Dihang ikaw ug ang imong kapikas maghisgot ug problema, ang inyo bang panag-estorya matapos nga nangasuko mo? Kon mao, ikaw dunay mahimo aron ang inyong panag-estorya dili moresultag away. Pero, una, dunay mga butang nga kinahanglan nimong mahibaloan bahin sa magkalahi nga paagi sa pagpakig-estorya sa mga lalaki ug babaye. *

Ang mga babaye gustong makig-estorya una bahin sa problema ayha pa ang solusyon. Gani, may panahon nga ang pagpakig-estorya mao ray solusyon.

“Mogaan ang akong pamati dihang masulti nako ang akong pagbati ug dihang mahibalo nga ang akong bana nakasabot kanako. Human niana, OK na ko—sagad mga pipila lang ka minutos human makig-estorya.”—Sirppa. *

“Di ko mahimutang kon dili nako masulti sa akong bana ang akong gibati. Kon makasulti na ko, linaw na akong hunahuna.”—Ae-Jin.

“Mora kog detektib. Samtang makig-estorya, akong analisahon pag-ayo ang problema ug palandongon kon unsay hinungdan niini.”—Lurdes.

Kadaghanan sa mga lalaki mangita dayon ug solusyon. Masabtan kana, kay ang pagpangitag solusyon mopabati sa lalaki nga siya dunay silbi. Ang paghatag ug solusyon maoy paagi sa bana sa pagpakita sa iyang asawa nga siya makasalig kaniya. Busa ang bana maglibog kon ang iyang solusyon dili dawaton. “Dili ko makasabot kon nganong maghisgot ka ug problema nga dili man diay ka gusto ug solusyon!” miingon ang bana nga si Kirk.

Pero “pagpakita una ug pagkamasinabtanon una pa manambag,” nagpasidaan ang librong The Seven Principles for Making Marriage Work. “Isulti sa imong kapikas nga ikaw nakasabot sa situwasyon una pa mohatag ug solusyon. Sagad,  ang imong kapikas wala mangayo kanimo ug solusyon—gusto lang niya nga mamati ka.”

Para sa mga bana: Batasana ang pagpamatig maayo ug magmabination. Ang banang si Tomás miingon: “Usahay human mamati maghunahuna ko, ‘Morag wala ra man koy nahimo.’ Pero mao ra kanay gusto sa akong asawa—nga dunay maminaw kaniya.” Uyon niana si Stephen. “Mas maayong pasultihon una nako ang akong asawa nga dili ko mosalga,” siya miingon. “Sagad, human niyag sulti, iya kong sultihan nga OK na siya.”

Sulayi kini: Sa sunod nga maghisgot kamo ug problema sa imong asawa, ayaw dayon panambag kon kini wala pangayoa. Tan-awa siya sa mata ug pamati pag-ayo sa iyang isulti. Yango-yango pod. Isultig balik ang iyang gisulti sa pagpakita nga ikaw nakasabot. “Usahay gusto lang sa akong asawa nga mahibalo nga nakasabot ko niya ug nga ako nagpaluyo kaniya,” matod ni Charles.—Prinsipyo sa Bibliya: Santiago 1:19.

Para sa mga asawa: Isulti kon unsay imong gusto. “Tingali nagtuo kita nga ang atong mga bana nahibalo kon unsay atong gusto,” matod ni Eleni, “pero may higayon nga kinahanglan nato kining isulti.” Si Ynez misugyot: “Mahimong mosulti ko, ‘Dunay nakahasol nako, ug gusto nako nga pamatian ko nimo. Dili kinahanglang imo kining sulbaron, gusto lang nako nga imo kong sabton.’”

Sulayi kini: Kon ang imong bana mohatag dayon ug solusyon, ayaw paghinapos nga siya dili sensitibo sa imong gibati. Lagmit gusto lang siyang motabang nimo. “Imbes masuko,” miingon si Ester, “Hunahunaon nako nga ang akong bana nahingawa ug gustong mamati apan gusto sab siyang motabang.”—Prinsipyo sa Bibliya: Roma 12:10.

Para sa duha: Gusto natong trataron ang uban sa paagi nga gusto nato nga kita trataron. Apan, aron maestoryahan sa maayong paagi ang problema, kinahanglan nga imong konsiderahon kon unsay gusto sa imong kapikas nga itratar kaniya. (1 Corinto 10:24) Si Miguel miingon: “Kon bana ka, pamati pod. Kon asawa ka, pamati usahay ug mga solusyon. Kon andam mo nga magsakripisyo, kamong duha makabenepisyo.”—Prinsipyo sa Bibliya: 1 Pedro 3:8.