Kon Unsay Mahimo sa Ginikanan
“Daghan ra kaayog estudyante ang klasrom! Ug kay wala may mga electric fan, ang klasrom init kaayo.”—Luis, Bolivia.
“Kay diyutay rag titser ang among eskuylahan, ang mga estudyante dili tagsatagsang matagad. Ang eskuylahan walay mga mapa, gamit sa laboratoryo, ug librarya.”—Dorcus, Myanmar.
“Ang kadaghanan sa akong titser naglisod sa pagkontrol sa klase. Usahay ang mga estudyante badlongon kaayo, nga nakapalisod ug samot sa pagtuon.”—Nina, South Africa.
ANG giingon sa ibabaw nagpakita nga ang ingon niini nga mga eskuylahan magpalisod ug samot sa mga estudyante sa pagkakat-on. Kon ginikanan ka, unsay imong himoon aron may makat-onan ang imong mga anak bisan pa niini nga mga problema? Aniay pipila ka sugyot.
Pangitag paagi.
Imbes hatagag dakong pagtagad ang mga problema, nga kadaghanan niini wala ka nay mahimo, tagda hinuon kon unsay imong mahimo. Kon ang imong anak daw naglisod sa usa ka subject o natensiyon tungod sa kadaghan sa homwork, hisgoti kini uban kaniya ug pangita kamog mga paagi sa pagsulbad niini. Pananglitan, nagkinahanglan ba siyag maayong lugar diha sa balay aron makatuon siyag maayo? Ang imo bang anak nagkinahanglag tabang sa paghimog eskedyul aron mauna paghimo ang labing importanteng mga asaynment? Mas maayo kaha kon siya dunay tutor? Alang sa dugang sugyot, pakigsulti sa titser sa imong anak. Isipa siya ingong imong higala, dili kaaway.
Ipasilsil sa imong anak ang katuyoan sa pag-eskuyla.
Ang tumong sa edukasyon mao ang pagtabang sa imong anak nga mahimong may katakos, responsableng hamtong, ug dili lang aron makakat-on sa pagpangitag kuwarta. Apan, sumala sa panukiduki, daghang batan-on nag-eskuyla tungod kay gusto silang madato. Ang Bibliya naghatag ug timbang nga panglantaw sa materyal nga mga butang. Bisan tuod ug miadmitir kini nga “ang salapi usa ka panalipod,” kini nagpasidaan usab nga kadtong “determinadong madato” dili makakaplag ug tinuod nga kalipay.—Ecclesiastes 7:12; 1 Timoteo 6:9.
Ang edukasyon makatabang sa imong anak nga mahimong may katakos, responsableng hamtong
Pasagdi nga ang imong anak makakat-on pinaagi sa pagkasinatig kalisod.
Daghang titser miingon nga kon lisod dumalahon ang mga estudyante, labaw nang lisod dumalahon ang mga ginikanan. Ang ubang ginikanan molaban dayon o moreklamo kon ang ilang anak badlongon o dili makakuhag taas nga grado. Pananglitan, ang magasing Time nagreport bahin sa usa ka propesora sa kolehiyo kinsa dunay mga estudyante nga “nagpalaban sa ilang ginikanan ug nanawag gikan sa klasrom pinaagig cellphone ug ilang gipasa kini ngadto kaniya, samtang nagkamulog tudlo, kay ang ginikanan gustong mangilabot. Ug giingnan siya sa ubang ginikanan nga sila naggastog dako sa edukasyon sa ilang anak ug gusto nila nga sila hatagan ug taas nga grado.”
Daghang titser miingon nga kon lisod dumalahon ang mga estudyante, labaw nang lisod dumalahon ang mga ginikanan
Ang maong mga ginikanan walay mahatag nga kaayohan sa ilang mga anak. Hinunoa, imbes tabangan ang ilang mga anak, ilang gipugngan sila sa “paghimog kaugalingong desisyon, pagsinatig kapakyasan, ug pag-atubang sa epekto sa sayop nga mga desisyon,” misulat si Polly Young-Eisendrath diha sa iyang librong The Self-Esteem Trap. Siya midugang: “Kon ang ginikanan maoy kanunayng magsulbad sa problema sa ilang anak ug ang anak magtungok ra ug walay himoon, ang ginikanan makakat-on sa pag-atubang sa mga problema pero ang anak dili, ilabina dihang siya magkinaugalingon na.”
Magmabalanse bahin sa edukasyon nga abton sa anak.
Sama sa gihisgotan na, ang edukasyon makatabang sa pag-andam sa imong anak aron mahimong responsableng hamtong. (Genesis 2:24) Apan nagkinahanglan bag daghang tuig sa pag-eskuyla aron maabot kana nga tumong?
Ayaw paghunahuna nga ang imong anak kinahanglang moeskuylag kolehiyo aron makakitag maayong trabaho. Dunay laing mga kapiliang edukasyon nga dili dakog gasto. Gani sa ubang kahimtang kadtong dunay naantigohang mga trabaho makakitag pangabuhian sama niadtong nakagraduwar ug kolehiyo.
Ang punto: Ang mga eskuylahan dili hingpit, ug ang mga bata makaatubang ug mga problema nga wala igdungog sa mga katuigang miagi. Apan pinaagi sa imong tabang, ang imong anak mahimong molampos sa pag-eskuyla! Hisgoti uban sa imong pamilya ang mga sugyot nga makita diha sa panid 3 hangtod 7 niining magasina.
