SAMA kang Marie ug Theresa, milyonmilyong tawo sa tibuok kalibotan ang nag-ampo sa “mga santos” aron sila panalanginan. Sumala sa New Catholic Encyclopedia, “ang mga santos maoy mangatubang sa Diyos alang sa mga tawo,” ug “‘maayo ug mapuslanon’ ang pagpangamuyo kanila aron makadawat ug . . . grasya gikan sa Diyos.”

Apan, unsay hunahuna sa Diyos niana? Mouyon ba siya nga kita moampo sa “mga santos” aron sila maoy mangatubang kaniya alang kanato? Tagda kon unsay giingon sa Bibliya.

Diha sa pipila ka hubad sa Bibliya, ang Gregong pulong nga gihubad ug “santos” nagkahulogang “balaan.” Apan, wala maghisgot ang Bibliya nga dihay matinumanong magsisimba sa Diyos nga nag-ampo sa “santos.” Ngano? Ang New Catholic Encyclopedia nag-ingon nga niadto lamang “ikatulong siglo nga gisugdan ang pag-ila sa mga santos ingong tigpataliwala.” Kana maoy mga 200 ka tuig human sa kamatayon ni Kristo. Busa, ang maong pagtulon-an wala itudlo ni Jesus ug sa inspiradong mga magsusulat sa Bibliya nga nagrekord sa iyang ministeryo. Ngano man?

Ang Bibliya kanunayng nagtudlo nga sa Diyos lamang kita moampo, nga magbuhat niana pinaagi sa ngalan ni Jesu-Kristo. “Ako ang dalan, ang kamatuoran, ug ang kinabuhi,” si Jesus miingon. “Walay makaadto sa Amahan kon dili moagi kanako.” (Juan 14:6, Maayong Balita Biblia) Kanang tin-awng mga pulong kaharmonya sa gitudlo ni Jesus nga narekord sa Mateo 6:9-13. Samtang nagsaysay bahin sa pag-ampo, si Jesus miingon sa iyang mga sumusunod: “Busa, mag-ampo kamo sa ingon niini nga paagi: Amahan namo nga anaa sa mga langit, pagabalaanon unta ang imong ngalan. . . . ” (Mateo 6:9) Tin-aw nga kita moampo lamang sa atong langitnong Amahan. Kini nga kamatuoran gipasukad sa usa ka hinungdanong prinsipyo sa Bibliya.

Ang The World Book Encyclopedia nag-ingon: “Ang pag-ampo maoy matinahorong mga pulong ug hunahuna nga gisulti ngadto sa Diyos, mga diyos, diyosa, o sa uban pa nga ginasimba [sa mga tawo]. . . . Ang pag-ampo maoy hinungdanong paagi sa pagsimba diha sa halos tanang relihiyon.” (Italiko amoa.) Pangutan-a ang imong kaugalingon, ‘Angay bang mosimba ug moampo kang bisan kinsa gawas sa atong Maglalalang ug Maghahatag-ug-Kinabuhi?’ (Salmo 36:9) “Ang matuod nga mga magsisimba,” miingon si Jesus, “magasimba sa Amahan uban sa espiritu ug sa kamatuoran, kay, sa pagkatinuod, ang Amahan nagapangita sa mga ingon kanila aron magasimba kaniya.” (Juan 4:23) Ang Bibliya nag-ingon usab nga ang atong Maglalalang nangayo sa atong “bug-os nga pagkamahinalaron.”​—Deuteronomio 4:24; 6:15.

Tagda pananglitan ang Kristohanong apostol nga si Juan. Human madawat ang talagsaong mga panan-awon nga narekord sa basahon sa Bibliya nga Pinadayag, ang nahinganghang apostol “mihapa sa pagsimba diha sa tiilan sa manulonda” nga nagpakita kaniya niining mga butanga. Unsay reaksiyon sa manulonda? “Pagbantay!” siya miingon. “Ayaw kanag buhata! Ako usa lamang ka isigkaulipon nimo ug sa imong mga igsoon . . . Maoy simbaha ang Diyos.” (Pinadayag 22:8, 9) Oo, sa makausa pa gipasiugda sa Bibliya nga si Jehova nga Diyos lamang ang atong simbahon.

Uyon sa nahisgotan na, ang Diyos lamang ang gitawag ug “Tigpatalinghog sa pag-ampo.” (Salmo 65:2) Dugang pa, ingong Labing Gamhanan, siya lamang ang adunay awtoridad, kahibalo, ug gahom sa pagtubag sa bisan unsang pag-ampo nga uyon sa iyang kabubut-on. (Job 33:4) Bisan si Jesu-Kristo miangkon nga siya may mga limitasyon. (Mateo 20:23; 24:36) Apan siya gihatagag dakong awtoridad, lakip na sa responsibilidad nga magsilbing Tigpataliwala sa katawhan.

Bahin kang Jesus ang Bibliya nag-ingon: “Siya makahimo usab sa pagluwas sa bug-os kanilang nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.” (Hebreohanon 7:25) Sa ato pa, si Jesus mahimong mag-alagad ingong masinabotong Tigpataliwala alang niadtong ‘moduol sa Diyos pinaagi kaniya.’ Wala kini magpasabot nga kita moampo kang Jesus ug dayon ipasa niya kana sa Amahan. Hinunoa, nagpasabot kana nga kita moampo sa Diyos sa ngalan ni Jesus, sa ingon nag-ila sa iyang awtoridad. Nganong si Jesus man ang hingpit nga Tigpataliwala?

Ang usa ka rason mao nga si Jesus nahimong tawo, ug tungod niana makasabot kaayo siya sa atong mga pag-antos. (Juan 11:32-35) Ang lain pa mao nga iyang gipasundayag ang iyang gugma alang sa katawhan pinaagi sa pag-ayo sa mga masakiton, pagbanhaw sa mga patay, ug pagtabang sa mga tawo nga makaila sa Diyos. (Mateo 15:29, 30; Lucas 9:11-17) Nagpasaylo pa gani siyag mga sala. (Lucas 5:24) Tungod niana, makasalig kita nga kon kita makasala, “kita adunay usa ka magtatabang ngadto sa Amahan, si Jesu-Kristo, usa nga matarong.”​—1 Juan 2:1.

Ang gugma ug pagkamabination ni Jesus maoy mga hiyas nga angay natong sundogon. Tinuod, wala kita hatagig katungod nga mahimong tigpataliwala. Apan makaampo kita alang sa uban. Sa pagkatinuod, ang gugma angayng magtukmod kanato sa pagbuhat niana. “Pag-ampo alang sa usag usa,” misulat si Santiago. “Ang pangamuyo sa usa ka tawong matarong, sa dihang kini nagalihok, adunay dakong puwersa.”​—Santiago 5:16.

Si Marie ug Theresa nakakat-on nianang bililhong mga kamatuoran pinaagi sa pagsusi sa Bibliya. Ang mga Saksi ni Jehova nagdapit kanimo sa pagbuhat usab niana. Sumala sa giingon ni Jesus, “silang magasimba [sa Diyos] kinahanglan nga magasimba uban sa espiritu ug sa kamatuoran.”​—Juan 4:24.