Mga Batan-on Nangutana

Ang Pagpakigsekso ba Mas Makapasuod Kanamo?

Si Heather ug Mike duha pa lang ka bulan nga nagadeyt, apan para kang Heather morag dugay na silang nagkaila. Kanunay silang mag-text sa usag usa, pila ka oras silang mag-estoryahay sa telepono, ug magkasinabot gyod sila! Apan samtang naa sila sa sulod sa sakyanan sa usa ka gabiing bulanon, si Mike dili na kontento sa basta pag-estoryahay lang.

Sa miaging duha ka bulan, kutob ra sa paggunitay ug kamot ug paghalok ang ginahimo ni Mike ug Heather ug kutob ra unta dinha ang gusto ni Heather. Apan nahadlok siya basin mawala si Mike kaniya kay walay laing lalaki nga nagmahal ug nagpabati kaniya nga guwapa kaayo siya. ‘Total, naghigugmaay bitaw mi ni Mike,’ siya miingon.

TINGALI nahibalo ka na kon asa padulong kini nga situwasyon. Apan lagmit wala nimo mahunahunai nga ang pagpakigsekso may daotang resulta kang Mike ug Heather. Tagda kini:

Kon imong lapason ang balaod sa kinaiyahan, sama sa grabidad, duna gayoy daotang mahitabo kanimo. Ingon usab niana ang kahimtang kon imong lapason ang balaod sa moralidad, sama sa: “Ayran ninyo ang pakighilawas.” a (1 Tesalonica 4:3) Unsay mga sangpotanan kon imo kining lapason? Ang Bibliya nag-ingon: “Siya nga nagapakighilawas nagapakasala batok sa iyang kaugalingong  lawas.” (1 Corinto 6:18) Tinuod ba kini? Paghunahunag tulo ka daotang epekto sa pagpakigsekso una ang kaminyoon ug ilista kana sa ubos.

1. ․․․․․

2. ․․․․․

3. ․․․․․

Giapil ba nimog lista ang mga sakit nga mapasa sa pagpakigsekso, wala damhang pagsabak, o nadaot nga relasyon sa Diyos? Kana maoy makapaguol nga mga sangpotanan alang niadtong molapas sa mga balaod sa Diyos bahin sa pagpakighilawas.

Bisan pa niana, tingali matental ka gihapon. Mahimong mangatarongan ka, ‘Wala ray daotang mahitabo nako.’ Dili ba ang tanan man usab nakigsekso? Manghambog pa gani ang uban nimong eskolmet sa ilang mga kasinatian sa pagpakigsekso, ug daw wala ray daotang nahitabo kanila. Tingali, mobati ka ug sama sa gibati ni Heather nga gihisgotan sa sinugdanan. Basin nagtuo pa gani ka nga ang pagpakigsekso mas makapasuod kanimo ug sa imong trato, ug lagmit dili ka gustong kataw-an tungod kay virgin ka pa. Busa, maayo ba kon mosugot na lang ka nga makigsekso?

Sa dili ka pa mahinayak, tagda kini: Dili ang tanan nagabuhat niana. Tinuod, makabasa ka nga daghang batan-on ang nakigsekso. Pananglitan, nakita diha sa usa ka panukiduki sa U.S. nga paggraduwar sa mga batan-on sa hayskul, 2 sa matag 3 kanila ang kanunayng makigsekso. Apan, dili ba nagpasabot usab kana nga ang 1 kanila wala makigsekso? Karon, komosta kadtong mga nakigsekso? Nakita sa mga tigdukiduki nga daghan sa maong mga batan-on ang nakasinati sa usa o sa daghan pang mapait nga mga resulta sama niining mosunod:

#1: KASAKIT. Kadaghanang managtrato nga nakigsekso miingon nga sila nagbasol pagkahuman.

#2: NAWAD-AG PAGSALIG. Human sa pagpakigsekso, ang matag usa lagmit maghunahuna kon kinsa pa kaha ang laing nakasekso sa ilang trato.

#3: NADAOT NGA RELASYON. Human makigsekso, sagad biyaan sa lalaki ang iyang trato ug mangitag lain.

#4: NAPAKYAS NGA PAGDAHOM. Sa pagkatinuod lang, gidahom sa babaye nga panalipdan siya sa iyang trato, dili pahimuslan.

Dugang pa, tagda kini: Daghang lalaki ang moingon nga dili nila pakaslan ang babaye nga ila  nang nakasekso. Ngano? Kay buot nilang maminyo sa usa ka hinlo nga babaye!

Nakurat ka ba o kaha nasuko sa pagkahibalo niini? Kon mao, babaye ka man o lalaki, hinumdomi kini: Ang resulta sa pagpakigsekso una maminyo lahi ra gayod sa gipasiugda diha sa mga pelikula o sa TV diin gipatuo ang mga tumatan-aw nga kana maoy pagpasundayag sa tinuod nga gugma. Ayaw gayod pagpadala! Kadtong mohaylo kanimo sa pagpakigsekso naghunahuna lang sa iyang kaugalingon. (1 Corinto 13:4, 5) Kon siya tinuod nga nahigugma kanimo, dili gayod niya ipameligro ang imong pisikal ug emosyonal nga kaayohan. (Proverbio 5:3, 4) Ug kon siya tinuod nga may pagtagad kanimo, dili ka niya itukmod sa pagdaot sa imong relasyon sa Diyos.—Hebreohanon 13:4.

Ang tinuod, kon ikaw makigsekso nga dili ka pa minyo, imong giyatakan ang imong dungog kay imong gihatag ang usa ka bililhong butang. (Roma 1:24) Mao kanay hinungdan kon nganong daghan ang mibatig kahaw-ang ug kawalay bili human nila ihatag ang ilang dungog! Ayawg tugoti nga mahitabo kini kanimo. Kon dunay motental kanimo sa pagpakigsekso ug moingon, “Kon nahigugma gyod ka nako, pamatud-i kana,” prangkahi siya, “Kon tinuod nga nahigugma ka nako, dili ka mangayo niana!”

Ang imong lawas bililhon kaayo ug dili angayng itugyan kang bisan kinsa. Ipakita nga determinado ka sa pagsunod sa sugo sa Diyos nga maglikay sa pakighilawas. Siyempre, kon minyo ka na, gitugot na ang pagpakigsekso. Ug mahimo ninyo kana nga dili mo mobatig kahasol, pagmahay, ug kabalaka nga sagad bation niadtong nakigsekso nga dili pa minyo.—Proverbio 7:22, 23; 1 Corinto 7:3.

Ang ubang artikulo gikan sa seryeng “Mga Batan-on Nangutana” makita diha sa Web site nga www.watchtower.org/ype

[Footnote]

ANGAYNG PALANDONGON

● Bisan ug ang pagpakigsekso nga dili pa minyo makapatagbaw sa tinguha sa unod, nganong sayop kini?

● Unsay imong buhaton kon dunay mohaylo kanimo nga makigsekso?

[Kahon/Mga hulagway sa panid 27]

KON UNSAY GISULTI SA UBANG BATAN-ON

“Ang basta pag-ingon ug ‘dili’ wala magpasabot nga ikaw dili na tentalon. Kinahanglang mahibalo ka kon unsaon pagbalibad. Kon moingon kag ‘dili,’ ipakita nga dili gyod ka. Iprangka kana ngadto kaniya!”

“Ang simpleng pagbalibad usahay dili mosaler bisan pag imo siyang pasabton sa imong baroganan. Ang uban manghambog pa gani kay ilang natental ang usa ka Kristohanon. May mga situwasyon nga kinahanglan kang mobiya dihadiha sa dihang ikaw tentalon. Lisod kanang himoon apan epektibo.”

“Daghan ang makagusto kanimo tungod sa imong mga hiyas ingong usa ka Kristohanon. Busa kinahanglan kang mag-amping ug ayaw gayod pagpatental sa paghimog imoralidad. Pabilhi ang imong mga hiyas ug ayaw kanag ibaylo sa lumalabayng kalipay!”

[Mga hulagway]

Diana

James

Joshua

[Kahon sa panid 28]

PANALIPDI SIYA!

Ikaw ba naghunahuna sa kaayohan sa imong trato sa dihang kamo magdeyt? Kon mao, ipakita nga ikaw . . .

● determinado sa pagsunod sa balaod sa Diyos

● maalamon kay buot nimong likayan ang mga kahimtang nga makatental kaninyo

● nahigugma ug nag-amping kaniya

Kon imo kanang himoon, bation sa imong trato ang sama sa gibati sa Sulamita, kinsa miingon: “Ang akong minahal akoa ug ako iyaha.” (Awit ni Solomon 2:16) Sa ato pa, ikaw ang iyang tigpanalipod!

Basaha ang Proverbio 22:3; 1 Corinto 6:18; 13:4-8.

[Kahon sa panid 28]

SUGYOT

Maylabot sa pagtratar sa kaatbang nga sekso, kini ang angayng hinumdoman: Kon ang imong himoon dili nimo gustong makita sa imong ginikanan, nan ayaw kanag buhata.

[Hulagway sa panid 28]

Ang pagpakigsekso nga dili pa minyo maoy kawalay pagpabili sa gasa sa Diyos. Sama rag gihimo nimong pahiran ang usa ka maanindot nga hulagway nga giregalo kanimo