Kada tuig, binilyong kahoy ang gipamutol aron ang kadaghanan sa yuta himoong umahan. Sukad sa katuigan sa mga 1940, katunga na sa mga lasang sa kalibotan ang nahanaw.

Dihang madaot ang lasang, mangamatay pod ang mga tanom ug hayop nga naa niini.

Ang ubang lasang nga gipamutlag daghang kahoy naulian ug milapad pa gani. Di pa dugay, giobserbahan sa mga ecologist ang nangaupaw nga mga lasang. Nakurat sila kay bisag wala ni tamni, nanubo ang daghan kaayong kahoy ug naulian ang lasang. Konsideraha ni nga mga pananglitan:

• Naay mga lasang nga gipamutlag kahoy aron himoong umahan ug gibiyaan sa ulahi. Ug giobserbahan ni sa mga researcher. Human maobserbahi ang 2,200 ka luna niana nga yuta sa North ug South America ug sa West Africa, nakita nila nga ang yuta naulian ra sulod sa 10 ka tuig ug gituboan pag-usab ug daghan kaayong kahoy.

• Gibanabana sa mga researcher nga sulod sa mga 100 ka tuig, ang mga lasang maulian ra ug mabalik sa iyang orihinal nga hitsura nga naay klaseklaseng kahoy, tanom, ug hayop, sumala sa usa ka pagtuon nga gi-publish sa Science magazine.

• Di pa dugay, giobserbahan sa mga scientist sa Brazil kon unsa ka paspas matuboan ug mga kahoy ang mga lugar nga gipasagdan lang, ug gikompara ni sa mga lugar nga gitamnag kahoy sa mga tawo.

• Base sa pagtuon sa mga researcher, ang National Geographic mireport: “Lipay kaayo sila kay dili na diay kinahanglang magtanom ug mga kahoy.” Sulod lang sa lima ka tuig, ang mga lugar nga gipasagdan lang “napuno nag daghang kahoy.”

Sa tibuok kalibotan, gipaningkamotan sa mga tawo nga maprotektahan ang mga lasang ug ayohon kadtong mga nadaot. Ingong resulta, sumala sa news sa United Nations, “ang pagkaupaw sa mga lasang sa tibuok kalibotan namenosan ug kapin sa 50 porsiyento” sa milabay nga 25 ka tuig.

Pero bisan pa sa maong mga paningkamot, dili ni igo aron maulian ang mga lasang. “Ang gidaghanon sa mga lasang nga nadaot wala gihapon maulii bisan sa miaging mga tuig,” mireport ang organisasyon nga Global Forest Watch.

Ang illegal logging gihimong negosyo sa mga kompaniya aron makakuwarta silag bilyonbilyon, ug tungod ani nangaupaw ang mga lasang.

“Gipatubo ni Jehova a nga Diyos diha sa yuta ang tanang kahoy nga nindot tan-awon ug may bunga nga maayong kaonon.”—Genesis 2:9.

Ang Maglalalang nagdisenyo sa mga lasang nga naay natural nga abilidad nga maulian bisag gigamit ni sa mga tawo para sa ilang panginahanglan. Gusto niya nga maayo ang kahimtang sa mga lasang ug magpabilin ang maayo kaayo nga pagkadisenyo nga ecosystem.

Gipakita sa Bibliya nga dili tugotan sa Diyos nga daoton sa hakog nga mga tawo ang atong planeta ug ang tanang kinabuhi nga naa niini. Tan-awa ang artikulong “Ang Diyos Nagsaad nga Maulian ang Atong Planeta,” sa panid 15.