Ugmara ang Pagkasuod Kang Jehova

“DUOL sa Diyos, ug siya moduol kaninyo,” misulat si disipulo Santiago. (Santiago 4:8) Ug ang salmistang si David miawit: “Ang pagpakigsuod ni Jehova anaa kanila nga nahadlok kaniya.” (Salmo 25:14) Tin-aw, buot ni Jehova nga Diyos nga kita dunay suod nga relasyon uban kaniya. Bisan pa niana, dili tanan nga nagsimba sa Diyos ug nagsugot sa iyang mga balaod ang awtomatikong mobating suod kaniya.

Komosta sa imong bahin? Duna ka bay suod personal nga relasyon uban sa Diyos? Sa walay duhaduha, buot nimong masuod kaniya. Sa unsang paagi kita masuod sa Diyos? Unsay kahulogan niini alang kanato? Ang ikatulong kapitulo sa basahon sa Bibliya sa Proverbio nagtaganag mga tubag.

Ipakita ang Mahigugmaong-Kalulot ug Kamatuoran

Si Haring Solomon sa karaang Israel nagsugod sa ikatulong kapitulo sa Proverbio pinaagi sa mga pulong: “Anak ko, ayaw kalimti ang akong balaod, ug hinaot bantayan sa imong kasingkasing ang akong mga sugo, tungod kay ang kadugayon sa mga adlaw ug mga tuig sa kinabuhi ug pakigdait igadugang kanimo.” (Proverbio 3:1, 2) Sanglit misulat si Solomon ubos sa pagdasig sa Diyos, kining amahanong tambag sa pagkatinuod naggikan kang Jehova nga Diyos ug gitumong kanato. Kita gitambagan dinhi nga mosunod sa mga pahinumdom sa Diyos—sa iyang balaod, o pagtulon-an, ug sa iyang mga sugo—nga nasulat sa Bibliya. Kon buhaton nato kini, “ang gidugayon sa mga adlaw ug mga tuig sa kinabuhi ug pakigdait igadugang” kanato. Oo, bisan karon matagamtam nato ang malinawong kinabuhi ug malikayan ang mga pangagpas nga nagladlad kanato sa kapeligrohan nga sayong mamatay nga kasagarang mahitabo sa mga mamumuhat ug daotan. Dugang pa, duna kitay paglaom nga mabuhi sa walay kataposan sa malinawong bag-ong kalibotan.—Proverbio 1:24-31; 2:21, 22.

Nga nagpadayon, si Solomon miingon: “Hinaot ang mahigugmaong-kalulot ug kamatuoran dili mobiya kanimo. Ihigot mo kini sa imong liog. Isulat mo kini sa ibabaw sa papan sa imong kasingkasing, aron ikaw makakaplag ug kaluoy ug maayong panabot sa atubangan sa Diyos ug sa yutan-ong tawo.”—Proverbio 3:3, 4.

Ang orihinal-pinulongan nga pulong alang sa “mahigugmaong-kalulot” gihubad usab ug “maunongong gugma” ug naglakip sa pagkamatinumanon, panaghiusa, ug pagkamaunongon. Kita ba determinadong magpabiling suod kang Jehova bisag unsay mahitabo? Gipasundayag ba nato ang mahigugmaong-kalulot sa atong relasyon uban sa mga isigkamagtutuo? Kita ba naningkamot aron magpabiling suod kanila? Sa adlaw-adlaw nga pakiglabot kanila, gihuptan ba nato ‘ang balaod sa mahigugmaong-kalulot diha sa atong dila’ bisan ilalom sa masulayong mga kahimtang?—Proverbio 31:26.

Sanglit dagaya sa mahigugmaong-kalulot, si Jehova “andam mopasaylo.” (Salmo 86:5) Kon kita naghinulsol sa atong nangaging kasal-anan ug karon nagtul-id sa atong mga lakang, kita gipasaligan nga ang “mga panahon sa pagpalagsik” modangat gikan kang Jehova. (Buhat 3:19) Dili ba angayng sundogon nato ang atong Diyos pinaagi sa pagpasaylo sa uban sa ilang mga kalapasan?—Mateo 6:14, 15.

Si Jehova mao “ang Diyos sa kamatuoran,” ug buot niya ang “kamatuoran” gikan niadtong gustong makigsuod kaniya. (Salmo 31:5) Makadahom ba gayod kita nga mahimong atong Higala si Jehova kon kita nagakinabuhi ug dobleng kinabuhi —nga nagalihok sa usa ka paagi kon kauban sa mga isigka-Kristohanon ug sa laing paagi kon dili nila makita—sama sa “mga tawo sa kabakakan” nga nagtago kon unsa silang matanga sa pagkatawo? (Salmo 26:4) Pagkadakong binuang kana, sanglit “ang tanang butang hubo ug naladlad nga bukas sa mga mata” ni Jehova!—Hebreohanon 4:13.

Ang mahigugmaong-kalulot ug kamatuoran kinahanglang pabilhan ingong mahalong kulentas nga ‘ihigot sa atong liog,’ kay kini motabang kanato nga ‘makakaplag ug kaluoy sa atubangan sa Diyos ug sa yutan-ong tawo.’ Dili lamang angayng ipakita nato kining maong mga hiyas sa gawas kondili ikulit usab kini ‘sa papan sa atong kasingkasing,’ nga naghimo niini nga kinaiyanhong bahin sa atong personalidad.

Ugmara ang Bug-os nga Pagsalig Kang Jehova

Ang maalamong hari nagpadayon: “Salig kang Jehova sa bug-os mong kasingkasing ug ayaw pagsalig sa imong kaugalingong salabotan. Sa tanan nimong mga dalan ilha siya, ug siya magatul-id sa imong mga alagianan.”—Proverbio 3:5, 6.

Si Jehova tinong takos sa atong bug-os nga pagsalig. Ingong Maglalalang, siya “kusgan sa kagahom” ug mao ang Tuboran sa “dinamikong gahom.” (Isaias 40:26, 29) Matuman niya ang tanan niyang katuyoan. Aw, ang iyang ngalan sa literal nagkahulogang “Iyang Gipahinabo,” ug kini nagpalig-on sa atong pagsalig sa iyang katakos sa pagtuman sa iyang gisaad! Ang kamatuoran nga “imposible sa Diyos nga mamakak” naghimo kaniyang sulondan sa kamatuoran. (Hebreohanon 6:18) Ang iyang pangunang hiyas mao ang gugma. (1 Juan 4:8) Siya “matarong sa tanan niyang mga dalan ug maunongon sa tanan niyang mga buhat.” (Salmo 145:17) Kon dili kita makasalig sa Diyos, kinsay atong kasaligan? Siyempre, aron maugmad ang pagsalig kaniya, kinahanglan natong “tilawan ug tan-awon nga si Jehova maayo” pinaagi sa pagpadapat sa atong nakat-onan gikan sa Bibliya diha sa atong personal nga kinabuhi ug pinaagi sa pagpalandong sa kaayohan nga gipatungha niini.—Salmo 34:8.

Unsaon nato ‘pag-ila si Jehova sa tanan natong mga dalan’? Ang dinasig nga salmista nag-ingon: “Ako magapalandong sa tanan mong buhat, ug magahisgot ako sa imong gihimo.” (Salmo 77:12) Sanglit dili makita ang Diyos, ang pagpalandong bahin sa iyang dagkong mga buhat ug sa iyang pagpakiglabot sa iyang katawhan hinungdanon sa pagpakigsuod kaniya.

Ang pag-ampo hinungdanon usab nga paagi sa pag-ila kang Jehova. Si Haring David nagsigeg tawag kang Jehova “sa tibuok adlaw.” (Salmo 86:3) Si David subsob nga mag-ampo sa tibuok gabii, sama sa dihang siya mikalagiw sa kamingawan. (Salmo 63:6, 7) “Padayon kamo sa pag-ampo sa tanang higayon diha sa espiritu,” nag-awhag si apostol Pablo. (Efeso 6:18) Unsa ka subsob nga kita mag-ampo? Gipahimuslan ba nato ang personal kinasingkasing nga pakigsulti sa Diyos? Sa dihang nag-atubang sa masulayong mga kahimtang, mangaliyupo ba kita kaniya alang sa tabang? Kita ba mainampoong mangayo sa iyang giya una pa mohimog hinungdanong mga desisyon? Ang atong sinserong mga pag-ampo kang Jehova magpamahal nato kaniya. Ug kita gipasaligan nga siya mamati sa atong pag-ampo ug ‘magtul-id sa atong mga alagianan.’

Pagkadakong binuang nga ‘mosalig sa atong kaugalingong salabotan’ o nianang sa prominenteng mga tawo sa kalibotan sa dihang ikabutang nato ang atong bug-os nga pagsalig kang Jehova! “Ayaw pagpakamaalamon sa imong kaugalingong mga mata,” matod ni Solomon. Sa kasukwahi, siya nagtambag: “Kahadlokan mo si Jehova ug pahilayo gikan sa daotan. Hinaot kana mahimong kaayohan sa imong pusod ug kalagsik sa imong mga bukog.” (Proverbio 3:7, 8) Ang angayan nga kahadlok nga dili-makapahimuot sa Diyos kinahanglang magmando sa tanan natong mga lihok, hunahuna, ug pagbati. Ang ingong matinahurong kahadlok mopugong kanato sa pagbuhat ug daotan ug makaayo ug makapalagsik sa espirituwal.

Ihatag Kang Jehova ang Imong Kinamaayohan

Sa unsang laing paagi nga kita masuod sa Diyos? “Pasidunggi si Jehova pinaagi sa tanan nimong bililhong mga butang ug pinaagi sa mga inunahang bunga sa tanan mong abot,” nagsugo ang hari. (Proverbio 3:9) Ang pagpasidungog kang Jehova nagpasabot nga tahoron siya pag-ayo ug bayawon siya sa publiko pinaagi sa pagpakig-ambit ug pagpaluyo sa publikong pagpahayag sa iyang ngalan. Ang bililhong mga butang nga atong ipasidungog kang Jehova mao ang atong panahon, atong mga katakos, atong kusog, ug atong materyal nga kabtangan. Kinahanglang kini maoy  mga inunahang bunga—atong kinamaayohan. Dili ba ang paagi nga gigamit nato ang atong personal nga mga kahinguhaan magsumbalik-silaw sa atong determinasyon nga ‘unahon pagpangita ang Gingharian ug ang pagkamatarong sa Diyos’?—Mateo 6:33.

Ang pagpasidungog kang Jehova pinaagi sa atong bililhong mga butang pagagantihan. “Unya ang imong mga kamalig mapuno sa kadaghan,” nagpasalig si Solomon, “ug ang imong mga pug-anan ug bino magaawas sa bag-ong bino.” (Proverbio 3:10) Bisan tuod ang espirituwal nga kauswagan mismo dili motultol sa materyal nga kauswagan, ang madagayaong paggamit sa atong mga kahinguhaan sa pagpasidungog kang Jehova magpahinabog dagayang panalangin. Ang pagbuhat sa kabubut-on sa Diyos maoy makapalig-on nga “pagkaon” alang kang Jesus. (Juan 4:34) Sa susama, ang pagpakig-ambit sa buluhaton nga pagsangyaw ug paghimog mga tinun-an nga naghimaya kang Jehova nagpalig-on kanato. Kon kita magpadayon sa maong buluhaton, ang atong espirituwal nga mga kamalig mapuno sa kadaghan. Ang atong kalipay—nga gisimbolohan sa bag-ong bino—magaawas.

Dili ba usab kita modangop kang Jehova ug mag-ampo kaniya nga makabaton ug igong materyal nga pagkaon kada adlaw? (Mateo 6:11) Ang tanan nga atong nabatonan, sa pagkatinuod, nadawat nato gikan sa atong mahigugmaong langitnong Amahan. Si Jehova magabubo ug dugang mga panalangin sa sukod nga atong gigamit ang atong bililhong mga butang sa pagdayeg kaniya.—1 Corinto 4:7.

Dawata ang Disiplina ni Jehova

Nagpakita sa kahinungdanon sa disiplina aron mahimong suod kang Jehova, ang hari sa Israel nagtambag kanato: “Ang disiplina ni Jehova, Oh akong anak, ayaw isalikway; ug ayaw ayri ang iyang pagbadlong, tungod kay ang gihigugma ni Jehova iyang ginabadlong, maingon nga ang amahan magahimo sa susama sa anak nga iyang gikahimut-an.”—Proverbio 3:11, 12.

Apan, ang disiplina dili sayon natong dawaton. “Walay disiplina ang daw makapangaya sa pagkakaron, kondili makapaguol,” misulat si apostol Pablo, “apan human niana ngadto kanilang kinsa nabansay pinaagi niini kini magpatunghag madaitong bunga, nga mao, ang pagkamatarong.” (Hebreohanon 12:11) Ang pagbadlong ug disiplina maoy hinungdanong bahin sa pagbansay nga magpasuod kanato sa Diyos. Ang pagtul-id gikan kang Jehova—nadawat man nato kana gikan sa mga ginikanan, pinaagi sa Kristohanong kongregasyon, o pinaagi sa pagpalandong sa Kasulatan  panahon sa atong personal nga pagtuon—maoy pagpahayag sa iyang gugma alang kanato. Maalamong dawaton nato kana.

Hawiri Pag-ayo ang Kaalam ug Pagsabot

Sunod, gipasiugda ni Solomon ang kahinungdanon sa kaalam ug pagsabot sa pag-ugmad ug suod nga relasyon uban sa Diyos. Siya miingon: “Malipayon ang tawo nga nakakaplag sa kaalam, ug ang tawo nga nakakab-ot sa pagsabot, kay ang pagpakabaton niini ingong ganansiya labi pang maayo kay sa pagmanggad ug salapi ug ang pagpakabaton niini ingong abot kay sa bulawan mismo. . . . Kini usa ka kahoy sa kinabuhi kanila nga mokupot niini, ug malipayon kadtong magahawid pag-ayo niini.”—Proverbio 3:13-18.

Nagpahinumdom kanato sa pasundayag sa kaalam ug pagsabot diha sa kahibulongang mga buhat sa paglalang ni Jehova, ang hari nag-ingon: “Si Jehova pinaagi sa kaalam nagtukod sa yuta. Pinaagi sa pagsabot iyang gitukod ang kalangitan. . . . Anak ko, hinaot dili kini mobulag sa imong mga mata. Bantayi ang praktikal nga kaalam ug katakos sa paghunahuna, ug kini mahimong kinabuhi sa imong kalag ug katahom sa imong liog.”—Proverbio 3:19-22.

Ang kaalam ug pagsabot maoy diyosnong mga hiyas. Dili lamang kinahanglan natong ugmaron kini kondili usab hawiran kini pag-ayo nga dili magpabaya sa atong makugihong pagtuon sa Kasulatan ug pagpadapat sa atong nakat-onan. “Unya magalakat ikaw sa imong dalan nga may kasegurohan,” nagpadayon si Solomon, “ug bisan ang imong tiil dili mapandol.” Siya midugang: “Sa diha nga ikaw mohigda dili ka malisang; ug ikaw mohigda, ug ang imong pagkatulog matam-is.”—Proverbio 3:23, 24.

Oo, makalakat kita nga may kasegurohan ug matulog nga may kalinaw sa hunahuna samtang naghulat kita sa samag-kawatan nga pag-abot sa adlaw sa “kalit nga kalaglagan” sa daotang kalibotan ni Satanas. (1 Tesalonica 5:2, 3; 1 Juan 5:19) Bisan panahon sa nagsingabot nga dakong kasakitan, makasalig kita: “Dili ka kinahanglang mahadlok sa bisan unsang hinanaling makalilisang nga butang, ni sa bagyo ibabaw sa mga daotan, tungod kay kini modangat. Kay si Jehova mismo mamahimo, sa pagkatinuod, nga imong pagsalig, ug siya magabantay sa imong tiil nga dili hidakpan.”—Proverbio 3:25, 26; Mateo 24:21.

Buhata ang Maayo

“Ayaw ihikaw ang maayo gikan kanila diin kini gikinahanglan,” nagtambag si Solomon, “sa diha nga anaa sa gahom sa imong kamot ang pagbuhat niini.” (Proverbio 3:27) Ang pagbuhat ug maayo ngadto sa uban naglakip sa madagayaong paggamit sa atong mga kahinguhaan alang kanila, ug kini dunay daghang bahin. Apan dili ba ang pagtabang sa uban nga makabaton ug suod nga relasyon uban sa matuod nga Diyos mao ang kinamaayohang butang nga atong mahimo alang kanila niining “panahon sa kataposan”? (Daniel 12:4) Nan, kini mao ang panahon sa pagpakita ug kasibot sa pagsangyaw sa Gingharian ug sa buluhatong paghimog mga tinun-an.—Mateo 28:19, 20.

Ang maalamong hari naglista usab sa pipila ka buhat nga isalikway, nga nag-ingon: “Ayaw pag-ingon sa imong isigkatawo: ‘Lakat, ug bumalik ka ug ugma ako mohatag,’ sa diha nga ikaw aduna na niana. Ayaw pagtinguha sa kadaotan batok sa imong isigkatawo, sa diha nga siya nagpuyo sa kasegurohan uban kanimo. Ayaw pagpakig-away sa usa ka tawo nga walay pasikaranan, kon siya walay gibuhat nga daotan kanimo. Ayaw kasinahi ang tawo nga mapintas, ni pilion ang iyang mga dalan.”—Proverbio 3:28-31.

Nagsumaryo sa hinungdan sa iyang tambag, si Solomon nag-ingon: “Kay ang tawo nga sukwahi dulumtanan kang Jehova, apan makigsuod Siya sa mga matul-id. Ang tunglo ni Jehova anaa sa balay sa daotan, apan ang puloy-anan sa mga matarong iyang panalanginan. Sa mga mayubiton, siya nagatamay; apan sa mga maaghop siya magpakitag kaluoy. Ang mga maalamon makaangkon ug pasidungog, apan ang mga buangbuang nagabayaw sa kaulawan.”—Proverbio 3:32-35.

Aron atong matagamtam ang kasuod kang Jehova, kinahanglang dili kita magtinguha ug sukwahi ug makadaot nga mga laraw. (Proverbio 6:16-19) Makabaton lamang kita sa iyang pag-uyon ug panalangin kon atong buhaton ang matarong sa mga mata sa Diyos. Makadawat usab kita ug wala-tinguhaa nga pasidungog sa dihang ang uban makamatikod nga kita nagalihok nga kaharmonya sa diyosnong kaalam. Busa isalikway nato ang sukwahing mga dalan niining daotan ug mapintas nga kalibotan. Sa pagkatinuod, tinguhaon nato ang matul-id nga dalan ug ugmaron ang pagkasuod kang Jehova!

[Mga hulagway sa panid 25]

“Pasidunggi si Jehova pinaagi sa imong bililhong mga butang”