Sugilanon sa Kinabuhi

Tigdalag Kahayag Ngadto sa Daghang Nasod

ANG SUGILANON NI GEORGE YOUNG SUMALA SA GIASOY NI RUTH YOUNG NICHOLSON

“Nan, ngano mang hilom ang atong mga pulpito? . . . Unsa kitang matanga sa mga tawo kon maghilom lang kita human nga atong mapamatud-ang tinuod kining mga butang nga akong gisulat? Dili nato pasagdang magpabiling walay-alamag ang mga tawo, kondili atong imantala ang kamatuoran nga maisogon ug dayag.”

KINING mga pulonga maoy bahin sa 33-panid nga sulat ni Papa nga naghangyong tangtangon ang iyang ngalan gikan sa listahan sa simbahan. Kadto maoy tuig 1913. Gikan niadtong panahona padayon, iyang gisugdan ang usa ka kinabuhi nga puno sa mga panghitabo nga mitultol kaniya sa pag-alagad ingong tigdalag kahayag ngadto sa daghang nasod. (Filipos 2:15) Sukad sa akong pagkabata, nagtigom kog mga sugilanon bahin sa mga kasinatian ni Papa gikan sa mga paryente ug gikan sa makasaysayanhong mga basahon, ug gitabangan ko sa mga higala nga makompleto ang kasaysayan sa iyang kinabuhi. Sa daghang paagi ang kinabuhi ni Papa nagpahinumdom kanako sa kinabuhi ni apostol Pablo. Sama nianang “apostol ngadto sa kanasoran,” si Papa andam kanunay nga mobiyahe aron sa paghatod sa mensahe ni Jehova ngadto sa mga tawo sa tanang yuta ug isla. (Roma 11:13; Salmo 107:1-3) Paasoya ko ninyo bahin sa akong amahan, si George Young.

Ang Unang mga Tuig

Si Papa mao ang kinamanghorang anak nga lalaki ni John ug Margaret Young, taga-Scotland nga mga Presbiteryano. Siya natawo sa Septiyembre 8, 1886, wala madugay human mamalhin ang pamilya gikan sa Edinburgh, Scotland, ngadto sa British Columbia sa kasadpang Canada. Ang iyang tulo ka magulang nga mga lalaki—si Alexander, John, ug Malcolm—nangatawo sa Scotland pipila ka tuig nga  miagi. Si Marion, ang manghod nga babaye sa managsoong lalaki, kinsa mahigugmaon nilang gitawag ug Nellie, maoy duha ka tuig nga mas manghod kang Papa.

Samtang nagdako sa umahan sa Saanich, dili halayo sa Victoria, British Columbia, ang mga bata malipayon kaayo. Sa samang higayon, sila nakakat-on sa pag-abaga sa responsabilidad. Busa sa dihang ang ilang mga ginikanan mamauli gikan sa biyahe sa Victoria, ang mga buluhaton sa gawas human na ug hapsay ang balay.

Paglabay sa panahon, si Papa ug ang iyang mga igsoong lalaki nainteres sa pagmina ug sa pagnegosyo usab ug troso. Ang managsoong Young nakaugmad ug maayong reputasyon ingong mga timber cruiser (mga lalaking mosusi ug yuta alang sa posibleng makuha nga troso) ug ingong mga tigpalit ug tigbaligyag troso. Si Papa mao ang nagdumala sa pinansiyal nga mga transaksiyon.

Sa ngadtongadto, ang hilig ni Papa sa espirituwal nga mga butang mitultol kaniya sa pagdesidir nga mahimong Presbiteryanong ministro. Apan, nianang mga panahona, ang gipatik diha sa mantalaan nga mga sermon ni Charles Taze Russell, unang presidente sa Zion’s Watch Tower Tract Society, nakaapektar ug dako sa iyang kinabuhi. Ang nakat-onan ni Papa nagpalihok kaniya sa paghimo ug pagpadala sa sulat sa iyang pagbulag sa simbahan nga gihisgotan sa sinugdanan.

Si Papa maluloton apan tin-aw nga migamit sa mga bersikulo sa Bibliya aron pamatud-ang sayop ang mga pagtulon-an sa simbahan nga ang kalag sa tawo dili mamatay ug nga ang Diyos magpaantos sa mga kalag sa tawo sa walay kataposan diha sa impiyernong kalayo. Iya usab nga giyagyag ang doktrina sa Trinidad, nga nagpamatuod nga dili Kristohanon ang gigikanan niini ug wala gayod paluyohi sa Kasulatan. Sukad niadto siya nakigbahin sa Kristohanong ministeryo ingong pagsundog kang Jesu-Kristo, nga mapaubsanong naggamit sa iyang tanang katakos ug kusog sa kahimayaan ni Jehova.

Sa 1917, ubos sa pagtultol sa Watch Tower Society, si Papa nagsugod sa pag-alagad ingong usa ka pilgrim, nga maoy pagtawag sa nagapanawng mga hawas sa mga Saksi ni Jehova niadtong panahona. Sa mga siyudad ug mga lungsod sa tibuok Canada, siya naghatag ug mga pakigpulong ug nagpasundayag sa pelikula ug programang slide nga nailhan ingong ang “Photo-Drama of Creation.” Naghuot ang mga teatro tungod sa mga pagduaw ni Papa. Ang eskedyul sa iyang mga pagduaw ingong pilgrim gipatik diha sa The Watchtower hangtod sa 1921.

Usa ka mantalaan sa Winnipeg mitaho nga si Ebanghelisador Young misulti ngadto sa 2,500 ka tawo ug nga daghan ang dili makasulod tungod kay naghuot pag-ayo ang tinukod. Sa Ottawa, siya naghisgot sa ulohang “Pag-adto ug Paggawas sa Impiyerno.” Didto usa ka tigulang nga lalaki mitaho: “Sa dihang natapos kini, gidapit ni George Young ang usa ka lumbay sa mga klerigo ngadto sa plataporma aron hisgotan ang ulohan uban kaniya, apan walay usa kanila nga milihok. Ako nahibalo nga ako nang nakaplagan ang kamatuoran.”

Gipaningkamotan ni Papa nga mapuno sa espirituwal nga kalihokan kutob sa mahimo ang iyang mga pagduaw ingong pilgrim. Pagkahuman, magdalidali siya sa pagsakay sa tren alang sa laing gieskedyul nga pagduaw. Sa dihang mobiyahe pinaagig kotse, siya kasagarang mopadulong na sa iyang sunod asaynment nga sayo kaayo una pa ang tingpamahaw. Gawas pa sa pagkamasiboton, si Papa may reputasyon ingong mahunahunaong tawo ug naila tungod sa iyang Kristohanong mga binuhatan ug pagkamahinatagon.

 Lakip sa daghan sa unang mga kombensiyon nga iyang gitambongan, ang ilabinang halandomon mao ang usa nga gihimo sa Edmonton, Alberta, sa 1918. Tanan sa iyang pamilya didto niadtong higayona alang sa bawtismo ni Nellie. Mao usab kadto ang kataposang higayon nga nagkauban ang mga lalaki. Duha ka tuig sa ulahi, si Malcolm namatay tungod sa pulmonya. Sama sa iyang tulo ka igsoong lalaki ug sa iyang amahan, si Malcolm may paglaom sa langitnong kinabuhi, ug silang tanan nagpabiling matinumanon sa Diyos hangtod sa ilang kamatayon.—Filipos 3:14.

Miadto sa Langyawng mga Teritoryo

Human nga matapos ni Papa ang panaw sa pagsangyaw sa Canada niadtong Septiyembre 1921, gisugo siya ni Joseph F. Rutherford, nga maoy presidente niadtong tungora sa Watch Tower Society, sa pag-adto sa mga isla sa Caribbean. Sa tanang dapit nga gipasundayag ni Papa ang “Photo-Drama of Creation,” kini gidawat pag-ayo. Gikan sa Trinidad, siya misulat: “Puno ang lugar, ug daghan kaayo ang wala na pasudla. Sa ikaduhang gabii ang tinukod nagpunsisok sa mga tawo.”

Dayon, sa 1923, si Papa giasayn sa Brazil. Nagpakigpulong siya didto sa dagkong mga grupo sa mga mamiminaw, nga usahay naggamit ug sinuholang mga tighubad. Ang The Watchtower sa Disyembre 15, 1923, mitaho: “Gikan sa Hunyo 1 hangtod sa Septiyembre 30 si Brader Young nakahimog 21 ka miting publiko, nga may bug-os nga gidaghanon sa nanambong nga 3,600; 48 ka grupo sa panagkatigom, nga may nanambong nga 1,100; nag-apod-apod ug libreng literatura nga Portuges nga may gidaghanong 5,000 ka kopya.” Daghan ang interesadong misanong sa dihang gihatag ni Papa ang pakigpulong nga “Minilyon Karon nga Buhi Dili na Gayod Mamatay.”

Sa dihang gipahinungod ang bag-ong mga pasilidad sa Brazil sa Marso 8, 1997, ang brosyur alang sa pahinungod nagtaho: “1923: Si George Young miabot sa Brazil. Siya nag-organisar ug sangang buhatan diha sa sentro sa Rio de Janeiro.” Bisan tuod ang literatura sa Bibliya mabatonan sa Kinatsila, dihay panginahanglan usab niini sa Portuges, ang pangunang pinulongan sa Brazil. Busa, sa Oktubre 1, 1923, ang The Watchtower gisugdan sa pagpatik sa Portuges.

Daghag nakaila si Papa didto sa Brazil nga dili niya makalimtan. Ang usa mao ang adunahang tawo nga ginganlag Jacintho Pimentel Cabral, kinsa mitanyag sa iyang balay alang sa mga tigom. Wala madugay si Jacintho midawat sa kamatuoran sa Bibliya ug sa ulahi nahimong membro sa kawani sa sangang buhatan. Ang lain mao si Manuel da Silva Jordão, usa ka batan-ong Portuges nga hardinero. Nakadungog siya sa pakigpulong publiko ni Papa nga nagpalihok kaniya sa pagbalik sa Portugal aron sa pag-alagad ingong colporteur, nga maoy pagtawag niadtong panahona sa bug-os-panahong mga ministro sa mga Saksi ni Jehova.

Si Papa nagsigeg biyahe sa tibuok Brazil pinaagig tren, ug siya nakakaplag ug mga interesado. Sa usa sa iyang mga biyahe, iyang nahimamat si Bony ug Catarina Green, ug miestar siya uban kanila sulod sa mga duha ka semana, nga nagpatin-aw sa Kasulatan ngadto kanila. Mga pito ka membro sa pamilya niadtong tungora ang nagpasimbolo sa ilang pahinungod kang Jehova pinaagi sa pagpabawtismo sa tubig.

Ang laing nakaila mao si Sarah Bellona Ferguson sa 1923. Sa 1867 sa batan-on pa, siya, lakip sa iyang igsoong lalaki nga si Erasmus Fulton Smith ug ang uban sa ilang pamilya, milalin sa Brazil gikan sa Tinipong Bansa. Sukad sa 1899 siya regular nga nagdawat sa magasing Watchtower pinaagig koreyo. Ang pagduaw ni Papa mao ang dugay nang gipaabot nga kahigayonan alang kang Sarah, sa iyang upat ka anak, ug sa usa nga gitawag ni Papa ug Tiya Sallie nga mabawtismohan. Kadto maoy Marso 11, 1924.

Wala magdugay, si Papa nagsangyaw diha sa ubang mga nasod sa Amerika del Sur. Sa Nobyembre 8, 1924, siya misulat gikan sa Peru: “Bag-o pa kong nakatapos sa pag-apod-apod ug 17,000 ka tract didto sa Lima ug Callao.” Siya sunod nga miadto sa Bolivia sa pag-apod-apod ug mga tract didto. Mahitungod sa maong pagduaw, siya misulat: “Gipanalanginan sa atong Amahan ang buluhaton. Usa ka Indian ang mitabang nako. Ang iyang balay anaa sa tinubdan sa Amazon. Magdala siyag 1,000 ka tract ug pipila ka libro sa iyang pagpauli.”

Pinaagi sa mga paningkamot ni Papa, ang mga binhi sa kamatuoran sa Bibliya nasabwag sa daghang nasod sa Amerika del Sur ug Sentral Amerika. Ang Disyembre 1, 1924, nga Watchtower nagtaho: “Si George Young atua didto karon sa Amerika del Sur kapin na sa duha ka tuig. . . . Usa ka pribilehiyo niining minahal nga igsoon ang pagdala sa mensahe sa kamatuoran ngadto sa Punta Arenas, sa Straits of Magellan.” Gipangunahan usab ni Papa ang buluhatong pagsangyaw sa mga nasod sama sa Costa  Rica, Panama, ug Venezuela. Siya nagpadayon bisan pag natakboyan ug malarya ug naapektohan ang iyang panglawas.

Sunod Mao ang Uropa

Sa Marso 1925, si Papa milawig paingon sa Uropa, diin siya naglaom sa pag-apod-apod ug 300,000 ka tract sa Bibliya sa Espanya ug Portugal ug sa paghikay aron si Brader Rutherford makahatag ug mga pakigpulong publiko. Apan, human moabot sa Espanya, si Papa nagpahayag ug mga panagana bahin sa paghatag ug mga pakigpulong ni Brader Rutherford tungod sa atmospera sa relihiyosong pagkadili-matugoton.

Sa pagtubag, si Brader Rutherford misulat, nga nagkutlo sa Isaias 51:16: “Gibutang ko ang akong mga pulong sa imong baba, ug gitabonan ko ikaw sa landong sa akong kamot, aron mapahimutang ko ang mga langit, ug mapahiluna ang mga patukoranan sa yuta, ug nagaingon sa Sion, Ikaw mao ang akong katawhan.” (King James Version) Niana, si Papa mihinapos: “Seguradong kabubut-on sa Ginoo nga akong himoon kini ug itugyan kaniya ang mga resulta.”

Sa Mayo 10, 1925, si Brader Rutherford mihatag sa iyang pakigpulong pinaagi sa usa ka tighubad didto sa Novedades Theater sa Barcelona. Kapin sa 2,000 ang nanambong, lakip ang usa ka opisyal sa kagamhanan ug usa ka guwardiya diha sa entablado. Susamang paagi ang gisunod sa Madrid, nga may 1,200 nga nanambong. Ang interes nga gipakita tungod niining maong mga pakigpulong miresulta sa pagtukod sa sangang buhatan sa Espanya nga gihimo, sumala sa giingon sa 1978 Yearbook of Jehovah’s Witnesses, “ubos sa paggiya ni George Young.”

Sa Mayo 13, 1925, si Brader Rutherford nagpakigpulong sa Lisbon, Portugal. Ang iyang pagduaw didto malamposon usab kaayo, bisan pa sa mga paningkamot sa klero sa pagbungkag sa miting pinaagi sa pagsinggit ug pagguba sa mga lingkoranan. Human sa mga pakigpulong ni Brader Rutherford sa Espanya ug Portugal, padayon nga gipasundayag ni Papa ang “Photo-Drama,” ug siya mihikay usab nga ang literatura sa Bibliya mapatik ug maapod-apod niadtong mga dapita. Sa 1927 siya mitaho nga ang maayong balita “namantala na sa tanang bahin sa matag siyudad ug lungsod sa Espanya.”

Pagsangyaw Didto sa Unyon Sobyet

Ang sunod nga misyonaryong asaynment ni Papa mao ang Unyon Sobyet, diin siya miabot sa Agosto 28, 1928. Ang sulat nga iyang gisulat, pinetsahan ug Oktubre 10, 1928, sa bahin mabasa:

 “Sukad miabot sa Rusya, ako makaampo gayod, nga ‘Moanhi unta ang imong gingharian’ sa kinasingkasing. Nakakat-on na akog diyutay sa pinulongan, apan hinay. Ang akong tighubad maoy usa ka talagsaon kaayong tawo, usa ka Hudiyo, apan may pagtuo siya kang Kristo ug nahigugma sa Bibliya. Ako dunay pipila ka makaiikag nga mga kasinatian apan wala mahibalo kon unsa ka dugay ako tugotang magpabilin. Sa miaging semana nakadawat kog pahibalo nga kinahanglan kong mohawa sulod sa 24 oras apan nasulbad ra ang maong butang mao nga makapabilin pa akog dugaydugay.”

Dihay gihimong pagkontak sa pipila ka Estudyante sa Bibliya sa Kharkov, karon usa na ka dakong siyudad sa Ukraine, ug ang miresulta nga mainitong pagkitaay nakapalugmaw ug mga luha sa kalipay sa ilang mga mata. Usa ka gamayng kombensiyon ang gihimo matag gabii hangtod sa tungang gabii. Sa pagsulat sa ulahi bahin niining tigoma uban sa mga igsoon, si Papa miingon: “Makaluluoy nga mga igsoon, giilog ang ilang pipila ka libro ug ang mga awtoridad dili mahigalaon, apan sila malipayon.”

Ang ministeryo ni Papa sa Unyon Sobyet gihatagag pagtagad diha sa usa ka linaing brosyur nga gitagana alang niadtong mitambong sa Hunyo 21, 1997, nga pagpahinungod sa bag-ong mga pasilidad sa sanga sa St. Petersburg, Rusya. Ang brosyur nag-ingon nga si Papa gipadala sa Moscow, ug kini nagtaho nga siya mikuhag permiso “sa paghimog 15,000 ka kopya sa pulyetong Freedom for the Peoples ug Where Are the Dead? aron iapod-apod sa Rusya.”

Human mopauli gikan sa Rusya, si Papa giasayn sa buluhaton sa pilgrim sa Tinipong Bansa. Sa South Dakota siya miduaw sa balay ni Nellena ug Verda Pool, managsoon sa unod nga mga tuig sa ulahi nahimong mga misyonaryo sa Peru. Sila mipahayag ug mabinationg apresasyon sa daw walay kakapoy nga ministeryo ni Papa ug miingon: “Ang mga igsoon niadtong karaang mga panahon aduna gayoy espiritu sa pagpayunir sa dihang mangadto sila niadtong langyawng mga dapit nga wala kaayoy kabtangan niining kalibotana apan may kasingkasing nga puno sa gugma kang Jehova. Mao kana ang nagpalihok kanila nga mapalampos ang ilang gihimo.”

Kaminyoon ug Ikaduhang Panaw

Sa daghang katuigan si Papa nakigsinulatay kang Clara Hubbert sa Manitoulin Island, Ontario. Parehas silang nakatambong sa kombensiyon sa Columbus, Ohio, sa Hulyo 26, 1931, sa dihang gidawat sa mga Estudyante sa Bibliya ang ngalang mga Saksi ni Jehova. (Isaias 43:10-12) Usa ka semana sa ulahi sila gikasal. Wala madugay, si Papa milakaw na usab, sa iyang ikaduhang misyonaryong panaw latas sa mga isla sa Caribbean. Didto, siya nagtabang sa pag-organisar sa mga tigom ug sa pagbansay sa uban diha sa balay-balay nga ministeryo.

Si Mama makadawat ug mga hulagway, mga  kard, ug mga sulat gikan sa Suriname, St. Kitts, ug daghang ubang dapit. Ang mga sulat nagtaho sa kauswagan sa buluhatong pagsangyaw ug usahay maglakip ug mga impormasyon bahin sa mga langgam, mga hayop, ug mga tanom sa partikular nga nasod nga iyang naadtoan. Sa Hunyo 1932, natapos ni Papa ang iyang asaynment sa Caribbean ug, nagbiyahe pinaagi sa pagpalit ug kinabaratohang tiket sama sa naandan, siya mibalik sa Canada. Human niadto, siya ug si Mama duyog nga nakigbahin sa bug-os-panahong buluhaton sa pagsangyaw, nga gigugol ang tingtugnaw sa 1932/33 diha sa dapit sa Ottawa uban sa dakong grupo sa ubang bug-os-panahong mga ministro.

Usa ka Mubong Pamilyahanong Kinabuhi

Sa 1934 ang akong igsoong lalaki, si David, natawo. Sa bata pa siya, magbarog siya sa kahon nga butanganag kalo ni Mama ug mag-ensayo sa paghatag sa iyang “mga pakigpulong.” Sa tibuok niyang kinabuhi, siya nagpakitag kasibot alang kang Jehova sama sa iyang amahan. Silang tulo nagbiyahe sakay sa kotse, nga may kahimanan sa sound nga nahigot sa atop, samtang nagduaw sila sa mga kongregasyon gikan sa sidlakang baybayon sa Canada ngadto sa kasadpang baybayon. Natawo ako sa 1938 samtang si Papa nag-alagad sa British Columbia. Si David nahinumdom nga gibutang ako ni Papa sa kama ug si Papa, Mama, ug David nagluhod palibot niini samtang si Papa nag-ampo sa pagpasalamat alang kanako.

Sa tingtugnaw sa 1939, nagpuyo kami sa Vancouver samtang si Papa nagduaw sa mga kongregasyon nianang dapita. Lakip sa daghang sulat nga among nakolekta latas sa katuigan mao ang usa nga pinetsahan ug Enero 14, 1939, nga gisulat sa dihang didto pa siya sa Vernon, British Columbia. Gisulat kini ni Papa ngadto kang Clara, David, ug Ruth, nga nag-ingon: “Gamayng halok ug halog lamang.” Sa sulod niini mao ang mensahe alang sa kada usa namo. Siya naghisgot bahin sa dakong alanihon didto apan diyutay ra ang mamumuo.—Mateo 9:37, 38.

Usa ka semana human mobalik sa Vancouver gikan sa iyang asaynment, si Papa natumba sa panahon sa tigom. Ang dayagnosis human niana nagpadayag nga siya may kanseron nga tumor sa utok. Sa Mayo 1, 1939, iyang natapos ang iyang yutan-ong kurso. Siyam ka bulan ang akong edad, ug si David halos lima ka tuig ang edad. Ang among minahal nga inahan, kinsa may langitnon usab nga paglaom, nagpabiling matinumanon sa Diyos hangtod sa iyang kamatayon sa Hunyo 19, 1963.

Ang pagbati ni Papa bahin sa iyang pribilehiyo sa pagdala sa maayong balita ngadto sa daghang nasod maayong pagkatagik diha sa usa sa iyang mga sulat kang Mama. Siya sa bahin miingon: “Si Jehova maluluy-ong nagtugot kanako sa pag-adto niining mga yutaa ingong usa ka kahayag sa pagdala sa mensahe sa Gingharian. Dayegon ang iyang balaang ngalan. Bisan pa sa kahuyang ug kawalay-katakos ug kaluyahon, ang iyang himaya nagsidlak.”

Karon ang mga anak, apo, ug mga apo sa tuhod ni George ug Clara Young nag-alagad usab sa atong mahigugmaong Diyos, si Jehova. Gisultihan ako nga si Papa kanunayng mokutlo sa Hebreohanon 6:10, nga nag-ingon: “Ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” Kami usab wala malimot sa buhat ni Papa.

[Hulagway sa panid 23]

Ang akong amahan, sa tuo, uban sa iyang tulo ka igsoong lalaki

[Mga hulagway sa panid 25]

Si Papa (nagtindog) uban ni Brader Woodworth, Rutherford, ug Macmillan

Ubos: Si Papa (layong wala) sa grupo uban kang Brader Russell

[Mga hulagway sa panid 26]

Si Papa ug si Mama

Ubos: Adlaw sa ilang kasal

[Hulagway sa panid 27]

Uban kang David ug Mama pipila ka tuig human mamatay si Papa