Pagpaniid sa Kalibotan

Gipasaka sa International Agency for Research on Cancer ang klasipikasyon niini labot sa mga instrumento nga naggamit ug ultraviolet light para ang panit mahimong tabonon gikan sa “posibleng makakanser sa tawo” ngadto sa “makakanser sa tawo.”—THE LANCET ONCOLOGY, BRITAIN.

Sa Argentina, 9 sa 10 ka mabdos dili gustong magsabak.—CLARÍN, ARGENTINA.

“Ang mga siyentista kanunayng makadiskobre ug bag-ong espisye. Ang mga biologo makadiskobre ug halos 50 ka espisye matag adlaw. Duolag 17,000 ka bag-ong espisye sa mga tanom ug mananap ang ilang nadiskobrehan sa 2006 lamang—mga 1% sa 1.8 milyon ka espisye nga nahatagan nag ngalan.”—TIME, U.S.A.

Makapanalipod ba ang Pusil?

Ang pusil ba makapanalipod sa tawo nga nagdala niana kon pananglit atakehon siya? Ang pagtuon nga gihimo sa University of Pennsylvania School of Medicine, sa Amerika, nag-ingon nga dili sa tanang higayon. Walay labot sa mga situwasyon nga nalangkit ang mga polis, naunay nga pagkaigo, ug aksidenteng pagkatiro, ang tigdukiduki nakadiskobre nga ang tawo nga nagdalag pusil maoy “4.5 ka beses nga posibleng mapusilan sa pag-atake kay niadtong wala magdalag pusil.” Gipakita sa pagtuon nga ang mga tawong dunay pusil nakadepensa sa ilang kaugalingon pinaagi sa ilang armas, apan talagsa ra kaayo kanang mahitabo. Ang pagtuo nga ang pagbaton ug pusil maoy “proteksiyon batok sa peligrosong mga situwasyon kinahanglang hisgotan ug palandongon ug maayo,” nag-ingon ang report.

Mga Monghe Nanglipstik

Ang mga monghe sa Thailand “nakadaot sa reputasyon sa konserbatibong relihiyong Budhista” tungod sa ilang pagpanglipstik, pagpahuot sa ilang abito, “sobrang pagkiay-kiay ug pagdalag mga bag nga pangbabaye,” nag-ingon ang balita gikan sa Bangkok. Tungod niini nga problema labot sa bag-ong mga monghe nga mga homoseksuwal, ang mga lider niini nga relihiyon nagsugyot sa pagtudlo sa mga monghe bahin sa hustong pamatasan. Ang usa ka iladong magwawali nga Budhista miingon nga ang homoseksuwalidad wala idili sa mga monghe, “kay kon gidili pa, kapin sa katunga kanila matangtangan sa pagka-monghe.”

Mga Tren nga Para Lang sa Babaye

Daghan nang tuig nga ang mga babaye nga mosakay sa naghuot nga mga tren nag-antos sa pagpanginsulto, pagpanyansing, pagkaipit, pagtutok, ug pagpanghasi sa mga pasaherong lalaki. Kay nagkadaghan man ang reklamo, ang gobyerno nakadesidir sa pipila ka kahimtang sa paglain sa mga babaye, nagtaho ang mantalaan sa Calcutta nga The Telegraph. Tungod niini, sa upat ka kinadak-ang mga siyudad sa India—New Delhi, Mumbai, Chennai, ug Calcutta—dunay pipila ka tren nga para lamang sa mga babaye. Gikataho nga ang mga pasahero nangalipay pag-ayo.