Ang Hunahuna sa Bibliya

Kinsa ang mga Demonyo?

MGA multo, maligno, diwinde, engkanto, demonyo maoy mga espirituhanon nga gituohan sa nagkalainlaing mga relihiyon ingong daotan o kaha buotan. Ang uban dili motuo ug bisan unsang matang sa espiritu kay matod pa nila kini bunga lang sa hunahuna. Unsay giingon sa Bibliya?

Ang Bibliya nagtudlo nga ang Maglalalang maoy usa ka Espiritu ug nga ang iyang unang mga linalang maoy mga espiritu. (Juan 4:24; Hebreohanon 1:13, 14) Dugang pa, ang Bibliya naghisgot ug daotang mga espiritu, usahay gitawag sila ingong mga demonyo. (1 Corinto 10:20, 21; Santiago 2:19) Apan kini wala magtudlo nga ang Diyos naglalang ug mga demonyo. Nan, kinsa sila ug sa unsang paagi sila milungtad?

“Mga Manulonda nga Nakasala”

Sa gilalang sa Diyos ang espiritu nga mga linalang, iya silang gihatagan ug kagawasan sa pagpili sa pagbuhat ug maayo o daotan. Ikasubo nga human sa paglalang sa tawo, ang wala hisgoting gidaghanon sa mga manulonda mipili sa pagbuhat ug daotan pinaagi sa pagrebelde batok sa Diyos.

Ang una ug gibantog nga daotang espiritu nga mirebelde nahimong Satanas. Si Jesu-Kristo miingon: “Siya wala mobarog nga lig-on diha sa kamatuoran.” (Juan 8:44) Unsay nakatukmod kang Satanas sa pagrebelde batok sa Diyos? Iyang gitinguha ang pagsimba nga iya lamang sa Maglalalang, ug dayon siya milihok sa pagtagbaw sa iyang pangibog pinaagi sa paghimo sa iyang kaugalingon nga kaindig nga diyos. Niining paagiha iyang gihimo ang iyang kaugalingon nga “Satanas,” nga nagkahulogang “magsusupak.” Paglabay sa daghang katuigan, sa wala pa ang Lunop sa mga adlaw ni Noe, ang ubang mga manulonda miduyog kang Satanas, gibiyaan nila ang ilang pinuy-anan sa langit ug nagmateryalisar ingong tawo ug namuyo dinhi sa yuta. (Genesis 6:1-4; Santiago 1:13-15) Sa nahitabo ang Lunop, ang nagmateryalisar nga “mga manulonda nga nakasala” mibalik sa pagka-espiritu. (2 Pedro 2:4; Genesis 7:17-24) Sa ngadto-ngadto, sila gitawag ug mga demonyo.—Deuteronomio 32:17; Marcos 1:34.

Ang masinupakong mga manulonda lahi na kaayog kahimtang kay sa ilang gitagamtam sa wala pa sila morebelde. Ang Judas 6 nag-ingon: “Ang mga manulonda nga wala magpadayon sa paghupot sa ilang orihinal nga pagkabutang apan mitalikod sa ilang nahiangay nga puloy-anang dapit iyang gitagana uban ang walay kataposang mga gapos ilalom sa naglugitom nga kangitngit alang sa paghukom sa dakong adlaw.” Oo, wala tugoti sa Diyos ang mga demonyo sa pagtagamtam pag-usab sa ilang kanhing pribilehiyo sa langit apan gibalhog sila sa mahulagwayong “bung-aw sa naglugitom nga kangitngit,” nga dili na gayod makadawat ug espirituwal nga kahayag.

“Nagpahisalaag sa Tibuok Gipuy-ang Yuta”

Bisag dili na sila makamateryalisar ingong tawo, ang mga demonyo dako gihapog gahom ug impluwensiya sa hunahuna ug kinabuhi sa tawo. Sa pagkatinuod, si Satanas, uban sa iyang panon sa mga demonyo, “nagpahisalaag sa tibuok gipuy-ang yuta.” (Pinadayag 12:9; 16:14) Sa unsang paagi? Sa dakong bahin, pinaagi sa “mga pagtulon-an sa mga demonyo.” (1 Timoteo 4:1) Kining bakak nga mga pagtulon-an, nga kasagaran may kalabotan sa relihiyon, nagbuta sa mga hunahuna sa minilyon bahin sa kamatuoran sa Diyos. (2 Corinto 4:4) Tagda kini nga mga pananglitan.

● Ang pagtulon-an nga ang mga patay buhi gihapon. Pinaagi sa mga multo, mga tingog, ug malipatlipatong mga buhat, gilimbongan sa mga demonyo ang mga tawo sa pagtuo nga ang mga buhi makapakigsulti sa mga patay. Dugang pa, kini nga panglimbong nagsuportar sa bakak nga pagtulon-an nga ang kalag magpabiling buhi inigkamatay sa lawas. Apan ang Bibliya klarong nag-ingon:  ‘Ang mga patay wala na gayoy nahibaloan.’ (Ecclesiastes 9:5, 6) Kay ‘nanaog ngadto sa kahilom,’ sila dili na makahimo bisan sa pagdayeg sa Diyos.—Salmo 115:17. a

● Ubos nga mga sukdanan sa moralidad. “Ang tibuok kalibotan nailalom sa gahom sa usa nga daotan,” nag-ingon ang 1 Juan 5:19. Gipahimuslan ni Satanas ug sa iyang mga demonyo ang media ug uban pang mga pamaagi sa pagpalambo sa daotang ideya nga kinahanglang paninungtan sa tawo ang unodnong mga pangibog. (Efeso 2:1-3) Busa, ang tanang matang sa imoralidad, lakip ang abnormal nga mga paagi pagpakigsekso komon na kaayo karon. Kini nga panggawi giisip gani nga normal, samtang ang mga sukdanan sa Bibliya sagad gilantaw nga kinaraan na o sobra ra ka estrikto.

● Pagpalambo sa espiritismo. Si apostol Pablo nakasugat ug usa ka sulugoong batang babaye nga gisudlan ug “demonyo sa pagpanag-an,” nga nakapaarang kaniya sa ‘pagpanagna nga nakahatag sa iyang mga agalon ug dakong kinitaan.’ (Buhat 16:16) Kay nahibalo nga gikan sa demonyo kadtong gahoma, si Pablo wala mamati kaniya. Dugang pa, dili buot ni Pablo nga masuko ang Diyos, kinsa naglantaw sa tanang matang sa espiritismo—lakip na sa astrolohiya ug sa pagsangpit sa mga espiritu—ingong dulumtanan.—Deuteronomio 18:10-12.

Panalipdi ang Imong Kaugalingon Batok sa mga Demonyo

Unsaon nimo pagpanalipod sa imong kaugalingon batok sa daotang mga espiritu? Ang Bibliya nagtubag: “Magpasakop kamo sa Diyos; apan sukli ang Yawa, ug siya mokalagiw gikan kaninyo.” (Santiago 4:7) Kita namati nianang tambaga kon kita nagkinabuhi uyon sa mga pagtulon-an nga makita diha sa Bibliya, ang bugtong balaang basahon nga bug-os nga nagyagyag kang Satanas, sa mga demonyo, ug sa ilang “malipatlipatong kaugdahan.” (Efeso 6:11; 2 Corinto 2:11) Ang Bibliya nagpadayag usab kanato nga ang daotang mga espiritu, lakip na kadtong tanang mosupak sa Diyos, pagawagtangon hangtod sa hangtod. (Roma 16:20) Ang Proverbio 2:21 nag-ingon: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana.”

[Footnote]

NAKAPAMALANDONG KA BA?

● Gilalang ba sa Diyos ang mga demonyo?—2 Pedro 2:4.

● Makapakigsulti ka ba sa mga patay?—Ecclesiastes 9:5, 6.

● Unsaon nimo pagpanalipod sa imong kaugalingon batok sa mga demonyo?—Santiago 4:7.

[Hulagway sa panid 21]

Giimpluwensiyahan sa mga demonyo ang tawo sa daghang paagi