Matapos ba Gayod ang Kakabos?

“TAN-AWA! ang mga luha niadtong mga gilupigan, apan sila walay maghuhupay; ug sa mga nanglupig kanila diha ang gahom, mao nga sila walay maghuhupay,” matod sa maalamong Haring Solomon sa karaang Israel. (Ecclesiastes 4:1) Walay duhaduha, daghan niadtong iyang gihunahuna nga gidaogdaog maoy mga kabos usab.

Ang kakabos dili lang masukod sa kon pilay kuwarta nga nabatonan sa usa ka tawo. Sumala sa impormasyon nga gihatag sa World Bank sa Hunyo 2002, “gibanabana nga sa 1998 ang sukod sa konsumo sa 1.2 ka bilyong tawo sa tibuok kalibotan maoy ubos sa $1 ang adlaw . . . ug 2.8 ka bilyon ang nabuhi sa kantidad nga kubos sa $2 ang adlaw.” Namatikdan nga bisan pag ang maong gidaghanon sa mga tawo mas ubos kay sa unang mga pamanabana, “sa gihapon daghan kaayo kini kon hisgotan ang gidaghanon sa mga tawong nag-antos.”

Matapos ba gayod ang kakabos? Gisultihan ni Jesu-Kristo ang iyang mga tinun-an: “Ang mga kabos kanunay nga anaa kaninyo.” (Juan 12:8) Apan nagpasabot ba kini nga ang kakabos ug ang mapait nga mga resulta niini magpadayon hangtod sa hangtod? Dili, kay bisan tuod wala saari ni Jesus ang iyang mga sumusunod nga sila mahimong adunahan sa materyal, dili kita angayng maghinapos nga ang iyang gisulti nagkahulogan nga wala nay paglaom ang mga kabos.

Bisan pag ang mga paningkamot sa tawo ug mga saad sa pagtapos sa kakabos kanunayng mapakyas, ang Pulong sa Diyos, ang Bibliya, nagpasalig kanato nga sa dili madugay wala nay kabos nga mga tawo. Sa pagkatinuod, si Jesus nagpahayag ug “maayong balita ngadto sa mga kabos.” (Lucas 4:18) Kining maayong balita naglakip sa saad nga wad-on na ang kakabos. Mahitabo kini sa dihang ipahinabo sa Gingharian sa Diyos ang matarong nga mga kahimtang dinhi sa yuta.

Pagkalahi gayod unya nianang kalibotana! Ang langitnon nga Haring Jesu-Kristo ‘maluoy sa timawa ug sa kabos, ug pagaluwason niya ang mga kalag sa mga kabos.’ Sa pagkatinuod, “gikan sa pagpanglupig ug sa kapintasan tubson niya ang ilang kalag.”—Salmo 72:13, 14.

Mahitungod nianang panahona, ang Miqueas 4:4 nag-ingon: “Sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila; kay ang baba ni Jehova sa mga panon nagsulti niini.” Sulbaron sa Gingharian sa Diyos ang tanang problema nga naghasol sa mga tawo, ug wad-on bisan ang sakit ug kamatayon. “Lamyon gayod [sa Diyos] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”—Isaias 25:8.

Makasalig ka niining mga saara tungod kay kini inspirado sa Diyos mismo. Nganong dili nimo susihon ang ebidensiya nga nagpamatuod sa pagkakasaligan sa mga tagna sa Bibliya?

[Picture Credit Line sa panid 32]

FAO photo/M. Marzot