Modernong Kaikag Maylabot sa “mga Santos”

“Mahinumdom ka ba nga morag gilaayan na kita sa paghisgot mahitungod sa mga bayani? Kana morag wala makaapektar sa 4.2 milyones ka Amerikano nga mitan-aw sa paglubong kang Mother Teresa sa Septiyembre 13. Sukad sa iyang pagkamatay sa Septiyembre 5, gisigehag hangyo sa mga tawo ang Batikano nga siya pormal nga ideklarar nga usa ka santa. Halos tanan nagtuo nga kadto himoon.”—Sun-sentinel, Tinipong Bansa, OKTUBRE 3, 1997.

ANG makitawhanong mga buhat sa kaluoy sa Katolikong misyonarya nga si Mother Teresa giisip sa daghan nga maoy diwa sa usa ka tinuod nga santa. May giila usab nga mga bayani diha sa ubang mga relihiyon. Apan lagmit walay usa nga opisyal nga giila sama nianang gikanonisar [gideklarar nga santos] sa Romano Katolikong Simbahan.

Gikanonisar ni Papa Juan Paulo II ang kapin sa 450 ka tawo panahon sa iyang papado, mas daghan pa kay sa tanang gikanonisar sa tanang papa sa ika-20 nga siglo. a Nganong nagpadayon man ang pagsimba ug “mga santos,” nga daghan kanila halos wala gani mailhi sa mga Katoliko sa kinatibuk-an?

Ang teologo sa Notre Dame University nga si Lawrence Cunningham misaysay: “Interesado ang mga tawo bahin sa ideya sa pagkabalaan dinhi sa kalibotan. Gipakita sa mga santos nga posible ang bayanihong kinabuhi, bisan karon.” Dugang pa, gikaingon nga ang “mga santos” dunay espesyal nga paagi sa pagduol sa Diyos, nga naghimo kanila nga epektibong mga tigpataliwala alang sa mga buhi. Sa dihang dunay makaplagang mga relikyas o mga abo nga iya sa usa ka “santos”, kini simbahon sa pagtuo nga kini dunay gahom.

Ang Catechism of the Council of Trent, nga gipatik sa ika-16 nga siglo aron sa pagpalig-on sa Katolikong doktrina, mipahayag: “Kami husto sa paghinapos, nga ang pagpasidungog sa mga santos ‘nga nangamatay diha sa Ginoo,’ ang pagpangaliya sa ilang pagpataliwala, ug ang pagsimba sa ilang sagradong mga relikyas ug mga abo, dili gayod makahanaw kondili makadugang pa hinuon sa himaya sa Diyos. Ang gidak-on sa Kristohanong paglaom sa ingon niana mabuhi ug mapalig-on, ug siya madasig sa pagsundog sa ilang mga hiyas.” (The Catechism of the Council of Trent, 1905) Ang tinuod nga mga Kristohanon buot gayong magkinabuhi nga matarong, makaduol sa Diyos sa hustong paagi, ug makadawat sa iyang tabang. (Santiago 4:7, 8) Busa, sumala sa Pulong sa Diyos, kinsay mokuwalipikar ingong tinuod nga mga santos? Ug unsang papel ang ilang gidula?

[Footnote]