Kinahanglang Mahibalo Kita Kon Kinsa ang Diyos

DILI ka ba mahinam sa pagkakita ug daghag-bituon nga kalangitan sa walay panganod nga kagabhion? Dili ba makapahimuot ang alimyon sa daghag-kolor nga mga bulak? Dili ka ba malipayng maminaw sa mga honi sa kalanggaman ug sa kinanaas sa mga dahon sa huyohoy sa hangin? Ug pagkamakalingaw sa dagko kaayong mga balyena ug ubang mga linalang nga nagpuyo sa dagat! Unya anaa usab ang mga tawo nga may katakos sa konsensiya ug komplikado kaayong utok. Unsaon nimo pagpatin-aw ang paglungtad sa tanang kahibulongang mga butang sa atong palibot?

Ang uban nagtuo nga kining tanan mitungha nga sulagma. Apan kon sulagma lamang kini, ngano man nga motuo ang mga tawo sa Diyos? Ngano man nga ang dili-tinuyo nga panagsagol sa lainlaing mga kemikal mopatunghag mga linalang nga may espirituwal nga panginahanglan?

“Ang relihiyon nakagamot pag-ayo sa kinaiyahan sa tawo ug ang panginahanglan alang niini bation sa mga tawong may lainlaing kahimtang sa ekonomiya ug edukasyon.” Mao kini ang sumaryo sa panukiduki nga gipahayag ni Propesor Alister Hardy diha sa iyang librong The Spiritual Nature of Man. Ang mga eksperimento sa utok dili pa dugay nakapahinabo sa pipila ka siyentipiko sa sistema sa nerbiyos sa pag-ingon nga ang mga tawo mahimong “gidisenyo” nga may katakos sa pagsubay ug relihiyon. Ang libro nga nag-ulohang Is God the Only Reality? nag-ingon: “Ang tanang kultura sa tanang yugto sa panahon sukad sa pagtungha sa tawo . . . mangitag kahulogan sa kinabuhi pinaagig relihiyon.”

Tagda kon unsay giingon sa usa ka edukadong tawo mga 2,000 ka tuig kanhi. Siya misulat: “Ang matag balay adunay nagtukod, apan siya nga nagtukod sa tanang butang mao ang Diyos.” (Hebreohanon 3:4) Gani, ang una gayod nga bersikulo sa Bibliya nag-ingon: “Sa sinugdan gilalang sa Diyos ang mga langit ug ang yuta.”—Genesis 1:1.

Apan, kinsa man ang Diyos? Ang mga tawo lainlain ug tubag niining pangutanaha. Sa dihang gipangutana kon kinsa ang Diyos, usa ka batan-ong Hapon nga ginganlag Yoshi mitubag: “Dili ko segurado. Budhista ako, ug dili hinungdanon kanako ang paghibalo kon kinsa ang Diyos.” Apan, si Yoshi miadmitir nga si Budha gipakadiyos sa daghan. Si Nick, usa ka negosyante nga nag-edad nag mga 60 anyos, nagtuo sa Diyos ug nag-isip kaniya ingong gamhanan-sa-tanan nga puwersa. Sa dihang gihangyo sa pagpatin-aw sa iyang nahibaloan bahin sa Diyos, si Nick dugayng nakatubag, unya miingon: “Lisod kaayo kanang pangutanaha, higala. Ang ako lang ikasulti mao nga dunay Diyos. Naglungtad siya.”

 Ang ubang mga tawo “nagsimba ug nag-alagad sa kon unsay gilalang sa Diyos inay kay sa Maglalalang mismo.” (Roma 1:25, Today’s English Version) Minilyon ang nagsimba sa patayng mga katigulangan, nga nagtuong ang Diyos lisod duolon tungod kay halayo kaayo siya. Sa relihiyong Hindu, dunay daghang diyos ug mga diyosa. Ang lainlaing mga diyos, sama ni Zeus ug Hermes, gisimba panahon sa mga apostoles ni Jesu-Kristo. (Buhat 14:11, 12) Daghang relihiyon sa Kakristiyanohan nagtudlo nga ang Diyos maoy Trinidad, nga gilangkoban sa Diyos nga Amahan, Diyos nga Anak, ug Diyos nga Espiritu Santo.

Sa pagkatinuod, “adunay daghang ‘diyos’ ug daghang ‘ginoo,’” matod sa Bibliya. Apan, kini midugang: “Alang kanato sa pagkatinuod adunay usa lamang ka Diyos nga Amahan, nga gikan kaniya ang tanang butang.” (1 Corinto 8:5, 6) Oo, dunay usa lamang ka tinuod nga Diyos. Apan kinsa siya? Unsay iyang kinaiya? Hinungdanon nga atong mahibaloan ang mga tubag niining mga pangutanaha. Si Jesus mismo nag-ingon sa dihang nag-ampo ngadto sa maong Usa: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Dunay katarongan sa pagtuo nga ang atong walay-kataposang kaayohan nag-agad sa pagkahibalo sa kamatuoran bahin sa Diyos.

[Hulagway sa panid 3]

Unsay hinungdan nga naglungtad kini?

[Credit Line]

Whale: Courtesy of Tourism Queensland

 [Picture Credit Line sa panid 2]

COVER: Index Stock Photography © 2002