SA TANANG mananap, buaya ang nasukod nga kinakusgan ug paak. Pananglitan, ang buaya sa dagat, nga nanimuyo duol sa Australia, halos tulo ka pilo nga mas kusgan ug paak kay sa leyon o tigre. Gawas pa, ang apapangig sa buaya sensitibo usab kaayo—mas sensitibo pa kay sa tumoy sa tudlo sa tawo. Nganong sensitibo man kini nga puwerte mang bagaa sa panit niini?

Ang apapangig sa buaya dunay libolibong sense organ. Human kini masusi sa tigpanukiduki nga si Duncan Leitch, siya miingon: “Ang matag nerve ending molusot diha sa usa ka lungag sa bagolbagol.” Kini nga pagkahan-ay makahatag ug proteksiyon sa mga nerve fiber diha sa apapangig ug makahimo usab sa ubang bahin sa apapangig nga mas sensitibo nga dili arang masukod ug instrumento. Tungod niini, ang buaya makahibalo kon ang anaa sa iyang baba pagkaon ba o dili. Busa madala sa baye nga buaya ang iyang mga anak diha sa iyang baba nga dili ra maunsa. Ang kombinasyon sa kusog ug pagkasensitibo sa apapangig sa buaya talagsaon kaayo.

Unsay imong hunahuna? Ang apapangig ba sa buaya mitungha pinaagig ebolusyon? O kini ba gidisenyo?