‘Magmaalamon sa Imong Ugma-Damlag’

“Gigamit sa kinabag-an sa katawhan ang sayong bahin sa ilang kinabuhi sa paagi nga mahimong kagul-anan ang kataposan niini.” Mao kanay giingon ni Jean de La Bruyère, usa ka Pranses nga magsusulat sa ika-17ng siglo. Sa pagkatinuod, ang usa ka maduhaduhaon nga batan-on mahimong magpalingpaling tali sa mga kapilian nga bukas alang kaniya, sa ingon makasinati ug kawalay-katagbawan ug pagbasol. Sa laing bahin, ang gahig-ulo nga batan-on mahimong magpadayon diha sa dili-maalamong dalan, nga maghikaw kaniya sa kalipay sa ulahing bahin sa iyang kinabuhi. Bisan hain niana, ang mga sala tungod sa pagkapakyas sa pagbuhat sa kon unsay husto ug nahiangay o tungod sa paghimo ug usa ka krimen mahimong motultol ngadto sa dakong kagul-anan.

Sa unsang paagi malikayan ang maong dulnganan? Sa pagpasidaan batok sa pagkamaduhaduhaon sa batan-on, ang Pulong sa Diyos nagtambag sa mga batan-on: “Hinumdomi, karon, ang imong Dakong Maglalalang sa mga adlaw sa imong pagkabatan-on, sa dili pa moabot ang malisod nga mga adlaw, o modangat ang mga tuig sa dihang ikaw moingon: ‘Ako walay kalipay niini.’” (Ecclesiastes 12:1) Kon ikaw usa ka batan-on, paghimog positibong mga lakang aron makakat-on bahin sa “imong Dakong Maglalalang” samtang batan-on ka pa.

Nan, sa unsang paagi makatabang ang Bibliya sa mga batan-on aron malikayan ang kabuangan nga iya sa pagkabatan-on? Kini nag-ingon: “Patalinghog sa tambag ug dawata ang disiplina, aron ikaw mahimong maalamon sa imong ugma-damlag.” (Proverbio 19:20) Tin-aw usab nga gipakita sa Bibliya nga ang pagsalikway sa kaalam sa Diyos tungod sa pagpasagad o pagsukol panahon sa pagkabatan-on, o sa bisan unsang panuigon, adunay mapait nga sangpotanan. (Proverbio 13:18) Sa laing bahin, ang pagsunod sa mga sugo sa Diyos moresulta sa “daghan nga mga adlaw ug mga tuig sa kinabuhi ug pakigdait,” usa ka makapatagbaw gayod nga kinabuhi.—Proverbio 3:2.