Ang Diyos Naghupay Kanako sa Tanan Nakong Pagsulay

Sumala sa giasoy ni Victoria Colloy

Usa ka doktor ang miingon kang Mama: “Wala na mi mahimo sa imong anak. Kinahanglan siyang mogamit ug kratses ug leg brace sa tibuok niyang kinabuhi.” Naguol kaayo ko! Mag-unsa na lang ko kon dili na ko makalakaw?

NATAWO ko niadtong Nobyembre 17, 1949, sa Tapachula, Chiapas, Mexico. Ako maoy malipayon, himsog nga bata, ang panganay sa upat ka anak. Apan sa pag-edad nakog unom ka bulan, ako dili na makahimo sa pagkamang ug dili na kaayo makalihoklihok. Paglabay sa duha ka bulan, dili na gyod ko makalihok. Nahibulong ang mga doktor kay ang ubang mga bata sa Tapachula parehas nakog mga simtomas. Busa usa ka orthopedist gikan sa Mexico City ang miabot aron eksaminon mi. Nadayagnos nga ang among sakit maoy poliomyelitis, o polyo.

Pag-edad nakog tres, gioperahan ang akong bat-ang, tuhod, ug buolbuol. Sa ulahi naapektohan usab ang akong tuong abaga. Sa nagsayis anyos ko, gidala ko sa Mexico City aron magpatambal diha sa ospital alang sa mga bata. Si Mama nagtrabaho sa uma sa Chiapas, busa mipuyo ko sa Mexico City uban sa akong lola. Apan, sagad nga anaa ko sa ospital.

Sa hapit na kong mag-otso anyos, medyo makalihoklihok na ko. Apan sa ulahi, migrabe ang akong sakit, ug sa ngadtongadto dili na ko makalihok. Dayon ang mga doktor miingon nga kinahanglan kong mogamit ug kratses ug leg brace sa tibuok nakong kinabuhi.

Pag-edad nakog 15 anyos, 25 ka beses na kong gioperahan. Gioperahan ang akong taludtod, bitiis, tuhod, buolbuol, ug mga tudlo sa tiil. Human sa matag operasyon, moagi kog mga sesyon sa physical therapy. Kas-a, human ko operahi, gisemento ang akong mga bitiis. Sa dihang gitangtang ang semento, kinahanglang antoson nako ang masakit nga mga ehersisyo.

Nakadawat ug Tinuod nga Paghupay

Pag-edad nakog 11, giduaw ko ni Mama samtang nagpaayo ko sa akong operasyon. Iyang nakat-onan nga si Jesus nag-ayo sa mga masakiton ug nakahimo pa gani sa pagpalakaw sa usa ka paralitiko. Iya kong gihatagan ug kopya sa magasing Bantayanang Torre nga gipatik sa mga Saksi ni Jehova, diin didto niya kini nabasa. Gitagoan nako ang magasin sa ilalom sa akong unlan, apan usa ka adlaw niana, kana nawala. Nakit-an diay kadto sa mga nars ug ilang gikuha. Ila kong gikasab-an kay nagbasa ko ana.

Mga usa ka tuig sa ulahi, mibiyahe na usab si Mama gikan sa Chiapas aron moduaw nako. Niadtong higayona nagtuon na siya sa Bibliya uban sa mga Saksi ni Jehova. Iya kong gidad-an sa librong Gikan sa Paraisong Nawala Ngadto  sa Paraisong Nabatonan Pag-usab. * Si Mama miingon, “Kon gusto kang mopuyo sa gisaad nga bag-ong kalibotan diin ayohon ka ni Jesus, kinahanglan kang magtuon ug Bibliya.” Busa, bisan pag supak si Lola, nagtuon ko uban sa mga Saksi sa dihang nag-14 anyos ko. Pagkasunod tuig gipagawas ko sa ospital kay ang maong ospital para lang sa mga bata.

Pagsagubang sa Kalisdanan

Ako mibatig grabeng depresyon. Tungod sa pagsupak sa akong lola, ako miuli sa Chiapas ug mipuyo uban sa akong ginikanan. Apan, dihay daghang problema sa balay kay si Papa palainom. Dihay higayon nga mibati kong wala nay lami ang kinabuhi. Nakahunahuna ko sa pag-inom ug hilo. Apan samtang nagpadayon ko sa pagtuon sa Bibliya, nausab ang akong hunahuna. Ang saad sa Bibliya bahin sa paraisong yuta naghatag kanakog kalipay.

Akong gipaambit sa uban ang kahibulongang paglaom nga gihisgotan sa Bibliya. (Isaias 2:4; 9:6, 7; 11:6-9; Pinadayag 21:3, 4) Sa ngadtongadto, sa Mayo 8, 1968, sa edad nga 18, ako nagpabawtismo ingong usa sa mga Saksi ni Jehova. Sukad sa 1974, naggugol kog kapin sa 70 ka oras matag bulan aron ipaambit sa uban ang paglaom nga nakapalig-on sa akong determinasyon nga mabuhi.

Mabungahon ug Matagbawon nga Kinabuhi

Sa ulahi, namalhin mi ni Mama sa siyudad sa Tijuana, duol sa utlanan sa Mexico ug United States. Nagpuyo mi ni Mama sa balay nga haom sa among kahimtang. Makalihoklihok gihapon ko sa balay sa tabang sa brace ug kratses, ug naa pod koy wheelchair nga akong magamit sa dihang ako magluto, manglaba, ug mamalansa. Aron makasangyaw, mogamit kog dekoryenteng sakyanan nga gipahaom sa akong panginahanglan.

Gawas sa pagsangyaw diha sa kadalanan ug sa balaybalay, tigduawan sab ko sa duol nga ospital aron makigsulti sa naghulat nga mga pasyente bahin sa Bibliya. Human niana, ako moadto sa merkado aron mopalit sa among kinahanglanon ug dayon mouli aron tabangan si Mama sa pagluto ug sa mga buhatbuhaton sa balay.

Aron matagan-an ang among panginahanglan sa pinansiyal, mamaligya kog ukay-ukay. Si Mama 78 anyos na karon ug luya na kay katulo na siya atakeha sa kasingkasing. Busa ako nay nag-asikaso sa iyang tambal ug pagkaon. Bisan sa among mga kabilinggan, naningkamot mi sa pagtambong sa mga tigom sa kongregasyon. Kapin sa 30 ka tawo nga akong gitun-an sa Bibliya sa milabayng katuigan nakig-ambit na usab karon sa Kristohanong ministeryo.

Kombinsido ko nga matuman gayod ang saad sa Bibliya: “Nianang panahona [sa gisaad sa Diyos nga bag-ong kalibotan] ang bakol mosaka ingon sa laking osa.” Apan sa pagkakaron, ako nadasig sa giingon sa Diyos: “Ayaw kahadlok, kay ako uban kanimo. Ayaw iliraw ang imong panan-aw, kay ako imong Diyos. Ako magapalig-on kanimo. Ako sa pagkatinuod magatabang kanimo. Ako sa pagkatinuod magahawid kanimo sa akong tuong kamot sa pagkamatarong.”—Isaias 35:6; 41:10. *

[Mga Potnot]

[Hulagway sa panid 12]

Naggamit ug leg brace sa edad nga siyete

[Hulagway sa panid 13]

Aron makasangyaw, mogamit kog dekoryenteng sakyanan nga gipahaom sa akong panginahanglan