1. Unsay kahulogan sa pag-abot sa Gingharian sa Diyos?

SA DIHANG gitudloan ni Jesus ang iyang mga sumusunod sa pag-ampo alang sa Gingharian sa Diyos, nahibalo siya nga ang pag-abot niini magtapos sa kaliboan ka tuig nga pagmando sa tawo nga bulag sa Diyos. Sulod nianang panahona, ang kabubut-on sa Diyos wala matuman dinhi sa yuta sa katibuk-an. (Salmo 147:19, 20) Apan human matukod ang Gingharian sa langit, ang kabubut-on sa Diyos mamatuman bisan asa. Ang panahon sa makalilisang nga kausaban gikan sa tawhanong pagmando ngadto sa pagmando sa langitnong Gingharian sa Diyos nagakahiduol na gayod.

2. Unsay magtimaan sa kausaban gikan sa pagmando sa tawo ngadto sa pagmando sa Gingharian?

² Nagtimaan niini nga kausaban mao ang yugto sa panahon nga gitawag ni Jesus nga “dakong kasakitan ingon nianang wala pa mahitabo sukad sa sinugdan sa kalibotan hangtod karon, dili, ni mahitabo pa pag-usab.”  (Mateo 24:21) Wala isulti sa Bibliya kon unsa ka dugay ang maong yugto, apan ang mga kalamidad nga mahitabo nianang panahona mas grabe pa kay sa bisan unsa nga nakita sa kalibotan sukad. Sa sinugdanan sa dakong kasakitan, dunay mahitabo nga makapatugaw gayod sa kadaghanang tawo sa yuta: ang kalaglagan sa tanang bakak nga relihiyon. Kana dili makatugaw sa mga Saksi ni Jehova, kay dugay na nilang gipaabot kini. (Pinadayag 17:1, 15-17; 18:1-24) Ang dakong kasakitan matapos sa Armagedon sa dihang ang Gingharian sa Diyos magdugmok sa tibuok Satanikong sistema.—Daniel 2:44; Pinadayag 16:14, 16.

3. Sa unsang paagi gihubit ni Jeremias ang dulnganan sa mga masinupakon?

³ Unsay kahulogan niini sa mga tawo nga “wala makaila sa Diyos ug kanilang wala mosunod sa maayong balita” bahin sa iyang langitnong Gingharian diha sa mga kamot ni Kristo? (2 Tesalonica 1:6-9) Ang tagna sa Bibliya nagtug-an kanato: “Tan-awa! Usa ka katalagman modangat sa usa ka nasod ngadto sa laing nasod, ug usa ka kusog kaayong bagyo ipatungha gikan sa kinalay-ang mga bahin sa yuta. Ug ang mga pinatay ni Jehova nianang adlawa maoy gikan gayod sa usa ka tumoy sa yuta hangtod sa laing tumoy sa yuta. Sila dili pagahilakan, ni sila pagahiposon o igalubong. Sila mahimong sama sa kinalibang sa ibabaw sa nawong sa yuta.”—Jeremias 25:32, 33.

4. Nganong makataronganon nga taposon ni Jehova kining daotang sistema?

⁴ Sa libolibo na ka tuig, si Jehova nga Diyos nagtugot sa pagkadaotan, nga may igo nang gidugayon aron makita sa matarong-ug-kasingkasing nga mga tawo nga usa ka katalagman ang pagmando sa tawo. Pananglitan, sa ika-20ng siglo lamang, kapin sa 150 ka milyong tawo ang nangamatay sa mga gubat, mga rebolusyon, ug ubang sibil nga mga kagubot, sumala sa usa ka tuboran. Ang kabangis sa tawo ilabinang nakita panahon sa Gubat sa Kalibotan II sa dihang mga 50 ka milyon ang nangamatay, nga daghan kanila ang nangamatay sa makalilisang nga paagi diha sa mga kampong konsentrasyon sa Nazi. Sama gayod sa gitagna sa Bibliya, sa atong panahon ‘ang mga tawo nga daotan ug mga impostor misamot pa kangil-ad.’ (2 Timoteo 3:1-5, 13) Karong adlawa, kaylap ang imoralidad, krimen, kapintasan, korapsiyon, ug pagtamay sa mga sukdanan sa Diyos. Busa, makataronganon gayod nga si Jehova magtapos niining daotang sistema.

5, 6. Batbata ang pagkadaotan nga naglungtad sa karaang Canaan.

⁵ Ang kahimtang karon susama nianang sa Canaan mga 3,500 ka tuig kanhi. Ang Bibliya nag-ingon: “Ang tanang butang nga dulumtanan kang Jehova nga iyang gikasilagan ilang gibuhat sa ilang mga diyos, kay bisan gani ang ilang mga anak nga lalaki ug mga babaye ilang ginasunog sa kalayo alang sa ilang mga diyos.” (Deuteronomio 12:31) Gipahibalo ni Jehova ang nasod sa Israel: “Tungod sa pagkadaotan niining mga nasora nga si Jehova nga imong Diyos nag-abog kanila gikan sa imong atubangan.” (Deuteronomio 9:5) Ang historyano sa Bibliya nga si Henry H. Halley miingon: “Ang pagsimba kang Baal, Astoreth, ug sa ubang Canaanhong mga diyos gilangkoban sa wala gayoy pagpugong nga mga pagpatuyang; ang ilang mga templo maoy mga sentro sa bisyo.”

⁶ Gipakita ni Halley kon unsa ka grabe ang ilang pagkadaotan, kay sa usa sa daghang ingon nianang mga dapit, ang mga arkeologo “nakakaplag ug daghan kaayong banga nga gisudlan ug mga bukog sa mga bata nga gihalad kang Baal.” Matod niya: “Ang tibuok dapit usa diay ka sementeryo alang sa bag-ong-natawong mga bata. . . . Ang mga Canaanhon nagsimba, pinaagi sa imoral nga pagpatuyang, ingong relihiyosong seremonyas, atubangan sa ilang mga diyos; ug unya, pinaagi sa pagpatay sa ilang mga panganay, ingong halad alang niining mao rang mga diyos. Morag, sa dakong sukod, ang yuta sa Canaan nahimong usa ka matang sa Sodoma ug Gomora sa nasodnong gilapdon. . . . Angay pa bang maglungtad ang usa ka sibilisasyon sa maong ngilngig nga kahugawan ug kaluog? . . . Ang mga arkeologo nga nagkalot sa mga kagun-oban sa mga siyudad sa Canaan nahibulong kon nganong wala dayon sila laglaga sa Diyos.”

7, 8. Sa unsang paagi hinloan sa Diyos kining yutaa?

⁷ Maingon nga gihinloan sa Diyos ang Canaan, sa dili madugay hinloan niya ang tibuok yuta ug ihatag kini niadtong nagbuhat sa iyang kabubut-on.  “Ang mga matul-id mao ang magapuyo sa yuta, ug ang walay-ikasaway mao ang magpabilin niana. Kon mahitungod sa mga daotan, sila pagaputlon gikan sa yuta.” (Proverbio 2:21, 22) Ug ang salmista nag-ingon: “Sa dili na madugay, ug ang daotan mawala na . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.” (Salmo 37:10, 11) Kuhaon usab si Satanas, aron nga “dili na niya mapahisalaag pa ang kanasoran hangtod nga matapos ang usa ka libo ka tuig.” (Pinadayag 20:1-3) Oo, “ang kalibotan nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17.

⁸ Nagsumaryo sa maanindot nga paglaom alang niadtong buot mabuhi sa walay kataposan sa yuta, si Jesus miingon: “Malipayon ang mga malumog-buot, sanglit magapanunod sila sa yuta.” (Mateo 5:5) Lagmit naghisgot siya sa Salmo 37:29, nga nagtagna: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” Nahibalo si Jesus nga katuyoan ni Jehova nga dunay matarong ug kasingkasing nga mga tawo nga mopuyo sa paraiso sa yuta sa walay kataposan. Si Jehova nag-ingon: “Ako ang nagbuhat sa yuta, sa katawhan ug sa mga mananap nga anaa sa nawong sa yuta pinaagi sa akong dakong gahom . . . , ug ako naghatag niini kaniya nga maayo sa akong mga mata.”—Jeremias 27:5.

9. Unsang matanga sa kalibotan ang ipatungha sa Gingharian sa Diyos?

⁹ Human sa Armagedon, ang Gingharian sa Diyos magpatunghag usa ka kahibulongang “bag-ong yuta” nga niana “magapuyo ang pagkamatarong.” (2 Pedro 3:13) Pagkadakong kahupayan unya kana alang sa mga makalabang-buhi sa Armagedon nga mawagtang kining madaogdaogong daotang sistema sa mga butang! Pagkamalipayon unya nila nga mosulod sa matarong bag-ong kalibotan ilalom sa langitnong Ginghariang kagamhanan, uban ang kahibulongang mga panalangin ug walay-kataposang kinabuhi sa unahan!—Pinadayag 7:9-17.

10. Unsang daotang mga butang ang dili na maglungtad ilalom sa pagmando sa Gingharian?

¹⁰ Ang gubat, krimen, gutom, o bisan ang manunukob nga mga mananap dili na unya magpameligro sa mga tawo. “Maghimo ako ug usa ka pakigsaad sa pakigdait uban [sa akong katawhan], ug wagtangon ko ang makadaot nga mapintas nga mananap gikan sa yuta . . . Ug ang kahoy sa kapatagan magahatag sa iyang bunga, ug ang yuta magahatag sa iyang abot, ug sila magapuyo sa ilang yuta diha sa kasegurohan.” “Ug ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Dili sila mobakyaw sa espada, nasod batok sa nasod, ni makakat-on pa sila sa gubat. Ug sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.”—Ezequiel 34:25-28; Miqueas 4:3, 4.

11. Nganong makasalig kita nga mawala na ang pisikal nga mga balatian?

¹¹ Ang sakit, kaguol, ug bisan ang kamatayon mahanaw na. “Walay pumoluyo nga moingon: ‘Ako masakiton.’ Ang katawhan nga magpuyo sa yuta mao kadtong mga gipasaylo sa ilang kasaypanan.” (Isaias 33:24) ‘Pahiran [sa Diyos] ang matag luha sa ilang mga mata, ug wala na unyay kamatayon, ni pagbangotan ni pagtiyabaw ni may kasakit pa. Ang kanhing mga butang nahanaw na. . . . “Tan-awa! Ginabag-o ko ang tanang butang.”’ (Pinadayag 21:4, 5) Sa dinhi pa siya sa yuta, gipasundayag ni Jesus ang iyang katakos sa paghimo nianang mga butanga pinaagi sa gahom nga gihatag sa Diyos kaniya. Pinaagi sa pagpaluyo sa balaang espiritu, giadto ni Jesus ang lainlaing dapit nga nagpalakaw sa mga  bakol ug nag-ayo sa mga masakiton.—Mateo 15:30, 31.

12. Unsay paglaom sa mga patay?

¹² Labaw pa gani ang gibuhat ni Jesus. Nagbanhaw siya ug mga patay. Unsay reaksiyon sa ubos nga mga tawo? Sa dihang gibanhaw niya ang 12-anyos nga dalagita, ang iyang mga ginikanan ‘mibatig hilabihang kalipay.’ (Marcos 5:42) Kini maoy laing pananglitan sa himoon ni Jesus sa tibuok yuta ilalom sa pagmando sa Gingharian, kay nianang panahona “aduna unyay pagkabanhaw sa mga matarong ug sa mga dili-matarong.” (Buhat 24:15) Handurawa ang kadako sa kalipay sa dihang sunodsunod nga pundok sa mga patay ang mabuhi ug mahiusa uban sa ilang mga minahal! Sa walay duhaduha aduna unyay dakong edukasyonal nga buluhaton ilalom sa pagmando sa Gingharian aron nga “ang yuta mapuno sa kahibalo kang Jehova ingon sa katubigan nga nagtabon sa dagat mismo.”—Isaias 11:9.

13. Sa unsang paagi ikapakita ang pagkamatarong sa pagmando sa Diyos?

¹³ Sa kataposan sa usa ka libo ka tuig nga pagmando sa Gingharian, ang tawhanong pamilya mapasig-uli sa kahingpitan sa hunahuna ug sa lawas. Ang yuta mahimong usa ka tibuok-yutang hardin sa Eden, usa ka paraiso. Ang pakigdait, kalipay, kasegurohan, ug usa ka mahigugmaon nga tawhanong katilingban makab-ot na unya. Wala pay nakita nga sama niini sukad sa tawhanong kasaysayan sa wala pa ang pagmando sa Gingharian. Pagkadakong kalainan ang mapasundayag unya tali sa miaging libolibo ka tuig sa alaot nga pagmando sa mga tawo ug sa maanindot nga pagmando sa langitnong Gingharian sa Diyos sa usa ka libo ka tuig! Ang pagmando sa Diyos pinaagi sa iyang Gingharian mapakita na nga labaw gayod sa tanang bahin. Ang katungod sa Diyos sa pagmando, iyang pagkasoberano, bug-os nga mabindikar.

14. Unsay mahitabo sa mga rebelde sa dihang matapos na ang usa ka libo ka tuig?

¹⁴ Sa kataposan sa usa ka libo ka tuig, tugotan ni Jehova ang hingpit nga mga tawo sa paggamit sa ilang kagawasan sa pagpili kon kinsay buot nilang alagaran. Gipakita sa Bibliya nga si “Satanas buhian gikan sa iyang bilanggoan.” Mosulay na usab siya sa pagpahisalaag sa mga tawo, nga ang uban kanila mopili nga mobulag sa Diyos. Aron mapugngan nga ‘mahitabo pag-usab ang kagul-anan,’ laglagon ni Jehova si Satanas, iyang mga demonyo, ug ang tanang morebelde sa pagkasoberano ni Jehova. Walay makatutol nga ang mga tawo nga laglagon sa walay kataposan nianang panahona wala kahatagig kahigayonan o nga ang ilang sayop nga dalan maoy tungod sa pagkadili-hingpit. Wala, sila mahisama sa hingpit nga si Adan ug Eva, kinsa kinabubut-ong mipili nga morebelde sa matarong nga pagmando ni Jehova.—Pinadayag 20:7-10; Nahum 1:9.

15. Unsa unyay relasyon nga mabatonan sa mga maunongon kang Jehova?

¹⁵ Sa laing bahin, lagmit ang kadaghanan sa mga tawo mopili sa pagbayaw sa pagkasoberano ni Jehova. Nga ang tanang rebelde nalaglag na, ang mga matarong mobarog atubangan ni Jehova, sanglit nakalabang na sa kataposang pagsulay sa pagkamaunongon. Kining maong mga maunongon dawaton unya ni Jehova ingong iyang mga anak nga lalaki ug mga anak nga babaye. Busa mahibalik sila sa relasyon nga nabatonan ni Adan ug Eva uban sa Diyos sa wala pa sila morebelde. Busa, ang Roma 8:21 matuman na unya: “Ang kalalangan mismo [katawhan] usab igapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” Si manalagnang Isaias nagtagna: “Lamyon gayod [sa Diyos] ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”—Isaias 25:8.

16. Nganong angay nga maglaom sa ganti nga kinabuhing walay kataposan?

¹⁶ Pagkakahibulongang palaaboton ang naghulat sa mga matinumanon, ang pagkahibalo nga ipaabot sa Diyos kanila ang abundang espirituwal ug materyal nga mga kaayohan hangtod sa hangtod! Ang salmista hustong nag-ingon: “Imong ginabukhad ang imong kamot ug ginatagbaw ang [hustong] tinguha sa tanang buhing butang.” (Salmo 145:16) Gidasig ni Jehova kadtong sakop  sa yutan-ong matang nga huptan kining paglaom sa kinabuhi sa Paraiso ingong bahin sa ilang pagtuo kaniya. Bisan tuod ang isyu sa pagkasoberano ni Jehova labi pang hinungdanon, wala niya hangyoa ang mga tawo nga moalagad kaniya nga walay paaboton nga ganti. Sa tibuok Bibliya, ang pagkamaunongon sa Diyos ug ang paglaom sa kinabuhing dayon kanunayng magkauban ingong hinungdanong mga bahin sa pagtuo sa usa ka Kristohanon sa Diyos. “Siya nga nagaduol sa Diyos kinahanglang motuo nga siya mao ug nga siya maoy tigganti sa mga matinuorong nagapangita kaniya.”—Hebreohanon 11:6.

17. Sa unsang paagi gipakita ni Jesus nga angayng mapalig-on kita sa atong paglaom?

¹⁷ Si Jesus nag-ingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Dinhi gilangkit niya ang pagkahibalo bahin sa Diyos ug sa iyang mga katuyoan sa ganti nga pagadad-on niini. Ingong pananglitan, sa dihang ang usa ka mamumuhat ug daotan mihangyo nga hinumdoman inig-abot ni Jesus sa iyang Gingharian, si Jesus miingon: “Ikaw mahiuban kanako sa Paraiso.” (Lucas 23:43) Wala niya ingna ang maong tawo nga batonan ang pagtuo bisan pag dili siya makadawat ug ganti. Siya nahibalo nga buot ni Jehova nga mabatonan sa iyang mga alagad ang paglaom sa kinabuhing walay kataposan sa paraisong yuta sa pagtabang sa pagpalig-on kanila samtang nag-atubang sila sa lainlaing mga pagsulay niining kalibotana. Busa, ang paglantaw sa ganti maoy hinungdanong tabang sa paglahutay ingong usa ka Kristohanon.

18, 19. Unsay mahitabo sa Hari ug sa Gingharian sa kataposan sa Milenyal nga Pagmando?

¹⁸ Sanglit ang Gingharian maoy suplemento nga kagamhanan nga gigamit ni Jehova aron hingpiton ug ipasig-uli kaniya ang yuta ug ang tawhanong mga molupyo niini, unsay papel sa Hari nga si Jesu-Kristo ug sa 144,000 ka hari ug mga saserdote human sa Milenyo? “Unya, ang kataposan, sa dihang itugyan na niya ang gingharian ngadto sa iyang Diyos ug Amahan, sa dihang iya nang mawagtang ang tanang kagamhanan ug tanang awtoridad ug gahom. Kay kinahanglan siyang magmando ingong hari hangtod mabutang sa Diyos ang tanang kaaway ilalom sa iyang mga tiil.”—1 Corinto 15:24, 25.

¹⁹ Sa dihang itugyan ni Kristo ang Gingharian ngadto sa Diyos, sa unsang paagi sabton ang mga kasulatan nga naghisgot niana ingong molungtad sa walay kataposan? Ang mga kalamposan sa Gingharian magpadayon sa walay kataposan. Si Kristo pagapasidunggan sa walay kataposan tungod sa iyang papel sa pagpaningkamot aron mabindikar ang pagkasoberano sa Diyos. Apan sanglit ang sala ug kamatayon bug-os nang nawagtang nianang tungora, ug ang katawhan nalukat na, natapos niini ang panginahanglan kaniya ingong Manunubos. Ang Milenyal nga Pagmando sa Gingharian bug-os na usab nga napalampos; busa dili na kinahanglan ang usa ka suplemento nga kagamhanan nga magpabilin tali kang Jehova ug sa masinugtanong katawhan. Sa ingon, “ang Diyos mahimong tanang butang ngadto sa tanan.”—1 Corinto 15:28.

20. Sa unsang paagi mahibaloan nato kon unsay anaa sa umaabot alang kang Kristo ug sa 144,000?

²⁰ Unsay umaabot nga papel ni Kristo ug sa iyang kaubang mga magmamando human matapos ang Milenyal nga Pagmando? Walay gisulti ang Bibliya. Apan, makaseguro kita nga si Jehova maghatag kanila ug daghan pang mga pribilehiyo sa pag-alagad sa tibuok niyang kalalangan. Hinaot kitang tanan karon magbayaw sa pagkasoberano ni Jehova ug hatagan ug kinabuhing dayon, aron nga sa umaabot, kita buhi unya aron mahibaloan kon unsay katuyoan ni Jehova alang sa Hari ug sa iyang kaubang mga hari ug mga saserdote, maingon man sa iyang tibuok kahibulongan nga uniberso!