Kon ikaw ug ang imong kapikas maglalis, sagad balik-balikon ninyo ang nangaging mga kahiubos nga angay untang nahusay na. Ang problema? Usa kaninyo o kamong duha dili makamaong mopasaylo.

Mahimo kang makakat-on sa pagpasaylo. Apan palandonga una kon nganong ang bana ug asawa maglisod sa pagpasaylo sa usag usa.

Kontrol. Ang ubang bana ug asawa dili mopasaylo aron mabut-an nilag diyutay ang ilang kapikas. Dayon kon maglalis na pod sila, gamiton nila ang nangaging sayop agig pangbalos.

Kasuko. Ang mga samad tungod sa nangaging kasaypanan mahimong dugay maalim. Ang kapikas tingali moingon ‘Gipasaylo ti ka’ pero naglungot-lungot gihapon ug tingali gusto pa ganing manimalos.

Kahigawad. Ang ubang tawo mosulod sa kaminyoon nga magtuo nga kini samag mga estorya sa nobela nga kanunayng malipayon. Busa kon sila mag-away, walay magpadaog kanila, ug dili sila makasabot kon nganong ang tawo nga abi nilag bagay kaayo nila lahig panglantaw. Tungod sa dili realistikong mga pagdahom, sila motan-aw sa sayop ug maglisod sa pagpasaylo.

Sayop nga pagsabot. Ang ubang kapikas dili mopasaylo kay sayop ang ilang pagsabot niini. Pananglitan:

Kon mopasaylo ko, gibalewala nako iyang sayop.

Kon mopasaylo ko, angay nakong kalimtan ang nahitabo.

Kon mopasaylo ko, iya na pod unya kong pasakitan.

Ang tinuod, ang pagpasaylo wala magpasabot ug bisan hain nianang sa ibabaw. Bisan pa niana, lisod gihapong magpasaylo—ilabina diha sa suod nga relasyon sa bana ug asawa.

Sabta kon unsay kahulogan sa pagpasaylo. Sa Bibliya, ang pulong “pagpasaylo” usahay magkahulogan ug “pagpalabay.” Busa, ang pagpasaylo usahay wala magkahulogan nga imo na lang kalimtan ang nahitabo o ibalewala ang sayop. May mga panahon nga kini magkahulogan nga kinahanglang imo na lang palabyon ang mga kasaypanan, alang sa imong kaayohan ug sa kaayohan sa imong kaminyoon.

Hunahunaa ang mga epekto sa dili pagpasaylo. Ang ubang eksperto nag-ingon nga ang paghambin ug kasuko makahatag nimog pisikal ug emosyonal nga mga problema, sama sa depresyon ug pagtaas sa presyon sa dugo, ug makadaot pa gyod kini sa imong kaminyoon. Husto ang Bibliya sa pag-ingon: “Magmaluloton sa usag usa, magmalumo uban ang pagkamabination, kinabubut-on nga magpasaylo sa usag usa.”—Efeso 4:32.

Hunahunaa ang mga benepisyo sa pagpasaylo. Ang pagkamapinasayloon makatabang nimo nga dili maghunahuna nga gituyo sa imong kapikas nga pasakitan ka ug makatabang pod nga dili ka mag-ihap sa iyang mga sayop. Makatabang usab kini kanimo sa pagpangitag mga paagi sa pagkontrolar sa imong kasuko ug sa pagpalambo sa gugma.—Prinsipyo sa Bibliya: Colosas 3:13.

Magmarealistiko. Mas dali kang makapasaylo kon imong dawaton ang iyang bug-os nga pagkatawo, hasta ang iyang mga kahuyangan. Ang librong Fighting for Your Marriage nag-ingon nga kon kasaypanan ra sa imong kapikas ang imong hunahunaon, dili na nimo makita ang iyang maayong mga hiyas. Busa ang maong libro nangutana: “Hain niini ang gusto nimong hunahunaon kanunay?” Hinumdomi, walay usa nga hingpit, hasta ka.—Prinsipyo sa Bibliya: Santiago 3:2.

Magmakataronganon. Sa sunod nga masakitan ka sa gibuhat o gisulti sa imong kapikas, pangutan-a ang imong kaugalingon: ‘Dako ba gyod kaayo kini nga butang? Kinahanglan ba gyod siyang mangayog pasaylo nako, o palabyon na lang nako kini?’—Prinsipyo sa Bibliya: 1 Pedro 4:8.

Kon gikinahanglan, estoryahi ninyo ang nahitabo. Kalmadong isulti sa imong kapikas kon unsay nakapasakit nimo ug nganong ingon niana ang imong gibati. Ayawg hunahunaa nga ang imong kapikas dunay daotang motibo o ayaw iinsistir ang imong opinyon kay makapahagit lang kini kaniya. Isulti lang niya ang imong gibati sa iyang gihimo.