Gikan sa Among mga Magbabasa

Kon Nganong Gibiyaan Nako ang Akong Dakog Kita nga Karera (Hunyo 2010) Mapasalamaton kaayo ko niining artikuloha! Ako 39 anyos ug nag-inusarang nagpadakog tulo ka anak. Sa lugar nga akong gipuy-an sa Russia, lisod mangitag trabaho. Apan ang panig-ingnan ni Martha Teresa Márquez nakatabang nako. Ang artikulo miingon nga aron masuportahan ang iyang bug-os panahong pag-alagad, si Martha naghimog tamales ug gibaligya kini sa kadalanan. Busa gisundog nako siya ug naghimog pan nga piroshki. Nakatabang kaayo kini! Karon nahimo kining negosyo sa among pamilya. Busa, ako ug ang akong mga anak nakakat-on ug praktikal nga paagi sa panginabuhi ug nahimong mas responsable.

G. M., Russia

Kon Unsay Angayng Himoon Niadtong Nganga Mosulti (Mayo 2010) Salamat sa inyong pagpaambit sa tukmang impormasyon bahin sa pagnganga. Naningkamot gyod kami nga kadtong nganga mosulti mahibalo nga dunay daghang epektibong kapilian aron sila matabangan.

J. F., presidente sa The Stuttering Foundation, United States

Mga Batan-on Nangutana . . . Unsaon Nako Pagpatin-aw ang Gitudlo sa Bibliya Bahin sa Homoseksuwalidad? (Disyembre 2010) Napulo ka tuig na ko nga minyo, ug dunay usa ka anak. Adlaw-adlaw akong nakigbisog sa akong “tunok sa unod.” Ako may homoseksuwal nga pangibog. Ang kaminyoon wala makausab niana. Nawad-an na gyod kog paglaom kay morag dili nako mabuntog ang akong pangibog. Apan human makabasa niini nga artikulo, mibati ko nga duna pa koy paglaom. Malamposon ako sa akong mga paningkamot sa pagbuntog niini nga pangibog.—2 Corinto 12:7.

Ngalan wala ipaila, United States

Singko anyos pa lang ko duna na koy homoseksuwal nga pangibog. Karon 61 anyos na ko, ug wala gihapon kini mawala. Nainteres ako sa mga punto nga gihisgotan sa artikulo nga bisan kadtong dili mga bayot o tomboy kinahanglang magpahilayo sa pakighilawas, ug daghan niadtong “mga tagsaanon nga halos wala nay purohang maminyo maingon man ang mga minyo kansang kapikas wala nay katakos sa pagpakigsekso” malipayon gihapon bisag dili matagbaw ang ilang seksuwal nga gana. Busa kadtong may homoseksuwal nga tendensiya makahimo sa pagsubay ug hinlong kinabuhi kon nagtinguha gayod sila sa pagpahimuot sa Diyos. Busa salamat kaayo sa pagdasig sa mga sama namo nga nagsagubang niini.

Ngalan wala ipaila, United States