Ang Gingharian sa Diyos—Bag-ong Pagmando sa Yuta
Ang Gingharian sa Diyos—Bag-ong Pagmando sa Yuta
“Ang gingharian . . . magadugmok ug magatapos niining tanang gingharian, ug kini mobarog hangtod sa panahong walay tino.”—DANIEL 2:44.
1. Nganong makasalig kita sa Bibliya?
ANG Bibliya maoy pinadayag sa Diyos ngadto sa mga tawo. Si apostol Pablo misulat: “Sa nadawat ninyo ang pulong sa Diyos, nga inyong nadungog kanamo, inyong gidawat kini, dili ingong pulong sa mga tawo, kundili, ingon gayod sa kon unsa kini sa pagkamatuod, ingong ang pulong sa Diyos.” (1 Tesalonica 2:13) Ang Bibliya naundan sa kon unsay kinahanglan natong mahibaloan bahin sa Diyos: impormasyon bahin sa iyang personalidad, iyang mga katuyoan, ug iyang mga kinahanglanon alang kanato. Naundan kini sa kinamaayohang tambag bahin sa pamilyahanong kinabuhi ug sa adlaw-adlawng panggawi. Gidetalye niini ang mga tagna nga nangatuman sa nangagi, nagakatuman karon, ug mamatuman sa umaabot. Oo, “ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong, aron nga ang tawo sa Diyos mahimong bug-os makasarang, kompleto nga masinangkapan alang sa tanang maayong buhat.”—2 Timoteo 3:16, 17.
2. Sa unsang paagi gipasiugda ni Jesus ang tema sa Bibliya?
2 Ang labing hinungdanon diha sa Bibliya mao ang tema niini: ang pagbindikar sa pagkasoberano sa Diyos (iyang katungod sa pagmando) pinaagi sa iyang langitnong Gingharian. Gihimo kana ni Jesus nga sentro sa iyang ministeryo. “Si Jesus misugod sa pagwali ug nag-ingon: ‘Paghinulsol kamo, kay ang gingharian sa mga langit haduol na.’” (Mateo 4:17) Gipakita niya kon unsay angayng dapit niini diha sa atong kinabuhi, nga nag-awhag: “Nan, padayong pangitaa nga una ang gingharian ug ang iyang pagkamatarong.” (Mateo 6:33) Gipakita usab niya kon unsa kana ka hinungdanon pinaagi sa pagtudlo sa iyang mga sumusunod sa pag-ampo ngadto sa Diyos: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.”—Mateo 6:10.
Bag-ong Pagmando sa Yuta
3. Nganong ang Gingharian sa Diyos hinungdanon kaayo kanato?
3 Nganong ang Gingharian sa Diyos hinungdanon kaayo sa mga tawo? Tungod kay sa dili madugay kini molihok nga magbag-o sa pagmando niining yutaa sa walay kataposan. Ang tagna sa Daniel 2:44 nag-ingon: “Sa mga adlaw nianang mga haria [karon nagmando sa yuta] ang Diyos sa langit magatukod ug usa ka gingharian [usa ka kagamhanan sa langit] nga dili gayod malumpag. Ug ang maong gingharian dili igapasa ngadto sa lain nga katawhan. Kini magadugmok ug magatapos niining tanang gingharian [yutan-ong mga kagamhanan], ug kini mobarog hangtod sa panahong walay tino.” Sa dihang ang langitnong Gingharian sa Diyos bug-os na nga magmando, dili na gayod mahitabo nga ang mga tawo maoy magkontrolar sa yuta. Ang makapabahin ug dili makapatagbaw nga pagmando sa tawo mahanaw na hangtod sa hangtod.
4, 5. (a) Nganong si Jesus ang labing kuwalipikado nga mahimong Hari sa Gingharian? (b) Unsa unyay asaynment ni Jesus sa haduol nga umaabot?
4 Ang Pangulong Magmamando sa langitnong Gingharian, ilalom sa pagtultol mismo ni Jehova, mao ang labing kuwalipikado—si Kristo Jesus. Sa wala pa moanhi sa yuta, naglungtad na siya sa langit ingong “batid nga magbubuhat” sa Diyos, nga mao ang una sa tanang mga linalang sa Diyos. (Proverbio 8:22-31) “Siya mao ang larawan sa dili-makita nga Diyos, ang panganay sa tanang kalalangan; tungod kay pinaagi kaniya gilalang ang tanang ubang butang sa langit ug sa yuta.” (Colosas 1:15, 16) Ug sa dihang si Jesus gipadala sa Diyos sa yuta, gihimo niya ang kabubut-on sa Diyos sa tanang panahon. Giantos niya ang labing lisod nga mga pagsulay ug namatay nga matinumanon sa iyang Amahan.—Juan 4:34; 15:10.
5 Tungod sa iyang pagkamaunongon sa Diyos bisan hangtod sa kamatayon, si Jesus gigantihan. Gibanhaw siya sa Diyos ngadto sa langit ug gihatagan siya ug katungod nga mahimong Hari sa langitnong Gingharian. (Buhat 2:32-36) Ingong Hari sa Gingharian, si Kristo Jesus makabaton sa kahibulongang asaynment gikan sa Diyos nga mangulo sa panon sa gamhanang espiritung mga linalang sa pagwagtang sa tawhanong pagmando gikan sa yuta ug pagpapha sa tanang pagkadaotan gikan sa atong yuta. (Proverbio 2:21, 22; 2 Tesalonica 1:6-9; Pinadayag 19:11-21; 20:1-3) Unya ang langitnong Gingharian sa Diyos ilalom ni Kristo mahimong bag-ong nagamando nga awtoridad, ang bugtong kagamhanan ibabaw sa tibuok yuta.—Pinadayag 11:15.
6. Unsang matang sa pagmando ang atong madahom gikan sa Hari sa Gingharian?
6 Ang Pulong sa Diyos nag-ingon bahin sa bag-ong Magmamando sa yuta: “Kaniya dihay gihatag nga pagmando ug dignidad ug gingharian, aron ang tanang mga katawhan, nasodnong mga pundok ug mga pinulongan magaalagad gayod kaniya.” (Daniel 7:14) Tungod kay sundogon ni Jesus ang gugma sa Diyos, mahimong tugob unya ang pakigdait ug kalipay ilalom sa iyang pagmando. (Mateo 5:5; Juan 3:16; 1 Juan 4:7-10) “Sa pag-uswag sa iyang kagamhanan ug sa pakigdait walay kataposan, . . . aron kini palig-onon sa hustisya ug pagkamatarong.” (Isaias 9:7, Revised Standard Version) Pagkadakong panalangin unya nga makabaton ug Magmamando nga magmando pinaagi sa gugma, hustisya, ug pagkamatarong! Busa, ang 2 Pedro 3:13 nagtagna: “Adunay bag-ong mga langit [langitnong Gingharian sa Diyos] ug usa ka bag-ong yuta [usa ka bag-ong yutan-ong katilingban] nga atong ginapaabot sumala sa iyang saad, ug niini nila magapuyo ang pagkamatarong.”
7. Sa unsang paagi ang Mateo 24:14 nagakatuman karon?
7 Tino nga ang Gingharian sa Diyos mao ang kinamaayohang balita alang sa tanan nga nahigugma sa matarong. Mao nga, ingong bahin sa ilhanan nga kita karon nagkinabuhi na sa “kataposang mga adlaw” niining daotang sistema, si Jesus nagtagna: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (2 Timoteo 3:1-5; Mateo 24:14) Kanang maong tagna nagakatuman karon, samtang ang mga unom ka milyong Saksi ni Jehova sa 234 ka kayutaan naggugol ug kapin sa usa ka bilyong oras kada tuig sa pagpahibalo sa uban bahin sa Gingharian sa Diyos. Haom nga ang matag dapit nila sa pagsimba alang sa mga 90,000 ka kongregasyon sa tibuok kalibotan tawgon ug Kingdom Hall. Didto, ang mga tawo mangadto aron mahibalo bahin sa umaabot nga bag-ong kagamhanan.
Kaubang mga Magmamando
8, 9. (a) Asa maggikan ang kaubang mga magmamando ni Kristo? (b) Nganong makasalig kita sa pagmando sa Hari ug sa iyang kaubang mga magmamando?
8 Aduna unyay kaubang mga magmamando si Kristo Jesus sa langitnong Gingharian sa Diyos. Ang Pinadayag 14:1-4 nagtagna nga 144,000 ka tawo ang ‘paliton gikan sa katawhan’ ug banhawon ngadto sa langitnong kinabuhi. Naglakip kini sa mga lalaki ug babaye nga, inay alagaron, mapaubsanong nag-alagad sa Diyos ug sa mga isigkatawo. “Sila mahimong mga saserdote sa Diyos ug sa Kristo, ug magamando ingong mga hari uban kaniya sulod sa usa ka libo ka tuig.” (Pinadayag 20:6) Ang ilang gidaghanon mas diyutay ra kay sa “dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila” nga makalabang-buhi sa kataposan niining sistemaha. Sila usab maghatag sa Diyos ug “sagradong pag-alagad adlaw ug gabii,” apan dili langitnon ang ilang pagkatinawag. (Pinadayag 7:9, 15) Sila maoy nagporma sa uyok sa bag-ong yuta ingong mga sakop sa langitnong Gingharian sa Diyos.—Salmo 37:29; Juan 10:16.
9 Sa pagpili niadtong magmando uban kang Kristo sa langit, gipili ni Jehova ang matinumanong mga tawo nga nakasinati sa kinabuhi uban sa tanang suliran niini. Halos walay naagian sa mga tawo nga wala usab masinati niining mga hari-saserdote. Busa ang ilang kinabuhi sa yuta magpauswag sa ilang katakos nga magmando ibabaw sa mga tawo. Bisan si Jesus mismo “nakakat-on sa pagkamasinugtanon gikan sa mga butang nga iyang giantos.” (Hebreohanon 5:8) Nag-ingon si apostol Pablo bahin kaniya: “Kita adunay ingong hataas nga saserdote, dili usa nga dili makasimpatiya sa atong mga kaluyahon, apan usa nga nasulayan sa tanang paagi sama kanato, hinuon walay sala.” (Hebreohanon 4:15) Pagkamakapahupay ang pagkahibalo nga sa matarong nga bag-ong kalibotan sa Diyos, ang mga tawo pagamandoan sa mahigugmaon, mabination nga mga hari ug mga saserdote!
Bahin ba sa Katuyoan sa Diyos ang Gingharian?
10. Nganong ang Gingharian sa langit dili bahin sa orihinal nga katuyoan sa Diyos?
10 Bahin ba ang langitnong Gingharian sa orihinal nga katuyoan sa Diyos sa dihang gilalang niya si Adan ug Eva? Sa asoy sa Genesis bahin sa paglalang, wala hisgoti ang usa ka Gingharian nga magmando sa katawhan. Si Jehova mismo mao ang ilang Magmamando, ug basta magmasinugtanon sila kaniya, wala kinahanglana ang bisan unsang ubang pagmando. Ang Genesis kapitulo 1 nagpakita nga si Jehova, lagmit pinaagi sa iyang panganay nga langitnong Anak, nakiglabot kang Adan ug Eva. Ang asoy naggamit sa mga ekspresyong sama sa “ang Diyos miingon kanila” ug “miingon ang Diyos” kanila.—Genesis 1:28, 29; Juan 1:1.
11. Unsang hingpit nga sinugdanan ang naagian sa tawo?
11 Ang Bibliya nag-ingon: “Nakita sa Diyos ang tanan nga iyang gibuhat ug, tan-awa! kadto maayo kaayo.” (Genesis 1:31) Ang tanan diha sa tanaman sa Eden hingpit gayod. Si Adan ug Eva nagpuyo sa usa ka paraiso. Sila may hingpit nga hunahuna ug hingpit nga mga lawas. Sila makapakigsulti sa ilang Magbubuhat ug siya makapakigsulti kanila. Ug pinaagi sa pagpabiling matinumanon, sila manganak ug hingpit nga mga anak. Wala untay panginahanglan sa usa ka bag-ong langitnong kagamhanan.
12, 13. Sa dihang modaghan ang hingpit nga mga tawo, nganong makapakigsulti pa gihapon unta ang Diyos kanila?
12 Sa dihang modaghan ang tawhanong pamilya, sa unsang paagi makigsulti ang Diyos kanilang tanan? Tagda ang mga bituon sa langit. Sila gipundok diha sa isla nga mga uniberso nga gitawag ug mga galaksiya. Ang pipila ka galaksiya adunay usa ka bilyong bituon. Ang uban adunay mga usa ka trilyon. Ug gibanabana sa mga siyentipiko nga adunay mga 100 ka bilyong galaksiya sa makitang uniberso! Bisan pa niana, ang Maglalalang nag-ingon: “Iyahat ang inyong mga mata sa itaas ug tan-awa. Kinsay naglalang niining mga butanga? Mao ang Usa nga nagpatungha sa ilang panon nga hilabihan ka daghan, nga tanan kanila iyang ginatawag sumala gayod sa ngalan. Gumikan sa kadagaya sa dinamikong kusog, kay siya usab mabaskog sa gahom, walay usa kanila ang nawala.”—Isaias 40:26.
13 Sanglit nahibalo ang Diyos sa kahimtang niining tanang langitnong mga linalang, tino nga dili suliran para kaniya ang pagkahibalo sa kahimtang sa mas diyutay kaayong mga tawo. Bisan karon, milyonmilyon sa iyang mga alagad ang nag-ampo kaniya adlaw-adlaw. Kanang maong mga pag-ampo makaabot dayon sa Diyos. Busa ang pagpakigsulti sa tanang hingpit nga mga tawo dili unta suliran para kaniya. Dili unta siya magkinahanglan ug langitnong Gingharian nga magsusi sa ilang kahimtang. Pagkakahibulongang kahikayan—nga si Jehova maoy Magmamando, nga makaduol nga direkta kaniya, ug may palaaboton nga dili na gayod mamatay, nga mabuhing walay kataposan sa usa ka paraisong yuta!
“Dili Iya sa Tawo”
14. Nganong kanunayng kinahanglanon sa mga tawo ang pagmando ni Jehova?
14 Bisan pa niana, ang mga tawo—bisan ang hingpit nga mga tawo—magkinahanglan kanunay sa pagmando ni Jehova. Ngano man? Tungod kay wala sila lalanga ni Jehova uban ang katakos nga magmalamposon kon bulag sa iyang pagmando. Mao kana ang balaod sa katawhan, sumala sa giila ni manalagnang Jeremias: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang. Tul-ira ako, Oh Jehova.” (Jeremias 10:23, 24) Kabuangan para sa mga tawo ang paghunahuna nga sila malamposong makakontrolar sa usa ka katilingban nga dili si Jehova ang magmando kanila. Kasukwahi kini sa paagi sa pagkahimo kanila. Ang dili pagpasakop sa pagmando ni Jehova, segurado gayod nga mosangpot sa kahakog, pagdumot, kabangis, kapintasan, mga gubat, ug kamatayon. ‘Ang tawo magmando sa tawo alang sa iyang kadaotan.’—Ecclesiastes 8:9.
15. Unsay mga sangpotanan sa sayop nga pagpili nga gihimo sa atong unang mga ginikanan?
15 Ikasubo, ang atong unang mga ginikanan mihukom nga wala nila kinahanglana ang Diyos ingong ilang Magmamando, ug mipili sila sa pagkinabuhi nga bulag kaniya. Ingong resulta, wala na sila tugoti sa Diyos nga magpabiling hingpit. Sila sama na karon sa usa ka elektrikal nga kasangkapan nga naputol gikan sa tuboran niini sa koryente. Busa sa ngadtongadto, sila maluya ug mohunong—sa kamatayon. Sila nahisama sa usa ka depektosong sumbanan, ug ang maong kahimtang mao lamay ilang ikapasa sa ilang mga kaliwat. (Roma 5:12) “Ang Bato [Jehova], hingpit ang iyang kalihokan, kay ang tanan niyang dalan hustisya . . . Sila migawi sa ikadaot sa ilang bahin; sila dili iyang mga anak, ang sayop ilaha.” (Deuteronomio 32:4, 5) Tinuod, si Adan ug Eva naimpluwensiyahan sa rebelyosong espiritung linalang nga nahimong Satanas, apan diha silay hingpit nga hunahuna ug makasalikway unta sa iyang sayop nga mga sugyot.—Genesis 3:1-19; Santiago 4:7.
16. Sa unsang paagi gipamatud-an sa kasaysayan ang resulta sa pagkahimong bulag sa Diyos?
16 Ang kasaysayan daghag pamatuod sa resulta sa pagkahimong bulag sa Diyos. Sulod sa libolibong katuigan, gisulayan sa mga tawo ang tanang matang sa tawhanong kagamhanan, tanang ekonomikanhon ug katilingbanon nga sistema. Bisan pa niana, ang pagkadaotan ‘misamot pa.’ (2 Timoteo 3:13) Gipamatud-an kana sa ika-20ng siglo. Napuno kadto sa grabeng mga pagdumot ug daghan kaayong kapintasan, gubat, gutom, kakabos, ug pag-antos kay sa bisan unsang yugto sa kasaysayan. Ug bisan unsa pang pag-uswag sa medisina ang nahimo, sa madugay ug madali mangamatay ang tanan. (Ecclesiastes 9:5, 10) Pinaagi sa pagpaningkamot nga tultolan ang ilang kaugalingong mga lakang, gitugotan sa mga tawo ang ilang kaugalingon nga mahimong tukbonon ni Satanas ug sa iyang mga demonyo, mao nga ang Bibliya nagtawag kang Satanas nga “ang diyos niini nga sistema sa mga butang.”—2 Corinto 4:4.
Ang Gasa sa Kagawasan sa Pagpili
17. Sa unsang paagi gamiton ang gasa sa Diyos nga kagawasan sa pagpili?
17 Nganong tugotan man ni Jehova ang mga tawo nga magkinaugalingon? Tungod kay gilalang niya sila uban ang kahibulongang gasa sa kagawasan sa pagpili. “Kon asa gani ang espiritu ni Jehova, adunay kagawasan,” matod pa ni apostol Pablo. (2 Corinto 3:17) Walay usa nga gustong mahisamag robot, nga lain ang mohukom sa matag segundo sa adlaw kon unsay iyang isulti ug buhaton. Apan gibaoran ni Jehova ang mga tawo nga gamiton ang maong gasa sa kagawasan sa pagpili sa responsableng paagi, aron makita ang pagkamaalamon sa pagbuhat sa iyang kabubut-on ug pagpabiling magpasakop kaniya. (Galacia 5:13) Busa ang kagawasan kinahanglang dili mahimong absoluto, kay kana mosangpot sa anarkiya. Kinahanglang kontrolahon kana sulod sa mga utlanan sa maayong mga balaod sa Diyos.
18. Unsay gipasundayag sa Diyos pinaagi sa pagtugot sa tawo sa paggamit sa kagawasan sa pagpili?
18 Pinaagi sa pagtugot sa tawhanong pamilya nga magkinaugalingon, ang Diyos, sa makausa ug sa tanang panahon, nagpasundayag nga gikinahanglan nato ang iyang pagmando. Ang iyang paagi sa pagmando, iyang pagkasoberano, mao ang bugtong hustong paagi. Moresulta kini sa tugob nga kalipay, katagbawan, ug kauswagan. Tungod kini kay ang atong hunahuna ug mga lawas gidisenyo ni Jehova nga molihok sa labing ikaayo sa dihang mosubay sa iyang mga balaod. “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.” (Isaias 48:17) Ang kagawasan sa pagpili sulod sa mga utlanan sa mga balaod sa Diyos dili bug-at kondili moresulta hinuon sa makapahimuot nga kadaiyahan sa pagkaon, mga balay, arte, ug musika. Kon gamiton sa hustong paagi, ang kagawasan sa pagpili mosangpot unta sa usa ka kahibulongan, kanunayng-makalingaw nga kinabuhi sa paraisong yuta.
19. Unsang ahensiya ang gigamit sa Diyos sa pagpasig-uli sa katawhan ngadto kaniya?
19 Apan tungod sa ilang sayop nga pagpili, ang mga tawo mibulag kang Jehova, nga nahimong dili-hingpit, nagakaluya, ug himalatyon. Busa kinahanglan silang lukaton gikan nianang makapasubong kahimtang ug dad-on pagbalik ngadto sa hustong relasyon uban sa Diyos ingong iyang mga anak nga lalaki ug mga anak nga babaye. Ang ahensiya nga gipili sa Diyos sa pagpalampos niini mao ang Gingharian, ug ang Manunubos mao si Jesu-Kristo. (Juan 3:16) Pinaagi niining maong kahikayan, ang mga tawong tinuod nga mahinulsolon—sama sa mausikong anak sa ilustrasyon ni Jesus—mapasig-uli ngadto sa Diyos ug dawaton niya pagbalik ingong iyang mga anak.—Lucas 15:11-24; Roma 8:21; 2 Corinto 6:18.
20. Sa unsang paagi tumanon sa Gingharian ang katuyoan sa Diyos?
20 Segurado gayod nga ang kabubut-on ni Jehova mamatuman dinhi sa yuta. (Isaias 14:24, 27; 55:11) Pinaagi sa iyang Gingharian ilalom kang Kristo, ang Diyos bug-os nga magbindikar (magpakamatarong o magpamatuod) sa iyang katungod nga mahimong atong Soberano. Ang Gingharian magtapos sa tawhanon ug demonyohanon nga pagmando ibabaw niining yutaa, ug kini lamang ang magmando gikan sa langit sulod sa usa ka libo ka tuig. (Roma 16:20; Pinadayag 20:1-6) Apan nianang panahona, sa unsang paagi ipasundayag ang pagkalabaw sa paagi sa pagmando ni Jehova? Ug human sa usa ka libo ka tuig, unsay papel sa Gingharian? Ang sunod nga artikulo magkonsiderar niining mga pangutanaha.
Mga Punto Agig Pagsubli
• Unsa ang tema sa Bibliya?
• Kinsay maglangkob sa bag-ong pagmando sa yuta?
• Nganong ang tawhanong pagmando nga bulag sa Diyos dili gayod magmalamposon?
• Sa unsang paagi angayng gamiton ang kagawasan sa pagpili?
[Mga Pangutana sa Pagtuon]
[Hulagway sa panid 10]
Ang pagtulon-an ni Jesus nagpasiugda sa pagmando sa Diyos pinaagi sa Gingharian
[Mga hulagway sa panid 12]
Sa tanang nasod ang mga Saksi ni Jehova naghimo sa Gingharian nga ilang pangunang pagtulon-an
[Mga hulagway sa panid 14]
Ang kasaysayan nagpamatuod sa daotang mga resulta sa pagkahimong bulag sa Diyos
[Credit Lines]
Mga sundalo sa Gubat sa Kalibotan I: U.S. National Archives photo; kampong konsentrasyon: Oświęcim Museum; bata: UN PHOTO 186156/J. Isaac