SA KAPANAHONAN sa Bibliya, ang lalaki o ang iyang pamilya mobayad ug bugay sa pamilya sa babaye kon magkauyon ang ilang pamilya nga magminyo sila. Ang bugay puwedeng kuwarta, hayop, o butang nga naay kantidad. Puwede pod ning trabahoan, parehas sa gihimo ni Jacob nga mitrabaho para sa amahan ni Raquel sulod sa pito ka tuig aron iyang maminyoan si Raquel. (Gen. 29:17, 18, 20) Para unsa man ang bugay?

Ang eskolar sa Bibliya nga si Carol Meyers miingon: “Tingali, ang bugay ibayad ngadto sa pamilya sa babaye kay dili na siya makatabang sa pagtrabaho, nga importante sa mga pamilya [nga pagpanguma ang panginabuhi].” Ang bugay tingali makatabang pod nga magkasuod ang pamilya sa lalaki ug pamilya sa babaye. Importante nâ aron magkatinabangay sila panahon sa kalisdanan. Dugang pa, ang bugay magpamatuod nga ang babaye kaslonon na ug hapit na siyang mailalom sa pag-atiman ug proteksiyon sa iyang bana.

Ang pagbayad ug bugay wala magpasabot nga ang babaye morag butang nga puwedeng paliton o ibaligya. Ang librong Ancient Israel—Its Life and Institutions miingon: “Kining pagbayad ug kuwarta, o katumbas niini, ngadto sa pamilya sa babaye, kon tan-awon morag pagpalit sa Israelinhong babaye. Pero posible nga ang [bugay] ihatag ngadto sa pamilya, dili ingong bayad para sa babaye, kondili ingong hulip sa nawala niya nga serbisyo.”

Sa ubang nasod, naa pa gihapoy nagsunod sa tradisyon nga mobayad ug bugay. Dihang ang Kristohanong mga ginikanan mangayog bugay, ilang ‘ikapakita sa tanan ang ilang pagkamakataronganon’ kon dili sila mangayog dako kaayong bugay. (Filip. 4:5; 1 Cor. 10:32, 33) Pinaagi niini, mapakita nila nga dili sila “mahigugmaon sa kuwarta,” o hakog. (2 Tim. 3:2) Dugang pa, kon ang Kristohanong ginikanan dili mangayog dako kaayong bugay, ang lalaki dili mapugos nga dugaydugayon ang kasal kay kinahanglan pa siyang magtigom ug pangbayad. O kaha ang lalaki dili mapugos nga moundang ug payunir aron mangitag full-time nga trabaho ug makatigom ug kuwarta nga pangbayad sa dako kaayong bugay.

Sa ubang parte sa kalibotan, ang gobyerno naay mga balaod nga nagkontrol sa kantidad sa bugay nga pangayoon. Niana nga kahimtang, ang Kristohanong mga ginikanan mosunod sa maong mga balaod. Ngano? Kay ang Pulong sa Diyos nagsugo sa mga Kristohanon nga “magpasakop sa labaw nga mga awtoridad” ug mosunod sa mga balaod nga dili supak sa balaod sa Diyos.—Roma 13:1; Buh. 5:29.