Ang Ngalan sa Diyos Gipaila!

● Sa dihang mosuroy ka sa nindot kaayong Island of Orleans, duol sa Quebec City, sa Canada, imong makita nga ang unang mga nanimuyo didto relihiyoso. Ang karaang mga simbahan, nga kabilin sa karaang panahon, nagtindog gihapon diha sa kadalanan sa isla, ug ang matag parokya dunay kaugalingong simbahan.

Sa lungsod sa Saint-Pierre, makita ang labing karaang simbahan sa Quebec nga natukod niadtong 1717. Karon usa na kini ka displehanag mga obra maestra nga diha niana dunay makaiikag kaayong butang nga makita. Ibabaw sa altar makita ang Tetragrammaton—ang upat ka Hebreohanong porma sa personal nga ngalan sa Diyos sa Bibliya, nga Jehova.

Karon, talagsa na lang madunggan ang ngalan sa Diyos diha sa simbahan sa Katoliko, ug labaw nang talagsa na kanang makita. Gani, usa ka dokumento nga giluwat sa Vatican sa 2008 nag-ingon nga sumala sa sugo sa papa, ang ngalan sa Diyos “dili na gamiton o litokon” diha sa mga serbisyo, awit, o mga pag-ampo sa Katoliko. Apan ang Bibliya nag-ingon nga buot ni Jehova nga Diyos nga ang iyang ngalan ‘igapahayag sa tibuok yuta.’—Exodo 9:16.

Ang mga Saksi ni Jehova nagtuo nga ang pagpahimuot sa Diyos nagkinahanglan ug labaw pa kay sa pagbutang sa iyang ngalan sulod sa usa ka bilding. Matag tuig, sa tibuok-kalibotan, sila nagagugol ug kapin sa 1.5 bilyong oras sa pagpanudlo sa mga tawo bahin sa ngalan ug sa mga katuyoan sa Diyos. Ila pa ganing gipasig-uli ang ngalan sa Diyos nga Jehova, sa hustong dapit niini. Ang Bibliya nga ilang gipatik—Ang Bag-ong Kalibotang Hubad sa Balaang Kasulatan—nagsunod gayod sa orihinal nga pinulongan nga gigamit sa Bibliya, diin ang ngalang Jehova makita duolan sa 7,000 ka beses. Sa pagkakaron kapin na sa 165,000,000 ka kopya sa Bag-ong Kalibotang Hubad ang naimprenta, sa katibuk-an o ang bahin niana, diha sa 83 ka pinulongan. Busa, kon bahin sa ngalan sa Diyos, nga Jehova, ang pangutana dili Kon unsay basehanan sa atong paggamit niana kondili Kon unsay atong basehanan sa dili paggamit niana?

[Hulagway sa panid 21]

Ang Bag-ong Kalibotang Hubad, diin ang ngalang Jehova makita duolan sa 7,000 ka beses, naimprenta sa katibuk-an o ang bahin niana, diha sa 83 ka pinulongan.