DUNAY mga langgam nga makautaw-utaw sa hangin nga dili kaayo mamuwersa. Ang talagsaong pananglitan niana mao ang wandering albatross. Ang iyang pako kon bukhad moabot ug 11 piye, ug kining langgama motimbang ug mga 8.5 kilos ug makalupad ug libolibo ka kilometros nga dili mogamit ug daghang enerhiya! Ang sekreto anaa sa iyang lawas ug teknik sa paglupad.

Hunahunaa: Dihang maglupad, gamiton sa albatross ang iyang talagsaong pagkadisenyo nga mga tendon nga magpaungot sa pako dihang mabukhad na, busa ang iyang maskulo dili mamuwersa. Dugang pa, siya makautaw-utaw ug daghang oras tungod kay suheto siya sa dagan sa hangin.

Sa dagat, ang albatross balik-balik nga mosaka, mobiyo, ug mopaubos—usa ka paagi sa paglupad nga makahatag sa langgam ug igong buylo bisan pa sa pagbutad sa hangin. Bag-o pa lang nadiskobrehan sa mga siyentista kon giunsa kini paghimo sa albatross. Pinaagi sa paggamit ug high-resolution tracking device ug espesyal nga programa sa computer, ilang nakita nga ang albatross makakuhag puwersa sa dihang siya mobiyo gikan sa iyang pagsungsong sa hangin ug mosakay niini paubos. Ang iyang “pagkuhag puwersa . . . hanoy ug walay bugto,” matod pa sa mga siyentista. Ang resulta? Ang albatross makalupad sa daghang oras nga dili magkapa-kapa sa iyang pako!

Kini nga kahibalo basin makatabang sa mga inhenyero sa paghimog sakyanan sa kahanginan nga dili kalas ug tubil, o makalupad nga walay makina.

Unsay imong hunahuna? Ang dili kalas ug enerhiya nga paglupad sa albatross ug ang linaing pagkagama nga parte sa iyang lawas mitungha ba pinaagig ebolusyon? O kini ba gidisenyo?