Mga Pangutana Gikan sa mga Magbabasa

Sa Roma 12:19, buot bang ipasabot ni apostol Pablo nga ang mga Kristohanon dili angay mapungot, sa dihang siya miingon: “Ayaw kamo pagpanimalos, mga hinigugma, apan hatagig dapit ang kapungot”?

Sa pagkatinuod, dili. Ang gitumong ni apostol Pablo dinhi mao ang kapungot sa Diyos. Tinuod, wala kini magpasabot nga wala ray kaso kon masuko ang mga Kristohanon. Ang Bibliya tin-awng nagtambag kanato batok sa pagkapungot. Palandonga ang mga pananglitan sa diyosnong tambag.

“Biyai ang kasuko ug ayri ang kaaligutgot; ayaw ipakita ang imong kaugalingon nga manginit aron sa pagbuhat lamang ug daotan.” (Salmo 37:8) “Ang matag usa nga padayong napungot sa iyang igsoon manubag ngadto sa korte sa hustisya.” (Mateo 5:22) “Dayag ang mga buhat sa unod, ug kini sila mao ang pakighilawas, pagkadili-hinlo, malaw-ayng panggawi, idolatriya, pagbuhat sa espiritismo, mga panagdumtanay, panag-away, pangabugho, mga pagsinta sa kasuko.” (Galacia 5:19, 20) “Kuhaa gikan kaninyo ang tanang mapangdaoton nga kayugot ug kasuko ug kapungot ug sininggitay ug maabusohong sinultihan.” (Efeso 4:31) “Ang matag usa kinahanglan nga magmaabtik sa pagpaminaw, magmahinay sa pagsulti, magmahinay sa kapungot.” (Santiago 1:19) Dugang pa, ang basahon sa Proverbio sublisubli nga nagtambag kanato batok sa pagkapungot o sa pagkadaling masuko tungod sa ginagmayng mga sala ug tawhanong mga sayop.—Proverbio 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.

Ang konteksto sa Roma 12:19 nahiuyon sa maong tambag. Si Pablo nag-awhag nga dili himoong salingkapaw ang atong gugma, nga atong panalanginan kadtong naglutos kanato, nga maningkamot kita sa paghunahunag maayo bahin sa uban, nga dili nato balosan ug daotan ang daotan, ug nga maningkamot kitang magmadaiton sa tanan. Dayon siya miawhag: “Ayaw kamo pagpanimalos, mga hinigugma, apan hatagig dapit ang kapungot; kay nahisulat: ‘Akoa ang panimalos; ako magabayad, nagaingon si Jehova.’”—Roma 12:9, 14, 16-19.

Oo, dili gayod nato tugotan ang kasuko nga motukmod kanato sa pagbalos pinaagig mga buhat sa pagpanimalos. Ang atong kahibalo bahin sa mga kahimtang ug ang atong pagbati sa hustisya dili hingpit. Kon atong tugotan ang kasuko nga motukmod kanato sa mga buhat sa pagpanimalos, sagad nga kita masayop. Pagpahimuot kana sa gusto sa Kaaway sa Diyos, ang Yawa. Dihay laing gisulat si Pablo: “Pagkapungot, apan ayaw pagpakasala; ayaw pasalopa ang adlaw nga kamo anaa sa suko nga kahimtang, ni maghatag ug luna alang sa Yawa.”—Efeso 4:26, 27.

Ang mas maayong paagi, ang mas maalamong paagi, mao nga tugotan ang Diyos sa pagtino kon kanus-a ug kang kinsa himoon ang panimalos. Makahimo siya niini nga may bug-os nga kahibalo sa mga butang, ug bisan unsang pagbalos nga iyang himoon magbanaag sa iyang hingpit nga hustisya. Atong masabtan nga mao kini ang punto ni Pablo sa Roma 12:19 kon atong matikdan ang iyang paghisgot sa Deuteronomio 32:35, 41, nga naglakip niining mga pulonga: “Akoa ang panimalos, ug ang bayad.” (Itandi ang Hebreohanon 10:30.) Busa, bisan tuod ang mga pulong “sa Diyos” dili makaplagan diha sa Gregong teksto, gisal-ot kini sa daghang modernong mga maghuhubad diha sa Roma 12:19. Miresulta kini sa mga bersiyon sama sa “tugoti nga Diyos maoy manimalos” (The Contemporary English Version); “hatagig luna ang kapungot sa Diyos” (American Standard Version); “tugoti ang Diyos nga mosilot kon buot niya” (The New Testament in Modern English); “pagbilin ug luna alang sa diyosnong panimalos.”—The New English Bible.

Bisan kon giabuso o gilutos sa mga kaaway sa kamatuoran, makapasundayag kita ug pagsalig sa paghubit kang Jehova nga Diyos nga nadungog ni Moises: “Si Jehova, si Jehova, usa ka Diyos nga maluluy-on ug mapuangoron, mahinay sa pagkasuko ug dagaya sa mahigugmaong-kalulot ug kamatuoran, nagatipig ug mahigugmaong-kalulot alang sa linibo, nagapasaylo ug kasaypanan ug kalapasan ug sala, apan dili gayod magpahigawas gikan sa silot.”—Exodo 34:6, 7.