“Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.”—Mateo 5:28.

KON NGANONG ANGAY NIMO KINING SAYRON

Ang pornograpiya popular karon ug daling mabatonan. Kon buot nimong mapahimut-an ang Diyos ug magmalipayon, kinahanglang mahibalo ka kon unsay hunahuna sa Diyos bahin niini.

ANG GIINGON SA BIBLIYA

Ang Bibliya wala direktang maghisgot ug pornograpiya. Apan ang pagtan-aw ug pornograpiya supak sa daghang prinsipyo sa Bibliya.

Pananglitan, ang Bibliya prangkang nag-ingon nga kon ang tawong minyo “magpadayon sa pagtan-aw sa usa ka babaye” nga dili niya asawa, nga makapukaw sa iyang tinguha sa pagpakigsekso kaniya, kini mahimong moresultag pagpanapaw. Kini nga prinsipyo sa Bibliya aplikado sa tanan, minyo o dili, kinsa ‘padayong magtan-aw’ ug pornograpiya nga may tinguha sa paghimog imoralidad. Kini nga buhat dayag nga dulumtanan sa Diyos.

“Patya ang inyong mga sangkap sa lawas . . . maylabot sa pakighilawas, kahugawan, seksuwal nga gana, makadaot nga tinguha, ug hakog nga pangibog.”—Colosas 3:5.

 ANG GIINGON SA MGA TAWO

Ang ubang tigdukiduki dili motuo nga ang pagtan-awg pornograpiya mahimong moresulta ug malaw-ayng mga buhat. Apan dili ba ang pagtan-aw pa lang daan ug pornograpiya malaw-ay na?

ANG GIINGON SA BIBLIYA

Gipadayag sa Bibliya nga ang “malaw-ay nga pagpanistis” o komedya dili dalawaton. (Efeso 5:3, 4) Kon mao, labaw na ang pornograpiya, dili ba? Sagad, ang pornograpiya karon maoy mga hulagway o video sa aktuwal nga mga buhat sa pagpanapaw, homoseksuwalidad, ug ubang matang sa pakighilawas. Busa ang pagtan-aw niining mahilas kaayong mga buhat mas dulumtanan sa Diyos kay sa malaw-ay nga sinultihan.

Gidebatehan gihapon sa mga tigdukiduki kon ang kailibgon nga napukaw gumikan sa pagtan-awg pornograpiya mosangpot ba sa paghimog imoral nga buhat. Apan ang Bibliya klarong nag-ingon nga ang mismong pagtan-aw ug pornograpiya makadaot sa espirituwalidad ug dulumtanan gayod sa Diyos. Ang Bibliya nagtambag: “Patya ang inyong mga sangkap sa lawas . . . maylabot sa pakighilawas [ug] seksuwal nga gana.” (Colosas 3:5) Sukwahi niana ang ginahimo niadtong nagtan-awg pornograpiya—imbes patyon ang maong tinguha, ila hinuon kining gihalingan.

“Pangitaa ang maayo, ug dili ang daotan . . . Dumti ang daotan, ug higugmaa ang maayo.”—Amos 5:14, 15.

ANG GIINGON SA BIBLIYA

Ang Bibliya naghisgot ug mga tawong luag ug moralidad, mga palahubog, ug mga kawatan, kinsa milampos sa pagbiya sa ilang daotang mga buhat. (1 Corinto 6:9-11) Sa unsang paagi? Pinaagi sa pagpadapat sa kaalam sa Pulong sa Diyos, sila nakakat-on sa pagdumot sa daotan.

Matun-an ang pagdumot sa pornograpiya pinaagi sa pagpamalandong sa daotang mga epekto niining makadaot nga bisyo. Sumala pa sa panukiduki sa Utah State University, ang ubang tigtan-awg pornograpiya makasinatig depresyon, gustong mag-inusara, daot ug relasyon sa uban, ug makaagom ug ubang makapasubong mga epekto. Dugang pa, kay ang pagtan-aw ug pornograpiya dulumtanan man sa Diyos, kini dunay mas grabe pa nga epekto. Kini makapahilayo sa tawo gikan sa iyang Maglalalang.

Ang Bibliya makatabang kanato sa pagtuon sa paghigugma sa kon unsay maayo. Sa magsige kitag basa sa Bibliya, ang atong gugma sa mga prinsipyo niini mas modako. Kana nga gugma motabang kanato sa pagdumot sa pornograpiya ug sa pagbati sa gibati sa magsusulat sa Salmo kinsa miingon: “Dili ko ibutang sa atubangan sa akong mga mata ang bisan unsang butang nga walay hinungdan.”—Salmo 101:3.