“Bililhong mga Butang” Nagapuno sa Balay ni Jehova

“Uyogon ko [Jehova] ang tanang nasod, ug ang bililhong mga butang sa tanang nasod moabot; ug pun-on ko kining balaya sa himaya.”—HAGEO 2:7.

1. Sa panahon sa emerhensiya, nganong mao dayoy atong hunahunaon ang atong mga minahal?

 PUNO sa unsang bililhong mga butang ang imong balay? Duna ka bay mahalong muwebles, modernong kompiyuter, bag-ong awto sa imong garahe? Bisan pag aduna ka niining tanang butanga, dili ka ba mouyon nga ang labing bililhong butang sa imong balay mao ang mga tawo—ang mga sakop sa imong pamilya? Handurawa nga usa ka gabii niana makamata ka sa baho sa aso. Ang imong balay nasunog, ug aduna ka na lay pipila ka minutos aron makaikyas! Unsa ang imong unang tagdon? Ang imong muwebles? Ang imong kompiyuter? Ang imong awto? Dili ba mas hunahunaon mo ang imong mga minahal? Siyempre, kay mas bililhon ang tawo kay sa mga butang.

2. Unsay gilapdon sa kalalangan ni Jehova, ug unsang bahin niana ang gikalipayan pag-ayo ni Jesus?

² Karon hunahunaa ang bahin kang Jehova nga Diyos ug ang iyang Anak, si Jesu-Kristo. Si Jehova mao “ang Usa nga naghimo sa langit ug sa yuta ug sa dagat ug sa tanang butang diha kanila.” (Buhat 4:24) Ang iyang Anak, ang “batid nga magbubuhat,” mao ang ahente nga pinaagi kaniya gihimo ni Jehova ang tanang ubang mga butang. (Proverbio 8:30, 31; Juan 1:3; Colosas 1:15-17) Tino nga si Jehova ug si Jesus nagpabili sa tanan nga gilalang. (Itandi ang Genesis 1:31.) Apan unsang bahina sa kalalangan sa imong hunahuna ang labing bililhon kanila—mga butang ba o mga tawo? Nagdula sa papel sa kaalam nga gipersonipikar, si Jesus miingon: “Ang mga butang nga akong gikalipayan mao ang mga anak sa tawo,” o ingon sa pagbadbad niana sa hubad ni William F. Beck, si Jesus “nalipay sa mga tawo.”

3. Unsang tagna ang gipamulong ni Jehova pinaagi kang Hageo?

³ Tataw nga gipabilhan ug dako ni Jehova ang mga tawo. Usa ka timaan niini makita diha sa matagnaong mga pulong nga iyang gisulti sa tuig 520 W.K.P. pinaagi sa iyang manalagnang Hageo. Si Jehova miingon: “Uyogon ko ang tanang nasod, ug ang bililhong mga butang sa tanang nasod moabot; ug pun-on ko kining balaya sa himaya. . . . Ang himaya niining ulahi nga balay molabaw pa niadtong una.”—Hageo 2:7, 9.

4, 5. (a) Nganong dili makataronganon ang paghinapos nga ang ekspresyong “bililhong mga butang” nagpunting sa materyal nga katahom? (b) Unsaon nimo pagbatbat sa “bililhong mga butang,” ug ngano?

⁴ Unsang “bililhong mga butang” ang magpuno sa balay ni Jehova ug mohatag niini ug dili-hilabwan  nga himaya? Mahalong mga muwebles ug maanindot ba nga mga dekorasyon? Bulawan, salapi, ug mahalong mga bato ba? Daw dili gayod kini makataronganon. Hinumdomi, ang unang templo, nga ang inagurasyon gihimo mga lima ka siglo sa miagi, maoy usa ka multibilyong dolyar nga tinukod! a Sa pagkatinuod, si Jehova dili magpaabot nga ang templo nga gitukod niining gamay ra nga pundok sa gipapauli nga mga Hudiyo molabaw sa templo ni Solomon sa materyal nga katahom!

⁵ Nan, unsa ang “bililhong mga butang” nga magapuno sa balay ni Jehova? Tin-aw, mga tawo gayod kini. Gawas pa, dili salapi ug bulawan ang makapalipay ni Jehova kondili ang mga tawo nga nag-alagad kaniya tungod sa gugma. (Proverbio 27:11; 1 Corinto 10:26) Oo, bililhon kang Jehova ang tanang lalaki, babaye, ug mga bata nga nagsimba kaniya nga dalawaton. (Juan 4:23, 24) Sila ang “bililhong mga butang,” ug sila mas bililhon kang Jehova kay sa tanang adorno nga nadayandayan sa templo ni Solomon.

6. Nag-alagad sa unsang katuyoan ang karaang templo sa Diyos?

⁶ Bisan pa sa kusog nga pagsupak, ang templo natapos sa 515 W.K.P. Hangtod sa panahon sa paghalad kang Jesus, ang templo sa Jerusalem nagpabiling sentro sa putli nga pagsimba alang sa daghang “bililhong mga butang,” nga gilangkoban sa lumad nga mga Hudiyo ug Hentil nga mga kinabig. Apan ang templo naghawas ug usa ka butang nga mas dako, nga atong makita unya.

Unang-Siglong Katumanan

7. (a) Unsay gilandongan sa karaang templo sa Diyos sa Jerusalem? (b) Isaysay ang mga buhat sa hataas nga saserdote sa Adlaw sa Pagtabon sa Sala.

⁷ Ang templo sa Jerusalem naglandong sa mas dakong kahikayan sa pagsimba. Kini maoy espirituwal nga templo sa Diyos, nga gitukod ni Jehova sa 29 K.P. nga si Jesus ang Hataas nga Saserdote. (Hebreohanon 5:4-10; 9:11, 12) Palandonga ang kaamgiran tali sa mga katungdanan sa hataas nga saserdote sa Israel ug ang mga buhat ni Jesus. Matag tuig sa Adlaw sa Pagtabon sa Sala, ang hataas nga saserdote moduol sa halaran sa sawang sa templo ug magtanyag ug torong baka aron sa pagtabon sa mga sala sa mga saserdote. Human niana, siya mosulod sa templo nga may dalang dugo sa torong baka, moagi sa mga pultahan nga nagbulag sa sawang gikan sa Balaan ug dayon moagi sa tabil nga nagbulag sa Balaan gikan sa Labing Balaan. Sa makasulod na sa Labing Balaan, iwisikwisik sa hataas nga saserdote ang dugo atubangan sa arka sa pakigsaad. Dayon, sundon ang mao gihapong paagi, siya magtanyag ug kanding aron sa pagtabon sa sala alang sa 12 ka banay sa Israel nga dili mga saserdote. (Levitico 16:5-15) Sa unsang paagi kining pagsaulog nalangkit sa espirituwal nga templo sa Diyos?

8. (a) Sa unsang diwa nga si Jesus gihalad sa sinugdanan sa 29 K.P.? (b) Unsang linaing relasyon ang gitagamtam ni Jesus uban kang Jehova sa tibuok niyang pag-alagad dinhi sa yuta?

⁸ Sa ingon, si Jesus gitanyag diha sa halaran sa kabubut-on sa Diyos sa dihang siya gibawtismohan ug gidihogan sa balaang espiritu sa Diyos sa 29 K.P. (Lucas 3:21, 22) Sa pagkatinuod, kining okasyona nagtimaan sa sinugdanan sa mahalarong dalan sa kinabuhi alang kang Jesus nga miabot ug tulo ug tunga ka tuig. (Hebreohanon 10:5-10) Sulod niadtong yugtoa, gitagamtam ni Jesus ang pagkagianak-sa-espiritu nga relasyon uban sa Diyos. Kining talagsaong baroganan ni Jesus uban sa iyang langitnong Amahan dili gayod bug-os masabtan sa ubang mga tawhanon. Morag dunay salimbong nga nagsalipod sa ilang mga mata sa pagsabot, sama nga ang salimbong nagsalipod sa Balaan gikan sa panan-aw niadtong anaa sa sawang sa tabernakulo.—Exodo 40:28.

9. Nganong si Jesus dili makasulod sa langit ingong tawo, ug sa unsang paagi kining kahimtanga nasulbad?

⁹ Bisan pa sa iyang pagkahimong dinihogan-sa-espiritu nga Anak sa Diyos, ang tawo nga si Jesus dili makabaton ug kinabuhi sa langit. Nganong dili? Tungod kay ang unod ug dugo dili makapanunod sa langitnong Gingharian sa Diyos. (1 Corinto 15:44, 50) Sanglit usa man ka babag ang tawhanong unod ni Jesus, kini tino nga nagsimbolo sa tabil nga nagbulag sa Balaan gikan sa Labing Balaan sa karaang templo sa Diyos. (Hebreohanon 10:20) Apan tulo ka adlaw human siya mamatay, gibanhaw si Jesus sa Diyos ingong espiritu. (1 Pedro 3:18) Nan siya makasulod sa Labing Balaan nga  lawak sa espirituwal nga templo sa Diyos—ang langit mismo. Ug mao gayod kini ang nahitabo. Si Pablo nagsulat: “Si Kristo misulod, dili ngadto sa balaang dapit [tino nga nagpunting sa Labing Balaan] nga hinimog mga kamot, nga maoy hulad sa katinuoran, apan ngadto sa langit mismo, aron moatubang karon sa persona sa Diyos alang kanato.”—Hebreohanon 9:24.

10. Unsay gihimo ni Jesus sa pagbalik ngadto sa langit?

¹⁰ Sa langit, si Jesus ‘nagwisik sa dugo’ sa iyang halad pinaagi sa pagtanyag sa makalukat nga bili sa iyang kinabuhi-nga-dugo ngadto kang Jehova. Bisan pa niana, si Jesus naghimo ug labaw pa. Sa dihang hapit na siyang mamatay, iyang gisultihan ang iyang mga sumusunod: “Ako molakaw ug mag-andam ug dapit alang kaninyo. Usab, kon ako molakaw ug mag-andam ug dapit alang kaninyo, ako moanhi pag-usab ug pagadawaton kamo ngadto sa akong kaugalingon, aron nga kon asa ako kamo usab maatua.” (Juan 14:2, 3) Busa pinaagi sa pagkasulod ngadto sa Labing Balaan, o langit, gibuksan ni Jesus ang dalan alang sa uban nga mosunod. (Hebreohanon 6:19, 20) Kining mga tawhana, nga may gidaghanong 144,000, mag-alagad ingong luyoluyong mga saserdote sa kahikayan sa espirituwal nga templo sa Diyos. (Pinadayag 7:4; 14:1; 20:6) Sama nga ang hataas nga saserdote sa Israel magdala una ug dugo sa torong baka ngadto sa Labing Balaan aron sa pagtabon sa mga sala sa mga saserdote, ang bili sa giula nga dugo ni Jesus gipadapat ug una ngadto niining 144,000 ka luyoluyong mga saserdote. b

Ang Modernong-Adlawng “Bililhong mga Butang”

11. Alang kang kinsa nga ang hataas nga saserdote sa Israel naghalad ug kanding, ug unsay gilandongan niini?

¹¹ Mopatim-aw nga sa tuig 1935, ang pangatibuk-ang pagtigom sa dinihogan natapos. c Apan si Jehova wala pa matapos sa paghimaya sa iyang balay. Wala, ang “bililhong mga butang” kinahanglang moabot pa ngadto niana. Hinumdomi nga ang hataas nga saserdote sa Israel naghalad ug duha ka hayop—usa ka torong baka alang sa mga sala sa mga saserdote ug usa ka kanding alang sa mga sala sa dili-saserdote nga mga banay. Sanglit ang mga saserdote naglarawan man sa mga dinihogan nga magauban ni Jesus didto sa langitnong Gingharian, kinsa ang gihawasan sa dili-saserdote nga mga banay? Ang tubag makita diha sa mga pulong ni Jesus nga narekord sa Juan 10:16: “Ako adunay ubang mga karnero, nga wala niining torila; sila usab kinahanglang akong dad-on, ug sila mamati sa akong tingog, ug sila mahimong usa ka panon, usa ka magbalantay.” Busa, ang giula nga dugo ni Jesus makahatag ug kaayohan sa duha ka pundok sa mga tawo—una, ngadto niadtong mga Kristohanon kansang paglaom mao ang pagmando uban kang Jesus sa langit ug ikaduha, ngadto  niadtong nagpaabot sa kinabuhing walay kataposan diha sa paraisong yuta. Dayag, kining ikaduhang pundok mao ang gilarawan sa “bililhong mga butang” diha sa tagna ni Hageo.—Miqueas 4:1, 2; 1 Juan 2:1, 2.

12. Sa unsang paagi ang daghang “bililhong mga butang” nakabig ngadto sa balay sa Diyos karong adlawa?

¹² Kining “bililhong mga butang” nagpadayon gihapon sa pagpuno sa balay ni Jehova. Sa mga katuigang dili pa dugay, nawala na ang mga pagdili sa Sidlakang Uropa, mga bahin sa Aprika, ug sa ubang kayutaan, nga nagpalambo sa maayong balita sa natukod nga Gingharian sa Diyos ngadto sa mga teritoryo nga wala pa matandog hangtod karon. Sa mangabot ang bililhong mga butang ngadto sa kahikayan sa Diyos sa templo, sila sa baylo nakigbisog sa paghimog dugang mga tinun-an, sa pagtuman sa sugo ni Jesus. (Mateo 28:19, 20) Samtang nagahimo niini, sila nakaatubang ug daghang indibiduwal, batan-on ug tigulang, nga posibleng mahimong “bililhong mga butang” nga maghimaya sa balay ni Jehova. Palandonga lamang ang pipila ka pananglitan kon sa unsang paagi kini nagakahitabo.

13. Sa unsang paagi gipasundayag sa batang babaye sa Bolivia ang iyang kadasig sa pagpakaylap sa mensahe sa Gingharian?

¹³ Sa Bolivia, usa ka singko-anyos nga batang babaye nga gimatuto sa mga ginikanang Saksi nangayog permiso sa iyang magtutudlo nga dili moeskuyla panahon sa semana sa pagduaw sa magtatan-aw sa sirkito. Ngano? Buot niyang makigbahin sa pag-alagad panahon niining tibuok semana sa linaing kalihokan. Nakurat niini ang iyang mga ginikanan, apan nalipay sila nga maayo siya ug tinamdan. Ang batang babaye nagadumala karon ug lima ka pagtuon sa Bibliya, ug ang uban niining mga estudyanteha nagatambong sa Kristohanong mga tigom. Iya pa ganing gidala ang iyang magtutudlo ngadto sa Kingdom Hall. Tingali sa ngadtongadto, ang pipila sa iyang mga estudyante sa Bibliya magpakita sa ilang kaugalingon nga “bililhong mga butang” nga maghimaya sa balay ni Jehova.

14. Sa Korea, sa unsang paagi ang pagkamalahutayon sa usa ka sister nabaslan uban sa tawo nga daw dili interesado?

 ¹⁴ Samtang naghulat sa estasyonan sa tren, giduol sa usa ka Kristohanong babaye sa Korea ang usa ka estudyante nga namati sa musika sa iyang headphone. “Duna ka bay relihiyon?” siya nangutana. “Wala akoy interes sa bisan unsang relihiyon,” mitubag ang estudyante. Ang sister wala magpadala. “Sa paglabay sa panahon,” siya mipadayon, “ang tawo tingali buot nga mamili ug relihiyon. Apan kon siya walay hibangkaagan bahin sa relihiyon, basin makapili siyag sayop nga relihiyon.” Ang panagway sa estudyante nausab, ug siya misugod sa pagpamati sa atong sister nga maikagon. Iyang gitanyagan siya ug librong Is There a Creator Who Cares About You? ug miingon nga kining publikasyona dakog tabang inig-abot sa panahon nga mamili na siya ug relihiyon. Iyang gidawat dayon ang libro. Pagkasunod semana, siya nagsugod sa pagtuon sa Bibliya uban sa mga Saksi ni Jehova, ug karon siya nagtambongan na sa tanang tigom sa kongregasyon.

15. Sa unsang paagi ang usa ka dalagita sa Hapon nakasugod ug mga pagtuon sa Bibliya, ug sa unsang paagi ang iyang mga paghago nabaslan?

¹⁵ Sa Hapon, gilantaw sa 12-anyos nga Megumi ang iyang eskuylahan ingong mabungahong natad sa pagsangyaw ug pagpanudlo. Siya nakasugod gani ug daghang pagtuon sa Bibliya. Giunsa kini paghimo ni Megumi? Sanglit magbasa siya ug Bibliya o mangandam alang sa mga tigom panahon sa lunch break, ang iyang mga klasmet kanunayng mangutana kaniya kon unsay iyang gibuhat. Gipangutana sa uban si Megumi kon nganong dili siya moapil sa pipila ka kalihokan sa eskuylahan. Gitubag ni Megumi ang ilang mga pangutana ug gisultihan sila nga ang Diyos adunay ngalan. Kini makapukaw gayod ug kaikag sa iyang mga mamiminaw. Iya dayong tanyagan sila ug pagtuon sa Bibliya. Si Megumi karon nagadumalag 20 ka pagtuon—18 kanila uban sa iyang mga klasmet.

16. Sa unsang paagi ang usa ka brader sa Cameroon nakasugod ug mga pagtuon sa Bibliya uban sa pundok sa mga mabiaybiayon?

¹⁶ Sa Cameroon, usa ka grupo sa walo ka tawo nga nagtrabaho sa trabahoanan nanawag sa brader nga nagtanyag ug literatura sa Bibliya sa lumalabay. Kay gustong mobiaybiay sa brader, ilang gipangutana siya kon nganong dili siya motuo sa Trinidad, impiyernong kalayo, o pagkadili-mamatay sa kalag. Migamit ug Bibliya, gitubag sa atong brader ang ilang mga pangutana. Tungod niini, tulo sa lalaki midawat sa mga pagtuon sa Bibliya. Ang usa kanila, si Daniel, nagsugod sa pagtambong sa mga tigom ug gilaglag ang tanan niyang mga butang nga nalangkit sa espiritismo. (Pinadayag 21:8) Walay usa ka tuig, siya nabawtismohan.

17. Unsang pamaagi ang gigamit sa mga igsoon sa El Salvador aron makasangyaw sa usa ka tawo nga sa sinugdanan dili buot mamati sa mensahe sa Gingharian?

¹⁷ Sa El Salvador, gihigot sa usa ka tawo ang iyang isog nga iro atubangan sa pultahan matag higayong makakita siya ug mga Saksi ni Jehova sa duol. Ang tawo maghulat hangtod moagi ang mga Saksi, ug dayon iyang dalhon pagbalik ang iro sa balay. Ang mga igsoon wala gayod sukad makasulti sa tawo. Busa usa ka adlaw sila midesidir sa paggamit ug lahi nga pamaagi. Kay nahibalo nga ang tawo makadungog sa ilang isulti, sila midesidir sa pagsangyaw ngadto sa iro. Sila mipaingon sa balay, gipangomosta ang iro, ug miingon nga malipayon kaayo sila nga nakahigayon sa pagsulti niana. Sila naghisgot bahin sa panahon diin aduna unyay paraiso sa yuta, diin wala na unyay masuko—oo, diin bisan ang mga hayop makigdaiton. Dayon sila matinahurong nanamilit sa iro ug misugod paglakaw. Sa ilang dakong katingala, ang tawo migawas sa iyang balay ug nangayog pasaylo nga wala gayod  mohatag sa mga Saksi ug higayon sa pagpakigsulti kaniya. Iyang gidawat ang mga magasin, ug nasugdan ang pagtuon sa Bibliya. Kining tawhana karon ato nang igsoon—usa sa “bililhong mga butang”!

“Ayawg Kahadlok”

18. Unsang mga problema ang ginaatubang sa daghang Kristohanon, apan unsay paglantaw ni Jehova sa iyang mga magsisimba?

¹⁸ Ikaw ba nakigbahin sa hinungdanon kaayong pagsangyaw sa Gingharian ug paghimog tinun-an nga buluhaton? Kon mao, ikaw nakapribilehiyo gayod. Sa pagkamatuod, pinaagi niining buluhatona nga ang “bililhong mga butang” ginakabig ni Jehova ngadto sa iyang balay. (Juan 6:44) Tinuod, may mga panahon nga ikaw kapoyon o mawad-ag kadasig. Usahay, ang uban—bisan taliwala sa matinumanong mga alagad ni Jehova—nakigbisog sa mga pagbati nga walay pulos. Apan ayaw pag-angka! Gilantaw ni Jehova ang matag usa sa iyang mga magsisimba nga bililhon, ug maikagon kaayo siya sa imong kaluwasan.—2 Pedro 3:9.

19. Unsang pagdasig ang gihatag ni Jehova pinaagi kang Hageo, ug sa unsang paagi kining mga pulonga makapadasig kanato?

¹⁹ Kon kita mawad-ag kadasig, tungod ba kaha sa pagsupak o sa ubang dili-maayong mga kahimtang, ang mga pulong ni Jehova ngadto sa gipapauli nga mga Hudiyo makahatag ug kalig-on. Diha sa Hageo 2:4-6, atong mabasa: “‘Apan karon magmalig-on, Oh Zorobabel,’ nagaingon si Jehova, ‘ug magmalig-on, Oh Josue nga anak ni Jehozadak nga hataas nga saserdote. Ug magmalig-on, kamong tanan sa yuta,’ nagaingon si Jehova, ‘ug pagbuhat. Kay ako magauban kaninyo,’ nagaingon si Jehova sa mga panon. ‘Hinumdomi ang butang nga akong gisaad kaninyo sa nanggula kamo gikan sa Ehipto, ug sa dihang ang akong espiritu nagbarog taliwala kaninyo. Ayawg kahadlok.’ Kay mao kini ang giingon ni Jehova sa mga panon, ‘Ngani sa makausa pa—sa diyutay na lamang nga panahon—ug uyogon ko ang mga langit ug ang yuta ug ang dagat ug ang mamala nga yuta.’” Matikdi nga dili lamang gitambagan kita ni Jehova nga magmalig-on kondili nagtagana usab kanato ug mga paagi aron makabaton ug kalig-on. Sa unsang paagi? Matikdi ang mga pulong nga makahatag ug pagsalig: “Ako magauban kaninyo.” Pagkamakapalig-on sa pagtuo ang pagkahibalo nga bisan unsa pay kakulian nga atong maatubang, si Jehova nagauban kanato!—Roma 8:31.

20. Sa unsang paagi nagkapuno karon sa dili-hilabwan nga himaya ang balay ni Jehova?

²⁰ Si Jehova nakapamatuod gayod nga siya nagauban sa iyang katawhan. Gani, mao gayod kanay nahitabo sumala sa iyang gisulti ngadto kang manalagnang Hageo: “Ang himaya niining ulahi nga balay molabaw pa niadtong una . . . Ug niining dapita igahatag ko ang pakigdait.” (Hageo 2:9) Sa pagkatinuod, ang kinalabwang himaya karon makaplagan diha sa espirituwal nga templo ni Jehova. Ngani, ginatos ka linibo ang nagaganayan ngadto sa matuod nga pagsimba matag tuig. Sila maayong pagkapakaon sa espirituwal nga paagi, ug bisan niining magubot nga kalibotan, sila nagatagamtam ug pakigdait nga malabwan lamang nianang masinatian diha sa bag-ong kalibotan sa Diyos.—Isaias 9:6, 7; Lucas 12:42.

21. Unsay angay natong determinasyon?

²¹ Ang pag-uyog ni Jehova sa mga nasod sa Armagedon anaa lamang sa unahan. (Pinadayag 16:14, 16) Busa atong gamiton ang nahibiling panahon aron sa pagtabang sa pagluwas ug mas daghang kinabuhi. Hinaot nga magmalig-on kita ug magbaton ug bug-os nga pagsalig kang Jehova. Maoy atong determinasyon nga magpadayon sa pagsimba diha sa iyang dakong espirituwal nga templo, nga magapuno niini ug mas daghan pang “bililhong mga butang” hangtod si Jehova moingon nga ang atong buluhaton natapos na.

[Mga footnote]

Nahinumdom Ka Ba?

• Unsa ang mas bililhon kang Jehova kay sa materyal nga mga butang?

• Ang giula nga dugo ni Jesus nakahatag ug kaayohan sa unsang duha ka pundok sa mga tawo?

• Kinsa ang “bililhong mga butang” nga magapuno sa balay ni Jehova sa himaya?

• Unsay atong pamatuod nga nagakatuman na karong adlawa ang tagna ni Hageo?

[Mga pangutana]

[Diagram sa panid 16]

(Alang sa aktuwal nga pagkahan-ay, tan-awa ang publikasyon)

Nahibalo ka ba sa simbolikong kahulogan sa karaang templo ni Jehova?

Labing Balaan

Tabil

Balaan

Halaran

Kayda

Sawang

[Hulagway sa panid 17]

Ang hataas nga saserdote naghalad ug torong baka alang sa mga sala sa mga saserdote ug kanding alang sa mga sala sa dili-saserdote nga mga banay sa Israel

[Hulagway sa panid 18]

Ang tibuok-kalibotang pagsangyaw sa Gingharian nga buluhaton nagakabig ug daghan kaayo ngadto sa balay ni Jehova