ANG “Emerald Isle” gilangkoban ug duha ka nasod: ang dako mao ang independenteng Republic of Ireland, ug ang gamay mao ang Northern Ireland, nga bahin sa United Kingdom.

Ang Ireland gitawag ug Emerald Isle tungod kay lunhaw kaayo ang mga tanom sa maong dapit gumikan sa abundang ulan. Ang nindot nga mga lanaw ug mga suba, lakip sa kapatagan duol sa dagat ug sa kabukiran nakadugang sa katahom niini.

Ang mga Irish nakaagig daghang grabeng kalisod. Pananglitan, gibanabana nga sa mga 1845 hangtod 1851, mga usa ka milyon ang nangamatay sa kagutom ug sa sakit dihang gidangan ang mga pananom nga patatas. Aron mahaw-as sa grabeng kakabos, daghan ang nanglalin ngadto sa Australia, Britain, Canada, ug United States. Karon, mga 35 ka milyong Amerikano dunay dugo nga Irish.

Ang mga Irish ilado nga mahigalaon ug maabiabihon. Paborito nilang pasatiempo ang pagsakayg kabayo ug mga team sport, sama sa cricket, rugby, saker (gitawag nila ug potbol), ug Gaelic football (susama sa saker). Ang mga babaye gusto kaayog team sport nga gitawag camogie, nga parehas sa field hockey.

 Ang mga tawo sa Ireland hingestorya, ug gustog musika. Ang Irish step dance popular sa tibuok kalibotan. Ang ibabaw nga bahin sa lawas sa mga mananayaw magtul-id lang samtang nag-undak-undak ang ilang mga tiil.

Kapin na sa usa ka gatos ka tuig nga dunay mga Saksi ni Jehova sa Ireland. Karon, duna nay kapin sa 6,000 ka Saksi ang nagpuyo didto ug aktibo sa pagpanudlo bahin sa Bibliya.