Ang Panihapon sa Ginoo Dunay Dakong Kahulogan Alang Kanimo

DUNA bay hinungdanon ug malungtarong kahulogan ang Panihapon sa Ginoo alang kanimo? Aron mahibaloan, susihon una nato kon unsa ang kahulogang gihatag ni Jesus alang niining linaing okasyon.

Nianang gabhiona sa Nisan 14, 33 K.P., si Jesus ug ang iyang 12 ka apostoles nagtigom diha sa usa ka lawak sa itaas didto sa Jerusalem aron sa pagsaulog sa tinuig nga Paskuwa. Human nila makaon ang pagkaon sa Paskuwa, ang mabudhiong si Judas migula sa lawak aron sa pagbudhi kang Jesus. (Juan 13:21, 26-30) Gisugdan ni Jesus ang “panihapon sa Ginoo” uban sa nabiling 11 ka apostoles. (1 Corinto 11:20) Gitawag usab kini nga Memoryal, sanglit gisugo ni Jesus ang iyang mga sumusunod: “Buhata ninyo kini sa paghandom kanako.” Mao lamang kini ang okasyon nga gisugo ang mga Kristohanon sa paghandom.—1 Corinto 11:24, The Jerusalem Bible.

Sumala sa diksiyonaryong Webster, ang memoryal maoy usa ka butang nga motabang “aron kanunayng mahinumdom” o “aron padayong mahinumdom.” Sa daghang dapit, ang mga tawo magpatindog ug monyumento o magpilig espesyal nga adlaw sa paghinumdom sa usa ka bayani o pagsaulog sa usa ka hinungdanong panghitabo. Niining higayona gisugdan ni Jesus ang usa ka halandomong pagpangaon—pagpangaon nga magsilbing pahinumdom, nga magtabang sa iyang mga tinun-an aron mahinumdoman kanunay ang hinungdanon kaayong mga hitabo nianang importanteng adlaw. Alang sa umaabot nga mga kaliwatan, kining maong pagpangaon sa memoryal magpahinumdom sa mga nagsaulog sa makahuloganong gihimo ni Jesus nianang gabhiona, ilabina sa mga simbolo nga iyang gigamit. Unsang mga simbolo, o mga emblema, ang gigamit ni Jesus, ug unsay kahulogan niini? Atong susihon ang asoy sa Bibliya bahin sa nahitabo nianang gabhiona sa 33 K.P.

Sagradong mga Simbolismo

“Siya nagkuhag tinapay, nagpasalamat, nagpikaspikas niini, ug naghatag niini kanila, nga nag-ingon: ‘Kini nagkahulogan sa akong lawas nga igahatag alang kaninyo. Ipadayon ninyo ang pagbuhat niini sa paghandom kanako.’”—Lucas 22:19.

Sa dihang gikuha ni Jesus ang tinapay ug miingon, “kini nagkahulogan sa akong lawas,” iyang gipakita nga ang tinapayng walay lebadura maoy hawas, o simbolo, sa iyang walay-sala nga unodnong lawas, nga iyang gihatag “alang sa kinabuhi sa kalibotan.” (Juan 6:51) Bisan tuod ang ubang mga hubad sa Bibliya nag-ingong “kini mao [Grego, es·tinʹ] ang akong lawas,” ang Greek-English  Lexicon of the New Testament ni Thayer nag-ingon nga ang kasagarang kahulogan niining maong berbo maoy “nagpasabot, nagkahulogan, nagpaila.” Ang ideyang gihatag maoy paghawas, o pagsimbolo.—Mateo 26:26.

Ang kopa sa bino maoy simbolo usab. Si Jesus nag-ingon: “Kini nga kopa nagkahulogan sa bag-ong pakigsaad tungod sa akong dugo, nga igabubo alang kaninyo.”—Lucas 22:20.

Sa asoy ni Mateo, si Jesus nag-ingon bahin sa kopa: “Kini nagkahulogan sa akong ‘dugo sa pakigsaad,’ nga igabubo alang sa daghan sa kapasayloan sa mga sala.” (Mateo 26:28) Gigamit ni Jesus ang bino diha sa kopa ingong hawas, o simbolo, sa iyang dugo. Ang iyang giula nga dugo mao ang pundasyon sa “bag-ong pakigsaad” alang sa dinihogan-sa-espiritu nga mga tinun-an, kinsa magamando ingong mga hari ug saserdote uban kaniya sa langit.—Jeremias 31:31-33; Juan 14:2, 3; 2 Corinto 5:5; Pinadayag 1:5, 6; 5:9, 10; 20:4, 6.

Ang bino diha sa kopa maoy pahinumdom usab nga ang giula nga dugo ni Jesus mao ang pasikaranan sa “kapasayloan sa mga sala,” sa ingon nagbukas sa dalan aron ang mga umalambit pagatawgon ngadto sa langitnong kinabuhi ingong kaubang mga manununod ni Kristo. Masabtan nga kadtong may langitnong pagtawag—nga may limitadong gidaghanon—mao lamang ang makig-ambit sa tinapay ug bino sa Memoryal.—Lucas 12:32; Efeso 1:13, 14; Hebreohanon 9:22; 1 Pedro 1:3, 4.

Apan, komosta kadtong tanang sumusunod ni Jesus nga dili bahin sa bag-ong pakigsaad? Mao kini sila ang “ubang mga karnero” sa Ginoo, nga wala maglaom nga magmando uban kang Kristo sa langit, kondili magtagamtam ug kinabuhing walay kataposan sa paraisong yuta. (Juan 10:16; Lucas 23:43; Pinadayag 21:3, 4) Ingong “usa ka dakong panon” sa matinumanong mga Kristohanon nga “nagahatag [sa Diyos] ug sagradong pag-alagad adlaw ug gabii,” sila malipay nga mahimong mapasalamatong mga maniniid sa Panihapon sa Ginoo. Ang ilang mga pulong ug mga buhat sa diwa nagaingon: “Ang kaluwasan utang namo sa atong Diyos, nga naglingkod sa trono, ug sa Kordero.”—Pinadayag 7:9, 10, 14, 15.

Kapila Saulogon?

“Ipadayon ninyo ang pagbuhat niini sa paghandom kanako.”—Lucas 22:19.

Kapila kinahanglang saulogon ang Memoryal aron mahinumdoman kanunay ang kamatayon ni Kristo? Walay espesipikong gisulti si Jesus. Apan, tungod kay iyang gisugdan ang Panihapon sa Ginoo sa Nisan 14, sa gabii sa Paskuwa, nga tinuig nga gisaulog sa mga Israelinhon, dayag nga tuyo ni Jesus nga saulogon ang Memoryal sa samang paagi. Tungod kay tinuig nga gisaulog sa mga Israelinhon ang ilang pagkahigawas gikan sa pagkaulipon sa Ehipto, ang mga Kristohanon tinuig nga nagasaulog sa ilang pagkahigawas gikan sa pagkaulipon sa sala ug kamatayon.—Exodo 12:11, 17; Roma 5:20, 21.

Ang ideya sa tinuig nga selebrasyon sa pagsaulog sa usa ka hinungdanong okasyon maoy komon gayod. Tagda, pananglitan, ang pagsaulog sa usa ka magtiayon sa anibersaryo sa ilang kasal o ang pagsaulog sa usa ka nasod sa usa ka hinungdanong panghitabo sa kasaysayan niini. Ang pagsaulog kasagarang himoon kas-a sa usa ka tuig sa anibersaryo sa maong okasyon. Makaiikag nga sa daghang siglo human sa panahon ni Kristo, daghang nag-angkong mga Kristohanon ang gitawag ug mga Kuwartodesimanos, nga nagkahulogang “mga Tigsaulog sa Ikakatorse,” tungod kay gisaulog nila ang kamatayon ni Jesus kas-a sa usa ka tuig, sa Nisan 14.

 Yano Apan Hinungdanon Kaayo

Gipatin-aw ni apostol Pablo nga pinaagi sa pagsaulog sa Panihapon sa Ginoo ang mga tinun-an ni Jesus ‘padayong magmantala sa kamatayon sa Ginoo.’ (1 Corinto 11:26) Busa, kining maong pagsaulog magsentro sa pagtagad diha sa hinungdanong papel nga gidula ni Jesus, pinaagi sa iyang kamatayon, sa katumanan sa katuyoan sa Diyos.

Pinaagi sa iyang pagkamatinumanon hangtod sa kamatayon, nabayaw ni Jesu-Kristo si Jehova nga Diyos ingong maalamon ug mahigugmaong Maglalalang ug matarong nga Soberano. Sukwahi sa mga pangangkon ni Satanas ug dili sama ni Adan, gipamatud-an ni Jesus nga ang usa ka tawo makapabiling matinumanon sa Diyos, bisan ubos sa grabeng pagpit-os.—Job 2:4, 5.

Pinaagi sa Panihapon sa Ginoo, ang nagsakripisyo-sa-kaugalingon nga gugma ni Jesus kanunay usab nga mahinumdoman sa mapasalamatong paagi. Bisan pa sa grabeng mga pagsulay, si Jesus hingpit nga nagmatinumanon sa iyang Amahan. Busa nakahimo siya sa pagtanyag sa iyang hingpit nga tawhanong kinabuhi aron mabawi ang dako kaayong kapildihan nga gipahinabo sa sala ni Adan. Sumala sa gipatin-aw mismo ni Jesus, mianhi siya “sa paghatag sa iyang kalag nga usa ka lukat baylo sa daghan.” (Mateo 20:28) Tungod niini, ang tanang magpasundayag ug pagtuo kang Jesus mapasaylo sa ilang mga sala ug makadawat ug kinabuhing walay kataposan uyon sa orihinal nga katuyoan ni Jehova alang sa mga tawo.—Roma 5:6, 8, 12, 18, 19; 6:23; 1 Timoteo 2:5, 6. a

Kining tanan nagpasiugda usab sa dagayang pagkamaayo ug dili-takos nga kalulot ni Jehova sa pagtagana ug paagi alang sa kaluwasan sa mga tawo. Ang Bibliya nag-ingon: “Pinaagi niini ang gugma sa Diyos gipadayag sa atong kahimtang, tungod kay gipadala sa Diyos ang iyang bugtong nga Anak nganhi sa kalibotan aron kita makabaton ug kinabuhi pinaagi kaniya. Ang gugma maoy niining paagiha, dili nga kita nahigugma sa Diyos, kondili nga siya ang nahigugma kanato ug gipadala ang iyang Anak ingong usa ka halad pasig-uli alang sa atong mga sala.”—1 Juan 4:9, 10.

Oo, talagsaon gayod nga selebrasyon ang Memoryal! Yano ug posibleng saulogon sa tibuok kalibotan ubos sa daghang lainlaing mga kahimtang, apan simboliko kaayo mao nga nagapadayon kini ingong makahuloganong pahinumdom sulod na sa taas nga yugto sa panahon.

Ang Kahulogan Niini Alang Kanimo

Tungod sa haladnong kamatayon sa atong Ginoong Jesu-Kristo, dako kaayo ang gisakripisyo  niya ug sa iyang Amahan nga si Jehova. Ingong hingpit nga tawo, si Jesus walay panulondong kamatayon, dili sama natong tanan. (Roma 5:12; Hebreohanon 7:26) Makapadayon unta siya sa pagkinabuhi nga walay kataposan. Kon dili niya itugot, dili siya mahimong patyon bisan pa sa pinugos nga paagi. Siya nag-ingon: “Walay tawo nga nagkuha [sa akong kinabuhi] gikan kanako, apan ako nagtugyan niini sa akong kaugalingong pagbuot.”—Juan 10:18.

Bisan pa niana, si Jesus andam nga mitanyag sa iyang hingpit nga tawhanong kinabuhi ingong halad aron nga “pinaagi sa iyang kamatayon mawagtang niya ang usa nga may gahom sa pagpahinabog kamatayon, nga mao, ang Yawa; ug nga iyang mapagawas ang tanan nga tungod sa kahadlok sa kamatayon nailalom sa pagkaulipon sa tibuok nilang kinabuhi.” (Hebreohanon 2:14, 15) Ang nagsakripisyo-sa-kaugalingon nga gugma ni Kristo dugang nga napamatud-an diha sa paagi sa kamatayon nga iyang gitugotan nga mahitabo kaniya. Nasayod gayod siya kon sa unsang paagi siya mag-antos ug mamatay.—Mateo 17:22; 20:17-19.

Ang Memoryal magpahinumdom usab kanato sa kinadak-ang pagpasundayag sa gugma nga nahimo sukad sa atong langitnong Amahan, si Jehova. Pagkasakit alang kaniya, kinsa “malumo kaayo sa pagmahal ug maluluy-on,” nga madungog ug makita ang “makusog nga mga pagtuaw ug mga luha” ni Jesus didto sa tanaman sa Getsemane, ang mabangison kaayong paglapdos, mapintasong paglansang, ug ang anam-anam, masakit kaayong kamatayon. (Santiago 5:11; Hebreohanon 5:7; Juan 3:16; 1 Juan 4:7, 8) Ang paghunahuna lang niini bisan karon, nga daghang siglo na ang milabay, makasakit gihapon sa daghan.

Handurawa ang dako kaayong sakripisyo nga gihimo ni Jehova nga Diyos ug ni Jesu-Kristo alang kanato nga mga makasasala! (Roma 3:23) Adlaw-adlaw, atong giatubang ang masakit nga kamatuoran bahin sa atong makasasalang kinaiya ug pagkadili-hingpit. Apan, pinasukad sa pagtuo diha sa halad lukat ni Jesus, kita makapangayog pasaylo sa Diyos. (1 Juan 2:1, 2) Tungod niini gitagamtam nato ang kagawasan sa pagsulti ngadto sa Diyos ug ang usa ka hinlo nga tanlag. (Hebreohanon 4:14-16; 9:13, 14) Dugang pa, kita may paglaom nga mabuhi sa paraisong yuta hangtod sa hangtod. (Juan 17:3; Pinadayag 21:3, 4) Kini ug ang daghang uban pang mga panalangin maoy mga resulta sa kinalabwang buhat ni Jesus sa pagsakripisyo sa kaugalingon.

Pagpakitag Apresasyon Alang sa Panihapon sa Ginoo

Ang Panihapon sa Ginoo sa walay duhaduha maoy usa ka talagsaong pasundayag “sa labawng dili-takos nga kalulot sa Diyos.” Ug ang tagana ni Jehova nga Diyos nga halad lukat—nga naposible tungod sa nagsakripisyo-sa-kaugalingon nga gugma ni Jesus—mao gayod ang iyang “dili-mahubit nga walay bayad nga gasa.” (2 Corinto 9:14, 15) Wala ka ba mapalihok sa pagpakita sa imong dulot ug dumalayong pagpasalamat ug apresasyon tungod niining mga pagpasundayag sa pagkamaayo sa Diyos pinaagi kang Jesu-Kristo?

Nagtuo kami nga napalihok ka. Busa, kami mainitong nagdapit kanimo sa pagtambong uban sa mga Saksi ni Jehova sa pagsaulog sa Memoryal sa kamatayon ni Jesus. Karong tuiga ang Memoryal pagahimoon sa Miyerkoles, Abril 16, human sa pagsalop sa adlaw. Ang mga Saksi ni Jehova sa imong lugar malipayng magpahibalo kanimo sa eksaktong oras ug dapit alang niining hinungdanon kaayong okasyon.

[Footnote]

[Kahon/Mga hulagway sa panid 6]

“KINI ANG AKONG LAWAS” O “KINI NAGKAHULOGAN SA AKONG LAWAS” UNSAY HUSTO?

Sa dihang si Jesus miingon, “ako ang pultahan” ug, “ako mao ang matuod nga punoan sa paras,” walay naghunahuna nga siya maoy literal nga pultahan o literal nga punoan sa paras. (Juan 10:7; 15:1) Sa susama, sa dihang gikutlo sa The New Jerusalem Bible si Jesus nga nag-ingong: “Kini nga kopa mao ang bag-ong pakigtugon,” dili kita mohinapos nga ang kopa mismo mao ang literal nga bag-ong pakigtugon. Busa, sa dihang miingon usab siya nga ang tinapay ‘mao’ ang iyang lawas, dayag nga ang tinapay nagkahulogan, o nagsimbolo, sa iyang lawas. Busa, ang Charles B. Williams nga hubad nag-ingon: “Kini naghawas sa akong lawas.”—Lucas 22:19, 20.

[Hulagway sa panid 5]

Ang tinapay nga walay lebadura ug ang bino maoy haom nga mga simbolo sa walay-sala nga lawas ni Jesus ug sa iyang giula nga dugo

[Hulagway sa panid 7]

Ang Memoryal maoy pahinumdom sa dakong gugma nga gipakita ni Jehova nga Diyos ug ni Jesu-Kristo