Angay ba Nimong Susihon ang Ubang mga Relihiyon?

“NAGTAMBONGAN ako sa Kristohanong mga tigom sa halos usa na ka tuig, ug nalipay kong mosulti sa uban bahin sa Gingharian sa Diyos,” matod pa ni Miguel, kinsa usa na karon sa mga Saksi ni Jehova sa Amerika del Sur. “Dayon nagsugod ako sa pagpaminaw sa relihiyosong mga programa sa radyo ug pagtan-aw ug relihiyosong mga magwawali diha sa telebisyon. Naghunahuna ko nga ang maong mga programa makatabang nako nga mas makasabot sa mga tawo sa ubang mga relihiyon. Nahibalo ko nga ang ilang mga pagtulon-an dili uyon sa Bibliya, apan maukit-ukiton ako.”

Sa mao gihapong dapit, si Jorge masiboton sa pagtudlo sa uban bahin sa matuod nga pagsimba. Apan, sa usa ka punto, siya usab nagsugod sa pagpaminaw sa relihiyosong mga programa sa radyo ug telebisyon. “Kinahanglang mahibalo ka kon unsay hunahuna sa uban,” maoy naandan niyang isulti sa una. Sa dihang sultihan bahin sa posibleng mga kapeligrohan sa maong pagkaladlad sa bakak nga mga tinuohan, siya motubag: “Walay makadaot sa pagtuo sa usa nga nahibalo sa kamatuoran sa Bibliya.” Kining maong mga kasinatian mopatungha ug usa ka hinungdanong pangutana, Maalamon bang maminaw sa kon unsay gituohan sa uban?

Pag-ila sa Matuod nga Kristiyanidad

Human mamatay ang mga apostoles, ang matuod nga pagsimba nahugawan sa progresibong kaugmaran sa daghang matang sa mini nga Kristiyanidad. Kay gipanan-awng daan kini, si Jesus nagbutyag sa usa ka paagi aron mailhan kining mini nga mga matang sa Kristiyanidad gikan sa matuod nga Kristiyanidad. Una, siya nagpasidaan: “Pagbantay sa bakak nga mga propeta nga manganha kaninyo sa sapot karnero, apan sa sulod sila maoy manunukob nga mga lobo.” Dayon siya midugang: “Pinaagi sa ilang mga bunga mailhan ninyo sila.” (Mateo 7:15-23) Ang matuod nga mga sumusunod ni Jesus nagbuhat sa kon unsay iyang gitudlo, ug dali silang mailhan tungod sa ilang maayong mga bunga. Sama sa gibuhat mismo ni Jesus, sila nagduaw sa mga tawo sa pagsaysay sa Gingharian  sa Diyos gikan sa Kasulatan. Sa pagsundog sa panig-ingnan ni Jesus, sila nagpahilayo gikan sa politika ug sa katilingbanong mga panagbangi sa kalibotan. Sila nagdawat sa Bibliya ingong Pulong sa Diyos ug nagtahod niini isip ang kamatuoran. Sila nagpaila sa ngalan sa Diyos. Ug sanglit sila naningkamot sa pagpadapat sa gugma nga gitudlo sa Diyos, sila dili makigbahin sa mga gubat. Hinunoa, sila nagtratar sa usag usa ingong igsoon.—Lucas 4:43; 10:1-9; Juan 13:34, 35; 17:16, 17, 26.

Sumala sa Kasulatan, posible nga “makakita sa kalainan tali sa usa nga matarong ug sa usa nga daotan, tali sa usa nga nagaalagad sa Diyos ug sa usa nga wala mag-alagad kaniya.” (Malaquias 3:18) Ang matuod nga mga magsisimba karon nahiusa sa hunahuna ug sa buhat, sama sa mga Kristohanon sa unang siglo. (Efeso 4:4-6) Sa dihang imo nang mailhan ang maong grupo sa tinuod nga mga Kristohanon, ngano mang mangusyoso o magmaukiton ka pa bahin sa mga tinuohan sa uban?

Pagbantay sa Bakak nga mga Magtutudlo

Giila sa Bibliya nga bisan human makakat-on sa kamatuoran sa Bibliya, dunay kapeligrohan nga mahugawan sa espirituwal gumikan sa bakak nga mga pagtulon-an. Si apostol Pablo nagpasidaan: “Pagbantay kamo: basin ug adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.” (Colosas 2:8) Pagkatin-aw sa hulagway nga gilarawan niining tekstoha! Samag mga hayop nga gustong modagit ug motukob kanimo, ang bakak nga mga magtutudlo makahatag ug tinuod nga kapeligrohan.

Tinuod, si Pablo naghatag ug pagtagad sa kon unsay gituohan sa uban. Kas-a iyang gisugdan ang usa ka pakigpulong pinaagi sa pag-ingon: “Mga tawong taga-Atenas, akong nakita nga sa tanang butang kamo daw mas mahadlokon sa mga bathala kay sa uban. Pananglitan, samtang ako miagi ug naniid pag-ayo sa mga butang nga inyong masimbahong-gitamod akong nakaplagan usab ang usa ka halaran nga diha niini gikakudlit ‘Alang sa usa ka Diyos nga Wala-mailhi.’” (Buhat 17:22, 23) Apan, si Pablo wala magsigeg patuhop sa iyang hunahuna sa mga pilosopiya sa Gregong mga orador.

Usa ka butang ang pagkat-on bahin sa mga sinugdanan ug mga tinuohan sa bakak nga mga relihiyon apan laing butang ang pagpatuhop niana. * Si Jehova nagtudlo ‘sa matinumanon ug maalamong ulipon’ sa pagtaganag pagtulon-an pinasikad sa iyang Pulong. (Mateo 4:4; 24:45) Si Pablo mismo misulat: “Dili kamo mahimong magaambit sa ‘lamesa ni Jehova’ ug sa lamesa sa mga demonyo. O ‘ato bang ginaaghat si Jehova sa pagpangabugho’?”—1 Corinto 10:20-22.

Ang ubang bakak nga mga magtutudlo mahimong matuod nga mga Kristohanon kanhi, apan dihay panahon nga miliso sila gikan sa kamatuoran ngadto sa sayop. (Judas 4, 11) Dili kini angayng makapakurat kanato. Human maghisgot bahin sa ‘matinumanon ug maalamong ulipon’ nga naghawas sa lawas sa dinihogang mga Kristohanon, si Jesus naghisgot bahin sa “daotan nga ulipon,” usa ka grupong nagreklamo, “nalangan ang akong agalon,” ug nagsugod sa pagbun-og sa iyang mga isigkaulipon. (Mateo 24:48, 49) Kasagaran, kining mga tawhana ug ang ilang mga sumusunod walay ilang kaugalingong tin-aw nga mga pagtulon-an; interesado lamang sila sa pagbungkag sa pagtuo sa uban. Mahitungod kanila, si apostol Juan misulat: “Kon adunay moanha kaninyo ug wala magadala niini nga pagtulon-an, ayaw gayod siya dawata sa inyong mga puluy-anan o magasulti kaniya ug pangumosta.”—2 Juan 10; 2 Corinto 11:3, 4, 13-15.

Maayong timbangtimbangon pag-ayo sa sinserong mga tawo nga nangita sa kamatuoran kon unsay ilang madungog gikan sa lainlaing mga relihiyon. Sa ngadtongadto, panalanginan sa Diyos ang matinud-anog-kasingkasing nga mga tawo nga nangita sa kamatuoran. Ang Bibliya nag-ingon bahin sa diyosnong kaalam: “Kon ikaw magapangita niini ingon sa plata, ug ingon sa tinagong mga bahandi ikaw magapadayon sa pagpangita niini, nan . . . imong makaplagan ang tinuod nga kahibalo sa Diyos.” (Proverbio 2:4, 5) Tungod kay nakaplagan na kining maong kahibalo sa Diyos pinaagi sa Bibliya ug sa Kristohanong kongregasyon ug tungod kay nakita na kon sa unsang paagi si Jehova nagapanalangin niadtong gigiyahan nianang maong kahibalo, ang matuod nga mga Kristohanon dili magpadayon sa pagpaminaw sa bakak nga relihiyosong mga pagtulon-an.—2 Timoteo 3:14.

[Footnote]