Pagpaniid sa Kalibotan

“Ingong presidente, gibati nako nga kinahanglan kong mag-ampo.”—BARACK OBAMA, PRESIDENTE SA UNITED STATES.

Sa dihang gipangutana ang mga taga-Argentina nga nag-edad ug 10 ngadto sa 24 kon unsay himoon aron maipasigarbo nila ang ilang nasod, 56 porsiyento ang miingon nga magsul-ob silag uniporme sa tem sa saker sa ilang nasod.—LA NACIÓN, ARGENTINA.

Gipakita sa usa ka pagtuon nga “sa tibuok kalibotan mga 33 porsiyento sa pagkaon sa tawo ang mausik kada tuig, nga motimbang ug mga 1.3 ka bilyong tonelada.”—FOOD AND AGRICULTURE ORGANIZATION OF THE UNITED NATIONS, ITALY.

“Karon, ang mga gubat ug mga taho sa gubat kaylap sa tibuok kalibotan, busa ang mga sundalo sa atong Yutang Natawhan kinahanglang andam kanunay sa pagpanalipod sa katawhan niini ug sa tanang giisip natong sagrado batok sa mga kaaway nga gustong mosakop niini.”—PATRIARCH KIRILL, PANGULO SA SIMBAHANG ORTODOKSO SA RUSSIA.

Sumala sa rekord sa usa ka kompaniya sa insyurans sa Germany, ang kinadaghanang aksidente sa kadalanan niadtong 2010 nahitabo tali sa alas 7:00 ug alas 8:00 sa buntag. Matod sa usa ka opisyal sa kompaniya: “Usa sa kinamaayohang paagi sa paglikay sa aksidente mao ang pagbiyaheg sayo ngadto sa trabaho.”—PRESSEPORTAL, GERMANY

Mga Batan-ong Lider sa Malaysia

Dunay usa ka popular nga programa sa TV sa Malaysia labot sa pagpilig maayong imam, o lider sa Islam. Kini gihimo sa Kuala Lumpur ug gitawag ug “Imam Muda,” o “Batan-ong Lider.” Ang mga entrante, nga mga 18 ngadto sa 27 anyos nga lainlaig kagikan, anam-anam nga tangtangon hangtod usa na lay mabilin. Ang mananaog premyohag kuwarta ug bag-ong sakyanan, tanyagan ug trabaho ingong imam, paeskuylahon sa Saudi Arabia, ug paduawon sa Mecca. Ang mga entrante kinahanglang mahibalo sa tanang responsibilidad sa usa ka imam, makahimo sa pagdebate bahin sa relihiyoso ug presenteng mga isyu, ug makasag-ulo sa Koran. Ang nagmugna sa programa nag-ingon nga ang iyang tuyo mao ang “pagdani sa mga batan-on” ngadto sa Islam.

Dili Maalamong Paggamit sa Internet

Daghang tiggamit ug social network wala maglantaw sa posibleng resulta sa pag-post ug pribadong mga impormasyon. Kana makahatag kanilag problema sa ulahi. Diha sa mantalaang Sydney Morning Herald sa Australia, ang prinsipal nga si Timothy Wright miingon: “Ang disbentaha sa modernong teknolohiya mao nga ang gi-post nga mga pulong nga wala hunahunaa, komento nga nagdaot sa uban, kuwestiyonableng mga letrato o pribadong mga impormasyon permanenteng marekord, ug mabasa o makita sa tanang dunay access sa social network.” Busa, ang “sayop nga nahimo sa 15 anyos ka pa mahimong makita gihapon sa imong aplayan ug trabaho paglabay sa 10 ka tuig,” matod ni Wright.