

Natudloan ang tanlag ni Zaqueo, ug siya nagpatalinghog ug misanong niana. Ang maayong mga resulta maoy layo ug abot. Handurawa kon unsay gibati ni Zaqueo sa dihang giingnan siya ni Jesus: “Niining adlawa ang kaluwasan miabot niining balaya!”—Lucas 19:9.

Pagkamakapadasig nga panig-ingnan! Gipakita niini nga bisan unsa pang dalana ang atong gisubay kanhi, kita mahimong magbag-o. Sama kang Zaqueo, mahimo natong sundon ang giingon ni Jesus—nga narekord diha sa Bibliya—ug ugmaron ang atong katakos sa pag-ila sa husto ug sayop. Unya, sama sa giawhag ni apostol Pedro, kita ‘makahupot ug maayong tanlag.’ Makapatalinghog kita sa atong nabansay nga tanlag ug makabuhat sa kon unsay husto.—1 Pedro 3:16.