Mga Pangutana Gikan sa mga Magbabasa

Kasulatanhon ba nga ang usa ka Kristohanon magtapion sa iyang kamot sa Bibliya ug manumpa sa pagsulti sa kamatuoran diha sa Korte?

Ang matag usa maoy magdesisyon niining bahina. (Galacia 6:5) Apan, wala idili sa Bibliya ang pagpanumpa aron sa pagsulti sa kamatuoran diha sa korte.

Ang pagpanumpa kaylap nang gihimo kaniadto pa. Sa karaang mga panahon, pananglitan, ang mga Grego mag-isa sa usa ka kamot ngadto sa langit o maggunit sa altar sa dihang manumpa. Sa dihang manumpa ang usa ka Romanong hurado, siya maggunit ug bato ug manumpa: “Kon ako tinuyong manglimbong, samtang si Jupiter magluwas sa siyudad ug sa kuta, hinaot [ang diyos] nga si Jupiter magwagtang sa tanang maayong butang sa akong kinabuhi, sama sa akong paglabay niining bato.”—Cyclopedia of Biblical, Theological, and Ecclesiastical Literature, ni John McClintock ug James Strong, Tomo VII, panid 260.

Ang maong mga buhat nagpakita nga ang mga tawo may kiling sa pag-ila sa paglungtad sa usa ka diyos nga makaobserbar sa mga tawo ug nga kaniya sila manubag. Sukad pa sa karaang mga panahon, ang matuod nga mga magsisimba ni Jehova nasayod nga ang Diyos nahibalo sa ilang gisulti ug gibuhat. (Proverbio 5:21; 15:3) Sila daw nanumpa diha sa presensiya sa Diyos o nakig-uban kaniya ingon nga saksi. Pananglitan, gihimo kini ni Boaz, David, Solomon, ug Zedekias. (Ruth 3:13; 2 Samuel 3:35; 1 Hari 2:23, 24; Jeremias 38:16) Ang mga magsisimba sa matuod nga Diyos nagtugot usab sa uban nga sila ipailalom sa panumpa. Ingon niana ang nahitabo kang Abraham ug kang Jesu-Kristo.—Genesis 21:22-24; Mateo 26:63, 64.

Ang tawo nga manumpa atubangan ni Jehova usahay maghimo niini uban ang pagkompas. Si Abram (Abraham) miingon sa hari sa Sodoma: “Giisa ko ang akong kamot sa pagpanumpa kang Jehova nga Labing Hataas nga Diyos, Magmumugna sa langit ug sa yuta.” (Genesis 14:22) Ang manulonda nga nakigsulti sa manalagnang si Daniel ‘miisa sa iyang tuong kamot ug sa iyang walang kamot ngadto sa kalangitan ug nanumpa sa ngalan sa Usa nga buhi hangtod sa panahong walay tino.’ (Daniel 12:7) Bisan ang Diyos gipunting nga simbolikong nag-isa sa iyang kamot ug nanumpa.—Deuteronomio 32:40; Isaias 62:8.

Wala idili sa Kasulatan ang pagpanumpa. Apan, ang usa ka Kristohanon dili angayng manumpa aron lang pamatud-an ang kada pulong nga iyang isulti. Si Jesus miingon: “Himoa lang ang inyong pulong nga Oo magkahulogan ug Oo, ang inyong Dili, Dili.” (Mateo 5:33-37) Ingon usab niana ang gihisgotan sa tinun-an nga si Santiago. Sa dihang siya miingon “hunong na sa pagpanumpa,” siya nagpasidaan batok sa binuang nga pagpanumpa. (Santiago 5:12) Si Jesus ug si Santiago wala mag-ingon nga sayop ang pagpanumpa aron sa pagsulti sa kamatuoran diha sa korte.

Apan, komosta kon ang usa ka Kristohanon papanumpaon diha sa korte nga tinuod ang iyang testimonyo? Iyang bation tingali nga mahimo ra man nga manumpa. Kay kon dili, mahimong pahatagon siyag maugdang nga pahayag nga magpamatuod nga siya wala mamakak.—Galacia 1:20.

Sa dihang ang proseso sa korte maglakip sa pag-isa sa usa ka kamot o pagtapion sa Bibliya sa dihang manumpa, ang usa ka Kristohanon mahimong motuman. Mahinumdoman tingali niya ang mga pananglitan diha sa Kasulatan nga may nanumpa uban ang pagkompas. Alang sa usa ka Kristohanon, mas mahinungdanon nga iyang mahinumdoman nga siya manumpa atubangan sa Diyos sa pagsulti sa kamatuoran kay sa usa ka tinong pagkompas. Maugdang ang maong panumpa. Kon ang usa ka Kristohanon mobati nga siya makatubag ug kinahanglang motubag sa gipangutana kaniya sa maong mga kahimtang, nan angay niyang hinumdoman nga siya nanumpa sa pagsulti sa kamatuoran, siyempre, mao gayod ang angay isulti sa usa ka Kristohanon sa tanang panahon.