Si Jehova Nahigugma sa Ordinaryong mga Tawo

KINAHANGLAN bang kita mahimong talagsaong tawo sa usa ka paagi aron mamatikdan sa Diyos? Si Abraham Lincoln, ang ika-16 nga presidente sa Tinipong Bansa, gikutlo nga nag-ingon: “Gipalabi sa Ginoo ang ordinaryong mga tawo. Mao nga naghimo siyag daghan kanila.” Daghan ang mibati nga sila maoy ordinaryong mga tawo nga walay talagsaong mga hiyas. Ang pagkaordinaryo tingali magtumong sa pagkahimong “kabos, ubos.” Sa susama, ang pulong “ordinaryo” tingali magpaila sa “kawalay pribilehiyo o espesyal nga katungdanan,” “mas ubos pa sa ordinaryong mga sukdanan,” o kaha “segunda-klase.” Unsang matanga sa mga tawo ang gusto nimong ikauban? Hambogiro, pugoso, mapahitas-ong mga tawo? Dili ba mas gusto nimong ikauban ang mahigalaon, mapaubsanon, makasaranganong mga tawo nga magpakitag tim-os, mainitong interes sa uban?

Tungod kay ang pagpasakit sa pagbati ug pagbiaybiay komon sa kalibotan karon, ang uban malisdan sa pagtuo nga ang Diyos interesado gayod kanila. “Naggikan ako sa usa ka pamilya nga halos walay gugma sa usag usa. Gipakamenos, gisungog, ug giyagayagaan ako. Busa, sukad pa sa pagkabata ako mibati na nga walay kapuslanan,” misulat ang usa ka magbabasa niining magasina. “Ania gihapon kanako ang nakagamot nga mga pagbati sukad pa kaniadto, nga makapaluya kanako sa dihang ako makaagom ug kalisdanan.” Apan, adunay mga katarongan sa pagtuo nga ang Diyos interesado gayod sa ordinaryong mga tawo.

Ang Kaikag sa Diyos sa Ordinaryong mga Tawo

“Si Jehova dako ug takos gayod nga pagadayegon, ug ang iyang pagkadako dili matukib,” misulat si Haring David. (Salmo 145:3) Bisan pa niana, wala kini makapugong kang Jehova sa pag-atiman kanato sa mahigugmaon ug mabinationg paagi. (1 Pedro 5:7) Pananglitan, ang salmista miingon: “Si Jehova haduol niadtong mga dugmok ug kasingkasing; ug siya magaluwas niadtong mga nahugno sa espiritu.”—Salmo 34:18.

Ang mga butang nga makapadani sa mga tawo, sama sa kaanyag, dungog, o bahandi, wala isipa sa Diyos nga hinungdanon. Ang Balaod sa Diyos sa Israel nagpakita sa iyang mabinationg interes sa mga kabos, ilo, babayeng balo, ug mga langyaw. Gisultihan sa Diyos ang mga Israelinhon, kinsa gimaltrato usab sa Ehipto: “Dili mo daogdaogon ang usa ka langyaw nga pumoluyo o lupigan siya . . . Dili ninyo sakiton ang bisan kinsang babayeng balo o batang ilo-sa-amahan. Kon ikaw magsakit kaniya, nan kon siya motuaw kanako, sa walay pakyas akong dunggon ang iyang pagtuaw.” (Exodo 22:21-24) Dugang pa, ang propetang si Isaias mipahayag sa iyang pagsalig sa pag-atiman sa Diyos sa mga timawa: “Ikaw nahimong usa ka salipdanan sa timawa, usa ka salipdanan sa kabos diha sa iyang kasakit, usa ka dalangpanan gikan sa bagyo, usa ka landong gikan sa kainit, sa dihang ang huros sa mga malupigon maoy sama sa bagyo nganha sa paril.”—Isaias 25:4.

Sa tibuok niyang ministeryo, si Jesu-Kristo, nga mao “ang tukma nga larawan” sa Diyos, nahimong panig-ingnan sa iyang mga tinun-an sa pagpakitag tiunay nga kaikag sa ordinaryong mga tawo. (Hebreohanon 1:3) Sa iyang pagkakita sa panon sa mga tawo nga “pinanitan ug nagkatibuagsa sama sa mga karnero nga walay magbalantay,” si Jesus “naluoy kanila.”—Mateo 9:36.

Matikdi usab kon unsang matanga sa mga tawo ang gipili ni Jesus ingon nga iyang mga apostoles—mga lalaki nga gihubit ingong “dili edukado ug ordinaryo.” (Buhat 4:13) Pagkamatay ni Jesus,  ang iyang mga sumusunod nagsugod pagdapit sa tanang matang sa mga tawo sa pagpaminaw sa Pulong sa Diyos. Si apostol Pablo misulat nga ang “dili-magtutuo o ordinaryong tawo” makasulod sa Kristohanong kongregasyon ug mahimong magtutuo. (1 Corinto 14:24, 25) Inay pilion lamang ang mga tawong gidayeg sumala sa kalibotanong mga sukdanan, ang Diyos nagpili ug daghang makasaranganon, ordinaryong mga tawo sa pag-alagad kaniya. “Inyong nakita ang iyang pagtawag kaninyo, mga igsoon,” matod ni apostol Pablo, “nga dili daghan ang maalamon sa unodnong paagi ang gitawag, dili daghan ang gamhanan, dili daghan ang hamili ug kagikan; kondili gipili sa Diyos ang binuang nga mga butang sa kalibotan, aron iyang mapakaulawan ang mga tawong maalamon; ug gipili sa Diyos ang mahuyang nga mga butang sa kalibotan, aron iyang mapakaulawan ang kusganong mga butang; ug gipili sa Diyos ang tinamay nga mga butang sa kalibotan ug ang mga butang nga gipakaubos, mga butang nga wala magalungtad, aron iyang mawagtang ang mga butang nga nagalungtad, aron walay unod nga makapanghambog sa panan-aw sa Diyos.”—1 Corinto 1:26-29.

Karon, ang Diyos tim-os nga interesado usab kanato. Maoy kabubut-on sa Diyos nga “ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Timoteo 2:4) Kon gihigugma pag-ayo sa Diyos ang katawhan mao nga iyang gipadala ang iyang Anak sa yuta aron mamatay alang kanato, kita walay rason nga mobating wala higugmaa o walay kapuslanan. (Juan 3:16) Gipakita ni Jesu-Kristo sa iyang mga sumusunod ang kahinungdanon sa pagtagad bisan sa labing ubos sa iyang espirituwal nga mga igsoon nga daw si Jesus mismo ang gitagad. Siya miingon: “Sa sukod nga gibuhat ninyo kini sa usa sa labing ubos niining akong mga igsoon, gibuhat ninyo kini kanako.” (Mateo 25:40) Bisan unsa pay pagtagad sa kalibotan kanato, kon kita nahigugma sa kamatuoran, kita espesyal sa panan-aw sa Diyos.

Ingon niana ang gibati ni Francisco, a usa ka Brazilianong batang lalaki nga ilo sa amahan, human niya maugmad ang personal nga relasyon sa Diyos. Siya misaysay: “Ang pagkaila kang Jehova ug sa iyang organisasyon nakatabang kanako sa pagsagubang sa akong mga pagbati sa pagkawalay-kasegurohan ug pagkamaulawon. Akong nakat-onan nga si Jehova interesado gayod sa matag usa kanato.” Alang kang Francisco, si Jehova nahimong usa ka tinuod nga Amahan.

Kahangawa Alang sa mga Batan-on

Si Jehova interesado kaayo sa mga batan-on dili lang ingon nga usa ka grupo kondili ingong mga indibiduwal. Siyempre, batan-on man o tigulang, dili gayod kita maghunahuna nga kita labaw kay sa uban. Apan, duna tingali kitay mga abilidad ug mga hiyas nga magamit sa Diyos sa umaabot. Nahibalo si Jehova kon unsang pagdalisay ug pagbansay ang atong gikinahanglan aron magamit pag-ayo ang atong natagong mga katakos. Pananglitan, matikdi ang asoy sa 1 Samuel kapitulo 16. Sanglit ang ubang umaabot nga mga kandidato sa pagkahari sa Israel daw mas kuwalipikado sa panan-aw ni propetang Samuel, gipatin-aw ni Jehova ang Iyang mga rason sa pagpili kang David, ang kinamanghorang anak lalaki ni Jese, ingong umaabot nga hari sa Israel: “Ayaw pagtan-aw sa iyang panagway ug sa  gitas-on sa iyang barog, kay gisalikway ko siya [magulang nga lalaki ni David]. Kay ang pagtan-aw sa tawo dili sama sa pagtan-aw sa Diyos, tungod kay ang tawo nagatan-aw sa makita sa iyang mga mata; apan alang kang Jehova, siya nagatan-aw sa kasingkasing.”—1 Samuel 16:7.

Makasalig kaha ang mga batan-on karon nga si Jehova magpakitag tim-os nga interes kanila? Tagda si Ana, usa ka batan-ong Brazilianong babaye. Sama sa daghang ubang mga batan-on, siya natugaw sa pagkakita sa korapsiyon ug inhustisya. Unya siya ug ang iyang mga igsoong babaye gikuyog sa iyang amahan ngadto sa Kristohanong mga tigom. Ngadtongadto, nakaangay na siya sa iyang nakat-onan bahin sa Pulong sa Diyos. Misugod si Ana sa pagbasa sa Bibliya uban sa Kristohanong mga publikasyon ug sa pag-ampo kang Jehova nga Diyos. Sa inanay, naugmad niya ang suod nga relasyon sa Diyos. Siya misaysay: “Malingaw ako sa pagbisikleta ngadto sa bungtod duol sa among balay aron ako makasud-ong sa matahom nga pagsalop sa adlaw. Ako nag-ampo ug nagpasalamat kang Jehova tungod sa iyang kalulot ug pagkamahinatagon, nga naningkamot sa pagpahayag sa akong dakong gugma kaniya. Ang pagkahibalo bahin kang Jehova nga Diyos ug sa iyang mga katuyoan nakahatag kanakog kalinaw sa hunahuna ug pagbati sa kasegurohan.” Ikaw ba usab naningkamot sa pagpangitag panahon aron mamalandong sa mahigugmaong pag-atiman ni Jehova?

Tinuod, ang atong mga kaagi tingali mobabag aron atong matagamtam ang suod nga relasyon kang Jehova. Tagda pananglitan si Lidia. Sa dihang gibutyag niya sa iyang amahan ang usa ka butang nga nakapabalaka pag-ayo kaniya, gipakgang lang siya sa iyang amahan, nga nag-ingon: “Binuang.” Bisan tuod nasabtan niya nga gusto lang sa iyang amahan nga kalimtan niya ang problema, si Lidia miingon: “Ang pagtuon sa Bibliya naghatag kanako sa tanan nga akong gitinguha ug labaw pa niana. Ang makapadaning personalidad ni Jehova maoy nakapahimo kaniya nga akong labing suod nga higala. Karon ako adunay mahigugmaon, masinabotong Amahan nga akong kapahungawan sa akong mga pagbati ug sa akong gikabalak-an pag-ayong mga butang. Makagugol akog daghang oras sa pagpakigsulti sa labing importanteng Persona sa uniberso, nga masaligon nga siya mamati kanako.” Ang mga teksto sa Bibliya sama sa Filipos 4:6, 7 nakatabang kaniya sa pagbati sa mahigugmaong pag-atiman ni Jehova. Kanang tekstoha nag-ingon: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos; ug ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip pinaagi kang Kristo Jesus.”

Tabang sa Pagtagana sa Imong mga Panginahanglan

Si Jehova nagpakita sa iyang kahangawa sa iyang mga alagad sa tinagsatagsa maingon man sa iyang tibuok-kalibotang kongregasyon. Kita makapakita sa atong gugma alang sa atong langitnong Amahan pinaagi sa paggahin ug panahon sa pagpakigsulti kaniya. Dili gayod nato pakamenoson ang atong relasyon kaniya. Si David kanunayng nagmatikod sa iyang relasyon kang Jehova. Siya miingon: “Ipaila kanako ang imong mga dalan, Oh Jehova; tudloi ako sa imong mga alagianan. Palakta ako diha sa imong kamatuoran ug tudloi ako, kay ikaw mao ang akong Diyos sa kaluwasan. Kanimo ako naglaom sa tibuok nga adlaw.”—Salmo 25:4, 5.

Ang ideya bahin sa pagbaton ug suod nga relasyon sa Diyos tingali bag-o kanimo. Bisan unsay imong mga problema, ikaw makalaom kanunay nga ang Labing Hataas makatabang kanimo, uyon sa iyang kabubut-on. (1 Juan 5:14, 15) Busa, kat-oni nga himoong espesipiko ang imong mga pag-ampo, nga maghisgot sa imong mga kahimtang ug mga panginahanglan.

 Ang kahinungdanon sa pag-ila sa atong mga panginahanglan gipasiugda diha sa pag-ampo nga gitanyag ni Haring Solomon sa dihang gipahinungod ang templo: “Kon may gutom diha sa yuta, kon may kamatay, kon may makapagba nga kainit ug agup-op, mga dulon ug mga uk-ok; kon ang ilang mga kaaway molikos kanila diha sa yuta sa ilang mga ganghaan—bisan unsang matang sa hampak ug bisan unsang matang sa balatian— bisan unsa nga pag-ampo, bisan unsa nga hangyo alang sa pabor nga himoon ni bisan kinsa nga tawo o sa tibuok nimong katawhang Israel, tungod kay matag usa kanila nahibalo sa iyang hampak ug sa iyang kasakit . . . Nan maminaw ka unta gikan sa mga langit, . . . ug ikaw magapasaylo ug mohatag sa matag usa sumala sa tanan niyang mga dalan.” (2 Cronicas 6:28-30) Sa pagkatinuod, ikaw lamang gayod ang ‘nahibalo sa imong hampak ug sa imong kasakit.’ Busa, pagkahinungdanon gayod ang pag-ila sa imong tinuod nga mga panginahanglan ug mga tinguha. Kon buhaton nimo kini, “ihatag [ni Jehova] kanimo ang mga hangyo sa imong kasingkasing.”—Salmo 37:4.

Palig-ona ang Imong Relasyon Kang Jehova

Si Jehova malipay nga ang ordinaryong mga tawo makapahimulos ug suod nga relasyon kaniya. Ang Iyang Pulong nagpasalig kanato: “‘Ako mahimong inyong amahan, ug kamo mahimong akong mga anak nga lalaki ug mga anak nga babaye,’ nagaingon si Jehova nga Labing Gamhanan.” (2 Corinto 6:18) Sa pagkatinuod, si Jehova ug ang iyang Anak buot nga kita molampos ug makabaton sa kinabuhing dayon. Pagkamakapadasig ang pagkahibalo nga si Jehova motabang kanato sa pag-atiman sa atong mga kaakohan diha sa pamilya, sa trabaho, ug sa Kristohanong kongregasyon!

Bisan pa niana, kitang tanan nagasagubang sa lisod nga mga panahon. Ang dili-maayong panglawas, mga problema sa pamilya, gamayng kinitaan, o bisan unsa mahimong makapasakit kanato. Tingali dili kita mahibalong mosagubang sa usa ka pagsulay. Ang nagdaghang mga kapit-os, direkta man o dili-direkta, gipahinabo sa daotang tig-akusar, si Satanas nga Yawa, nga sa espirituwal nagpakiggubat sa katawhan sa Diyos. Bisan pa niana, adunay usa nga nakasabot kanato ug motabang kanato sa paghupot ug maayong relasyon kang Jehova. Walay lain, siya mao si Jesu-Kristo diha sa iyang tinuboy nga katungdanan sa mga langit. Atong mabasa: “Ang atong hataas nga saserdote, dili usa nga dili mobati sa atong mga kaluyahon, kondili usa nga nasulayan sa tanang paagi sama kanato, apan walay sala. Busa, uban ang kagawasan sa pagsulti manuol kita sa trono sa dili-takos nga kalulot, aron makadawat kita ug kaluoy ug makakaplag ug dili-takos nga kalulot ingong tabang sa hustong panahon.”—Hebreohanon 4:15, 16.

Pagkamakapadasig ang pagkahibalo nga dili diay kinahanglang kita ilado o dato aron lang makapahimulos sa pag-uyon sa Diyos! Bisan kon ikaw anaa sa lisod kaayong kahimtang, sundoga ang salmista nga miampo: “Ako sinakit ug kabos. Si Jehova naghunahuna kanako. Ikaw mao ang akong katabang ug ang Magtatagana ug kaikyasan kanako.” (Salmo 31:9-14; 40:17) Magmasaligon nga si Jehova nahigugma sa mapaubsanon, ordinaryong mga tawo. Sa pagkatinuod, ‘ikatugyan nato ang tanan natong mga kabalaka kaniya kay siya may kahingawa kanato.’—1 Pedro 5:7.

[Footnote]

[Mga hulagway sa panid 29]

Daghan sa mga sumusunod ni Jesus dili edukado ug ordinaryo

[Hulagway sa panid 30]

Ang mga Kristohanon naningkamot sa pagbaton ug lig-ong pagtuo

[Mga hulagway sa panid 31]

Dili kinahanglang kita ilado aron lang makapahimulos sa pag-uyon sa Diyos