Nganong kinahanglang tun-an ang Bibliya? Hunahunaa kini:

Ang Bibliya makatabang kanimo nga makakaplag ug bahandi. Kining labing himalitan nga basahon

● Makatudlo kon unsay himoon aron mabatonan ang kinamaayohang kinabuhi

● Makahatag ug kasayoran bahin sa umaabot—ug sa nangagi—nga dili nimo mabatonan sa ubang basahon

● Makatabang aron mas mailhan nimo ang imong kaugalingon ug mahimong mas maayong tawo *

ANG pagtuon sa Bibliya nagkinahanglag kakugi, apan dako ang benepisyo! Gusto ka bang mahibalo kon unsay gihimo sa ubang batan-on? Guntinga ug pil-a ang mosunod nga panid. Karon, duna ka nay upat ka panid nga reperensiya nga magpakita kanimo kon sa unsang paagi ang ubang batan-on nagmalamposon ug nakapahimulos sa ilang personal nga pagtuon sa Bibliya.

“Ang impormasyon sa Bibliya maoy para sa tanan. Daghan kaayog pwedeng tun-an!”—Valerie. *

Aron makakuhag dugang artikulo sa seryeng “Mga Batan-on Nangutana,” i-download ang ubang gula sa Pagmata! gikan sa Web site nga www.isa4310.com

[Mga footnote]

 [Kahon/Mga hulagway sa panid 19, 20]

KON UNSAON PAGTUON SA BIBLIYA

Problema: DILI GANAHAN

“Kapoy magtuon ug usa ka oras.”—Lena.

Gikinahanglan: HUNAHUNAA ANG BENEPISYO

Aron ganahan kang magtuon sa Bibliya, kinahanglang tubagon nimo ang pangutanang, Unsa may akong makuhang benepisyo? Gusto ba nimong masuod ang Diyos, molalom ang imong pagsabot sa mga hitabo sa kalibotan, o mouswag ang imong personalidad? Ang Bibliya makatabang kanimo nianang bahina—apan dili lang kana!

“Ayawg isipa nga ang pagtuon sa Bibliya sama sa trabaho o leksiyon sa eskuylahan. Isipa nga usa kini ka paagi aron masuod ka sa kinalabwang Higala—si Jehova nga Diyos.”—Bethany.

“Sa pagtuon sa Bibliya, makagahin kag panahon kang Jehova. Kon makig-uban ka sa usa sa dihang presente lang ang imong ginikanan, kana bang tawhana imong higala o sa imong ginikanan? Kon duna kay personal nga pagtuon, mahimo nimong higala si Jehova.”—Bianca.

Hinumdomi: “Ang tanan diha sa Kasulatan maoy Pulong sa Diyos. Ang tanan diha niini mapuslanon sa pagtudlo ug sa pagtabang sa mga tawo ug sa pagtul-id kanila ug sa pagpakita kanila kon unsaon sa pagkinabuhi.” (2 Timoteo 3:16, Contemporary English Version) Ang Bibliya makatabang kanimo nianang paagiha usab!

“Naningkamot ko sa pagsentro sa akong hunahuna diha sa mga benepisyo. Kon duna koy kinahanglang pauswagon, ang pagtuon makatabang nako kon unsay buhaton aron mouswag.”—Max.

Angayng palandongon:

Unsay imong gikinahanglan aron ganahan kang magtuon?

 Problema: KALAAY

“Human sa 10 minutos nga pagtuon, laayan na ko; human sa 20 minutos lain na ang gusto nakong buhaton; pagka-30 minutos mamatay na ko sa kalaay!”—Allison.

Gikinahanglan: HIMOANG MAKAPAINTERES

Gamita ang imong imahinasyon bahin sa kon unsay tun-an, unsaon pagtuon, ug asa magtuon.

“Paggahig panahon sa pag-research sa tubag sa imong mga pangutana. Kon imong tun-an ang nahunahunaan nimong tun-an, mobati kang dunay nalampos ug malipay.”—Richard.

“Samtang magbasa kag usa ka asoy, hunahunaa nga tua ka didto. Isipa nga ikaw ang pangunang karakter o usa ka tumatan-aw sa maong panghitabo. Handurawa nga kini nahitabo mismo sa imong atubangan.”—Steven.

“Himoa nga makalingaw ang pagtuon. Pagtuon sa gawas sa balay ug pagdalag juice. Gusto kong dunay masimasima samtang magtuon. Kinsay goy dili ganahan ana?”—Alexandra.

Hinumdomi: Ang kalaay anaa ra sa hunahuna. Imbes moingon nga “makalaay ang pagtuon,” ingna nga “gilaay ko.” Bag-oha ang imong panglantaw bahin sa pagtuon. Sa ingon niana, duna kay kontrol ug duna kay mahimo bahin niana.—Proverbio 2:10, 11.

“Ang personal nga pagtuon dili makalaay. Depende ra kana kanimo.”—Vanessa.

Angayng palandongon:

Unsay imong gikinahanglan aron makapainteres ang imong pagtuon?

Problema: WALAY PANAHON

“Gusto kong magtuon pag dugang sa Bibliya, pero dili ko makatuon tungod sa kawalay panahon!” —Maria.

Gikinahanglan: PAGTAKDAG PRIORIDAD

Apil sa pagkahingkod ang pagtuon sa ‘pagtino sa mas hinungdanong mga butang.’—Filipos 1:10.

“Giingnan ko ni Mama nga kon maghulat kog bakanteng panahon, di gyod ko makatuon. Kinahanglang mogahin kog panahon. Sa dihang naugmad nako ang tinguha sa pagtuon, nagahinan na nako kinig panahon.”—Natanya.

“Sa nagkahingkod ko, akong nakat-onan nga kinahanglang mag-eskedyul kog panahon sa pagtuon, ug ako gyod kanang gituman.”—Yolanda.

“Kon unahon nimo ang pagtuon kay sa paglingawlingaw, mas ganahan kang magtuon—ug dili ka makonsensiya kon maglingawlingaw ka na.”—Diana.

Hinumdomi: Kon dili ka magtakdag prioridad, dili nimo mabalanse ang imong panahon ug wala kay malampos. Busa, maayo gyod nga imong gahinan ug panahon ang pagtuon.—Efeso 5:15, 16.

“Ingong estudyante sa hayskul, dali kong malinga sa ubang butang! Apan giuna gyod nako diha sa akong eskedyul ang personal nga pagtuon sa Bibliya.”—Jordan.

Angayng palandongon:

Unsang eskedyul sa pagtuon ang mahimo nimong itakda?

[Kahon/Mga hulagway sa panid 19]

SUGYOT SA UBANG BATAN-ON

Zachary—Tun-i dili lang ang gitun-an sa imong ginikanan ug sa uban. Matawag lang kini nga personal nga pagtuon kon imong tun-an ang gusto nimong makat-onan.

Kaley—Ayaw lang unag tas-a ang pagtuon. Lima ka minutos pwede na, apan himoa kini adlaw-adlaw. Dayon himoang 10 minutos, unya 15 minutos . . . Hangtod nga ganahan ka nang magtuon!

Daniela—Aron mas makalingaw ang pagtuon, paggamit ug mga bolpen nga lainlaig kolor ug nindot nga notbok, o kaha paghimog file sa imong computer ug nganlig Personal Study.

Jordan—Kon mamili kog ulohan nga gusto nako, makatuon kog dugay. Magtuon sab ko sa hilom nga dapit. Dili ko makatuon kon saba ang palibot.

[Diagram sa panid 18]

(Alang sa aktuwal nga pagkahan-ay, tan-awa ang publikasyon)

Guntinga

Pil-a