Relasyon sa Pamilya ug Panaghigalaay
Daghan ang nalisdan sa pagmentinar ug maayong relasyon sa uban. Niay pipila ka prinsipyo sa Bibliya nga makatabang nimo.
AYAW PAGHINAKOG
PRINSIPYO SA BIBLIYA: “Magtan-aw dili lang sa kaugalingong kaayohan, kondili sa kaayohan sab sa uban.”—Filipos 2:4.
ANG GIPASABOT NIINI: Makabaton tag maayong relasyon sa uban kon magpokus ta sa kon unsay atong mahatag kanila, dili sa kon unsay ilang mahatag kanato. Kon maghinakog ka, madaot nimo ang imong relasyon sa uban. Pananglitan, ang hakog nga kapikas posibleng magluib sa iyang bana o asawa. Dugang pa, walay ganahang makighigala sa tawo nga magsigeg panghambog sa iyang mga nabatonan o nahibaloan. Ang librong The Road to Character nag-ingon nga “kadtong kaugalingon ray gihunahuna makaagom ug daghang problema.”
ANG IMONG MAHIMO:
-
Tabangi ang uban. Ang maayong managhigala may pagsalig sa usag usa ug magtinabangay. Base sa pipila ka pagtuon, kadtong matinabangon sa uban dili kaayo mag-antos sa depresyon ug mas may kompiyansa sa kaugalingon.
-
Magpakitag empatiya. Ang empatiya nagpasabot nga gibati nimo ang kasakit nga gibati sa uban. Kon magpakita kag empatiya, malikayan nimo ang pagsultig mga pulong nga makapasakit sa uban, sama sa mga panginsulto o sakit nga mga komedya.
Kon magpakita kag empatiya, makapailob sab ka sa uban. Busa ang empatiya makatabang nimo nga dili magpihigpihig; makatabang sab ni sa pagbaton ug mga higala nga lainlaig kultura o kagikan.
-
Paggahig panahon para sa uban. Kon mogahin kag panahon nga makig-uban sa uban, mas mailhan nimo sila. Importante ang maayong panag-estoryahay aron makabaton ug tinuod nga mga higala. Busa paminaw dihang moestorya sila. Magpakitag interes sa mga butang nga ilang gikabalak-an. Sumala sa usa ka pagtuon, ang tarong o seryoso nga panag-estoryahay makapalipay sa mga tawo.
MAGMAALAMON SA PAGPILIG HIGALA
PRINSIPYO SA BIBLIYA: “Ang daotang pakig-uban makadaot sa maayong tinamdan [o, moralidad].”—1 Corinto 15:33, footnote.
ANG GIPASABOT NIINI: Ang imong mga kauban makaimpluwensiya nimo sa paghimog maayo o daotan. Miingon ang mga sociologist nga ang imong mga higala mahimong makaapektar sa imong kinabuhi. Pananglitan, miingon sila nga kon pirme kang makig-uban sa mga hinigarilyo o niadtong nakigbulag sa ilang mga kapikas, posible nga makakat-on sab ka sa pagpanigarilyo o makigbulag pod ka sa imong kapikas.
ANG IMONG MAHIMO: Pakighigala sa mga tawo nga nagpakitag mga hiyas ug prinsipyo nga gusto nimong sundogon. Pananglitan, pakig-uban sa mga tawo nga nag-amping nga dili makapasakit sa uban, matinahoron, mahinatagon, ug maabiabihon.
UBAN PANG PRINSIPYO SA BIBLIYA
Tan-awa ang binase sa Bibliya nga mga video nga gidisenyo para sa mga magtiayon, tin-edyer, ug mga bata nga makatabang aron mas magmalipayon ang pamilya
LIKAYI ANG SAKIT NGA SINULTIHAN.
“Ang mga pulong nga wala hunahunaa samag dunggab sa espada.”—PROVERBIO 12:18.
MAGMAHINATAGON.
“Ang tawong mahinatagon mouswag.”—PROVERBIO 11:25.
TRATARA ANG UBAN SA PAAGI NGA GUSTO NIMONG TRATARON KA.
“Buhata sa uban ang tanan nga gusto ninyong buhaton nila kaninyo.”—MATEO 7:12.
Basin Ganahan Pod Ka
PAGMATA!
Unsa ang Tinuod nga Higala?
Ang kadaghanan nagtuo nga importante nga dunay tinuod nga mga higala. Unsay imong himoon aron mahimo kang tinuod nga higala sa uban? Gihisgotan niining artikuloha ang upat ka gabayan nga mga prinsipyo nga makita diha sa Bibliya.
