Si al-Khwarizmi nagsulat sa praktikal nga gamit sa mga decimal. Gibatbat ug gipakaylap usab niya ang usa ka paagi sa pagsulbad sa pipila ka problema bahin sa matematika. Gipatin-aw niya kini nga paagi diha sa iyang libro nga The Book of Restoring and Balancing. Gani, ang pulong al-jabr sa ulohan niini nga Arabic, Kitab al-jabr wa’l-muqabala, maoy gibasehan sa Iningles nga pulong algebra. Ug matod pa sa usa ka magsusulat sa siyensiya nga si Ehsan Masood, ang algebra mao “ang bugtong importanteng gamit sa matematika nga naimbento sukad, ug dakog tabang sa tanang natad sa siyensiya.” *

“Daghang henerasyon sa estudyante sa hayskul nag-ingon nga wala na lang unta maghasol si [al-Khwarizmi],” pasiaw sa usa ka awtor. Bisag unsa pay ilang isulti, si al-Khwarizmi miingon nga tumong niya nga ipatin-aw ang  mga paagi aron mapasayon ang pagkuwenta diha sa komersiyo, pagbahin sa panulondon, pagsurbi, ug uban pa.

Kasiglohan sa ulahi, si al-Khwarizmi gidayeg sa mga matematiko sa Kasadpan sama ni Galileo ug Fibonacci tungod sa iyang tin-awng eksplinasyon bahin sa mga equation. Tungod sa mga pagpatin-aw ni al-Khwarizmi, mas pang natun-an ang algebra, arithmetic, ug trigonometry. Sa tabang sa trigonometry, nakalkulo sa mga eskolar sa Tungang Sidlakan ang sukod sa anggulo ug mga kilid sa triyanggulo ug napauswag ang pagtuon sa astronomiya. *

Ang nagsunod sa paagi ni al-Khwarizmi nakaimbentog pamaagi sa paggamit ug decimal fraction ug nakamugnag mga teknik sa pagsukod sa gilapdon, gidak-on, ug gidaghanon. Nakauna paggamit niini nga pamaagi ang mga arkitekto ug magtutukod sa Tungang Sidlakan kay sa mga taga-Kasadpan, nga nahibalo lang niini panahon sa mga Krusada. Gidala nila ang maong kahibalo pagpauli nila, sa tabang sa mga bihag nga edukadong Muslim ug mga langyaw.

Ngadtongadto, ang mga libro ni al-Khwarizmi gihubad sa Latin. Ang Italyanong matematiko nga si Fibonacci (c. 1170-1250), nga gianggaan usab ug Leonardo of Pisa, maoy giila nga nagpakaylap sa Hindu-Arabic nga numero ngadto sa Kasadpan. Nakakat-on siya niini dihang mibiyahe siya sa Mediteranyo ug wala madugay iyang gisulat ang librong Book of Calculation.

Gatosan ka tuig una ang milabay ayha pa mikaylap ang mga eksplinasyon ni al-Khwarizmi. Pero karon, ang iyang pamaagi ug ang mga matematika nga naimbento gikan niini maoy nahimong pundasyon sa siyensiya ug teknolohiya, lakip sa komersiyo ug industriya.