“Duol sa Diyos, ug Siya Moduol Kaninyo”

Kaniadto ug Karon—Pulong sa Diyos Makapabag-o

KON nahimamat mo si Tony sa dihang bayongbayong pa siya, makita mo unta ang usa ka bagis ug isogon nga batang tig-istambay sa pipila ka dili-maayog dungog nga mga dapit sa Sydney, Australia. Duna siyay mga higala nga maoy mga membro sa gang. Nalambigit sila kanunay sa mga pagpangawat, away sa gang, ug pinusilay sa dalan.

Misugod pagtabako si Tony sa dihang siya nuybe anyos. Sa dihang siya 14 anyos na, regular na siyang tiggamit ug marijuana ug nagkinabuhi nga imoral. Sa pag-edad niyag 16 anyos, nagiyan siya sa heroina, ug kadto misangko sa paggamit ug cocaine, LSD—“sa pagkatinuod, bisan unsa lang aron ako mobatig kalalim,” sumala pa ni Tony. Unya iyang gitukod ang mga kontak labot sa pagbaligyag mga droga uban sa duha ka sindikato sa krimen. Sa wala madugay si Tony nailhan nga usa sa labing kasaligang mga tigsuplay ug droga sa silangang baybayon sa Australia.

Ang gasto ni Tony sa iyang bisyo sa heroina ug marijuana maoy tali sa $160 (T.B.) ug $320 (T.B.) sa usa ka adlaw. Apan dili lang kana ang giantos sa iyang pamilya. “Ang akong asawa ug ako,” matod niya, “daghang beses nga gitionan ug mga pusil ug korta sa among mga nawong sa mga kriminal nga nangitag mga droga ug kuwarta sa among balay ug silinganan.” Human mapriso ug tulo ka beses, napugos si Tony sa pagsusi sa direksiyon sa iyang kinabuhi.

Bisan pag sa nangagi siya tigsimba, mibati si Tony nga nahilayo sa Diyos nga magsunog kono sa walay kataposan sa mga makasasala diha sa impiyerno ingong silot. Apan, sa miduaw ang duha ka Saksi ni Jehova, si Tony natingala sa pagkahibalo nga ang Diyos dili diay ingon niana. Ug nalipay si Tony nga siya makatul-id sa iyang kinabuhi ug makadawat ug mga panalangin gikan sa Diyos. Si Tony naaghat sa mga pulong ni Jesu-Kristo: “Ang tanang butang posible sa Diyos.” (Marcos 10:27) Ilabinang natandog si Tony sa makapadasig nga mga pulong: “Duol sa Diyos, ug siya moduol kaninyo.”—Santiago 4:8.

Sa maong higayon giatubang ni Tony ang suliran nga ipahiuyon ang iyang kinabuhi sa mga sukdanan sa Bibliya. Miingon siya: “Ang una kong gihunong mao ang pagtabako, butang nga wala gayod nako mahimo sa nangagi, bisan pag kapila na nako sulayi nga mohunong. Tungod sa gahom gikan ni Jehova, nakahunong ako sa paggamit sa heroina ug marijuana, mga bisyo sa droga nga nag-ulipon kanako sa miaging 15 ka tuig. Wala gayod nako palandonga nga posible ang paghunong sa maong mga bisyo.”

Inay mahadlok sa Diyos nga magpaantos nga walay kataposan sa mga tawo diha sa impiyerno—usa ka doktrinang dili makita sa Bibliya—si Tony ug ang iyang asawa nakadangat sa paghambin sa paglaom sa kinabuhing walay kataposan sa usa ka paraisong yuta. (Salmo 37:10, 11; Proverbio 2:21) “Daghang panahon ug dakong paningkamot ang gikinahanglan aron ikapahiuyon ko ang akong kinabuhi sa mga sukdanan sa Diyos,” miadmitir si Tony, “apan sa tabang ni Jehova ako milampos.”

Oo, kining kanhi giyanon sa droga nahimong Kristohanon.  Kay nagboluntaryo sa ilang panahon ug materyal nga mga kahinguhaan, siya ug ang iyang asawa migugol ug libolibong oras diha sa pagtudlo bahin sa Bibliya. Sila puliki usab sa pagmatuto ug duha ka mahadlokon-sa-Diyos nga mga anak. Kining dakong kausaban nalampos tungod sa dili-masuklan nga gahom sa Pulong sa Diyos, ang Bibliya. Sa pagkamatuod, sumala sa giingon ni apostol Pablo, “ang pulong sa Diyos buhi ug gamhanan.”—Hebreohanon 4:12.

Bisan pa sa maong makapalig-ong mga panig-ingnan, ang pipila dili-makataronganong magpatuo nga ang gibase-sa-Bibliya nga edukasyonal nga buluhaton sa mga Saksi ni Jehova makabungkag sa mga pamilya ug magdaot sa maayong mga prinsipyo sa mga batan-on. Ang kaso ni Tony tinong magpanghimakak sa maong pagpatuo.

Sama kang Tony, daghan ang nakahibalo nga ang makapatay nga mga pagkagiyan mahimong buntogon. Sa unsang paagi? Pinaagi sa pagtuo sa Diyos ug pagsalig kaniya ug sa iyang Pulong, ingon man sa suportar sa mahunahunaon ug mahigugmaong Kristohanong mga kauban. Si Tony malipayong mihinapos: “Akong nakita kon sa unsang paagi ang mga prinsipyo sa Bibliya nakapanalipod sa akong mga anak. Ang mga pagtulon-an sa Bibliya nakaluwas sa akong kaminyoon. Ug ang akong mga silingan mas daling makatulog karon kay dili na ako peligroso alang kanila.”

[Blurb sa panid 9]

‘Tungod sa gahom gikan ni Jehova, nakaundang ako sa bisyo sa droga nga nag-ulipon kanako sulod sa 15 ka tuig’

[Kahon sa panid 9]

Mga Prinsipyo sa Bibliya Makapabag-o

Ang nagkalainlaing mga prinsipyo sa Bibliya nakatabang sa daghang giyanon ug droga sa paghunong niining makapaluya nga bisyo. Nahilakip niining mga prinsipyoha mao ang mosunod:

“Hinloan nato ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.” (2 Corinto 7:1) Supak sa balaod sa Diyos ang paggamit ug mga droga.

“Ang pagkahadlok kang Jehova maoy sinugdanan sa kaalam, ug ang kahibalo bahin sa Labing Balaang Usa mao ang pagsabot.” (Proverbio 9:10) Ang lalom nga pagtahod kang Jehova nga gipasukad sa tukmang kahibalo bahin kaniya ug sa iyang mga paagi nakatabang sa daghan nga mahigawas sa impluwensiya sa mga droga.

“Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” (Proverbio 3:5, 6) Ang makadaot nga mga bisyo mahunong pinaagi sa kinasingkasing nga pagsalig sa Diyos ug bug-os nga pagkamasaligon kaniya.