Mga Magmamantala sa Gingharian Nagtaho

Pagtabang sa Tanang Matang sa mga Tawo sa Netherlands

SI Abraham maoy tawo nga may talagsaong pagtuo. “Sa dihang siya gitawag,” miingon si apostol Pablo, si Abraham misugot sa tingog sa Diyos ug “mipahawa, bisan tuod wala mahibalo kon asa siya moadto.” Human ibalhin ang iyang tibuok pamilya, si Abraham “mipuyo ingong usa ka langyaw diha sa yuta sa saad” sulod sa nahibiling usa ka gatos ka tuig sa iyang kinabuhi.—Hebreohanon 11:8, 9.

Sa susama karong adlawa, daghang Saksi ni Jehova ang midawat sa hagit sa pagbalhin ngadto sa laing nasod aron sa pag-alagad diin mas dako ang panginahanglan. Ang uban nagtuon ug lahing pinulongan aron sila makasangyaw sa mga langyaw nga milalin sa ilang nasod. Sumala sa gipakita sa mosunod nga mga kasinatian, kining maayong espiritu nagbukas sa “usa ka dakong pultahan nga nagatultol ngadto sa kalihokan” sa Netherlands, diin usa ka milyon sa 15 ka milyong molupyo maoy gikan sa ubang mga nasod.—1 Corinto 16:9.

◻ Si Bahram, kanhing instruktor sa Kung Fu, naggikan sa usa ka nasod sa Tungang Sidlakan. Nakabaton siyag kopya sa Bibliya ug pipila ka publikasyon sa Watch Tower. Sulod sa usa ka bulan, si Bahram nakaamgo nga iyang nakaplagan ang kamatuoran. Ang usa ka pagtuon nasugdan uban kaniya ug sa iyang asawa, apan dihay problema—ang ilang magtutudlo sa Bibliya wala magsulti sa ilang pinulongan. Nagkabildohay sila pinaagi sa mga pagkompas, nga nagasulti “pinaagi sa mga kamot ug mga tiil,” sumala sa ilang nahinumdoman. Ngadtongadto, si Bahram ug iyang asawa nakakaplag ug usa ka kongregasyon diin ang ilang lumad nga pinulongan gisulti, ug human niadto sila kusog nga miuswag. Si Bahram karon usa na ka bawtismadong Saksi.

◻ Usa ka Olandes nga magtiayong payunir miduol sa usa ka lalaki nga taga-Indonesia nga nagbarog atubangan sa usa ka supermarket. Siya malipayong natingala sa dihang ang magtiayon nakigsulti kaniya diha sa iyang kaugalingong pinulongan. Ang mga kahikayan gihimo dayon aron sa pagduaw kaniya sa iyang balay. Nahibaloan nga siya nakapuyo sa Rusya sa kapin sa 20 ka tuig, nga nianang panahona siya nahimong usa ka espesyalista sa mga sakit sa babaye. Siya nag-angkong usa ka ateyista, apan siya midawat nga matag panahon nga siya magpahimugsog bata, siya mahibulong, “Pagkahingpit sa lawas sa tawo! Pagkadakong milagro!” Miuyon siya sa pagtuon sa Bibliya ug sa wala magdugay mituo nga adunay usa ka Maglalalang nga nagtagad sa katawhan. (1 Pedro 5:6, 7) Karon siya usa na ka bawtismadong igsoon ug nag-alagad sa Indonesian nga kongregasyon sa Amsterdam.

◻ Sa Rotterdam, usa sa kinadak-ang mga pantalan sa kalibotan, usa ka grupo sa mga payunir nahimong batid sa pagsangyaw ngadto sa lainlaing grupo sa pinulongan nga modunggo adlaw-adlaw. Ingong resulta sa kalihokan niining madasigong grupo sa mga magsasangyaw, pipila ka mga sakayanon, lakip sa usa ka kapitan, usa ka opisyal sa marino, ug usa ka kanhing guwardiya, ang midawat sa kamatuoran. Karon sila usab mitabang sa pagpakaylap sa maayong balita sa Gingharian sa Diyos sa tibuok kalibotan.—Mateo 24:14.

Sama sa ubang mga bahin sa kalibotan, ang mga Saksi ni Jehova sa Netherlands determinado sa pagbuhat sa ilang bahin sa pagpahayag sa walay-kataposang maayong balita ngadto sa tanang nasod, tribo, dila, ug katawhan.—Pinadayag 14:6.