Ikaw ba Nagpabili sa Gugma sa Diyos?

ANG tawong si Job naghubit kanhi sa dili-hingpit nga kahimtang sa tawo niining mga pulonga: “Ang tawo, nga natawo sa usa ka babaye, mubo ug kinabuhi ug tugob sa kasamok. Sama sa usa ka bulak siya mobuswak ug pagaputlon, ug siya mokalagiw sama sa landong ug dili magadayon.” (Job 14:1, 2) Ang kinabuhi, sama sa nasinatian ni Job kanhi, maoy puno sa kasakit ug kagul-anan. Mibati ka ba nga ingon niana sukad?

Apan, bisan pa sa tanang kalisdanan ug mga problema nga mahimo natong atubangon, adunay mabatonan nga usa ka lig-ong paglaom, usa nga gibase sa pagkamabination ug gugma sa Diyos. Una sa tanan, ang atong maluluy-on nga langitnong Amahan naghatag sa halad lukat aron matubos ang katawhan gikan sa ilang alaot, makasasala nga kahimtang. Sumala sa Juan 3:16, 17, si Jesu-Kristo nag-ingon: “Gihigugma pag-ayo sa Diyos ang kalibotan [sa katawhan] nga gihatag niya ang iyang bugtong nga Anak, aron nga ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan. Kay gipadala sa Diyos ang iyang Anak [si Jesus] nganhi sa kalibotan, dili aron pagahukman niya ang kalibotan, kondili aron pagaluwason ang kalibotan pinaagi kaniya.”

Tagda usab ang malulotong tinamdan sa Diyos nganhi kanatong dili-hingpit nga mga tawo. Si apostol Pablo nagpahayag: “Iyang gihimo gikan sa usa ka tawo ang tanang nasod sa katawhan, aron magpuyo ibabaw sa tibuok nawong sa yuta, ug iyang gilatid ang tinudlong mga panahon ug ang tinong mga utlanan sa mga puloy-anan sa mga tawo, aron sila mangita sa Diyos, kon sila man ugaling mangapkap man kaniya ug makakaplag gayod kaniya, bisan ug, sa pagkatinuod, siya dili halayo gikan sa matag usa kanato.” (Buhat 17:26, 27) Hunahunaa lang kana! Bisan tuod kita dili-hingpit nga mga tawo, ato gihapong matagamtam ang personal nga relasyon uban sa atong mahigugmaong Maglalalang, si Jehova nga Diyos.

Busa, atong maatubang ang umaabot nga may kompiyansa, kay nahibalo nga ang Diyos may pagtagad kanato ug mahigugmaong naghimo ug tagana alang sa atong walay kataposang kaayohan. (1 Pedro 5:7; 2 Pedro 3:13) Nan, aduna gayod kitay daghang katarongan nga mokat-on pag dugang bahin sa atong mahigugmaong Diyos pinaagi sa pagtuon sa iyang Pulong, ang Bibliya.