Sumala sa mga eksperto sa balaod sa China, ang mga bata mas nameligrong abusohan kon sila dili dayon edukahon sa ilang ginikanan bahin sa sekso. Mga 8,000 ka sumbong sa mga pag-abusog bata ang giatiman sa mga abogado sa gobyerno sa China sa milabayng upat ka tuig. Ang mga bata “huyang ug daling mabiktima” matod sa propesor sa balaod sa Beijing Normal University. “Edukasyon ang solusyon aron malikayan ang seksuwal nga mga pag-atake.”

ANG GIINGON SA BIBLIYA: Tudloan sa maalamong ginikanan ang ilang mga anak kon unsaon pagpanalipod sa ilang kaugalingon “gikan sa tawo nga nagasulti ug hiwi nga mga butang.”​—Proverbio 2:1, 10-12.

Sa usa ka pagtuon, ang aberids sa mga batang babaye nga masuso nga namatay sa Pilipinas human sa bagyo 15 ka pilo nga mas daghan kay sa namatay panahon sa bagyo. Pipila sa posibleng hinungdan mao ang pagkawalay trabaho human sa bagyo, gastos sa pagtukod pag-usab ug balay, paagi sa pag-atiman sa panginahanglan sa mga batang babaye, lakip ang nutrisyon ug panglawas.

ANG GIINGON SA BIBLIYA: ‘Hatagi ninyog pagkaon ang mga gigutom, papuy-a ninyo sa inyong balay ang mga kabos nga walay puloy-anan, ug bistihi ninyo ang hubo.’—Isaias 58:7, Maayong Balita Biblia.

Sa 2011, kapin sa 25% sa mga nagpakamatay sa South Korea nag-edad ug 65 pataas. Gibasol sa mga tigdukiduki ang pagkausab sa tinamdan sa pag-atiman ug mga tigulang ug ang kalisod sa panginabuhi—mga 50% sa mga tigulang didto nagpuyo sa kalisod. Halos katunga sa molupyo karon sa South Korea nagtuo nga angayng suportahan sa mga anak ang tigulang nilang ginikanan.

ANG GIINGON SA BIBLIYA: “Pasidunggi ang imong amahan ug ang imong inahan.”—Efeso 6:2.