Pagpaniid sa Kalibotan

“Ang mga tawong dili manigarilyo, dili palainom, regular nga mag-ehersisyo, ug hingaog prutas ug utanon mas taas ug aberids nga 14 ka tuig ang kinabuhi.” Mao kini ang resulta sa 11 ka tuig nga pagtuon nga gihimo diha sa 20,000 ka tawo.—UC BERKELEY WELLNESS LETTER, U.S.A.

“Ang pagbasa mao ang kinamaayohang paagi sa pagrelaks. . . . Bisan ang sayis minutos nga pagbasa makawala nag mga 70 porsiyento sa tensiyon.”—INDIA TODAY INTERNATIONAL, INDIA.

Giabandonar nga “mga Dulaan”

“Tungod sa pagkahugno sa ekonomiya, daghang yate ang giabandonar” didto sa United States, miingon ang The New York Times. Gipapas sa mga tag-iya ang ngalan sa ilang yate ug gitangtang ang mga plaka sa rehistro una nila kana giabandonar o kaha gipalunod. Usahay mamasin sila nga makakobrag kuwarta sa insyurans. Nganong nagakahitabo man kini? “Ang ubang tag-iyag yate . . . nahisama niadtong mga tawong nalisdan pagbayad sa ilang balay: nagbayad silag mahal sa usa ka butang nga nagakabarato maong nakadesisyon sila nga mohunong pagbayad,” miingon ang Times, nga nagtawag usab sa maong mga yate ingong “mahal nga mga dulaan nga giabandonar.” Ang mantalaan miingon: “Dili mabaligya sa mga tag-iya ang ilang mga yate kay daghan usab ang namaligyag segunda-manong yate. Maglisod silag bayad ug gatosan ka dolyar matag bulan sa abang sa dunggoanan ug gasto sab kaayo ang pagmentinar niana. Wala sab silay linibo ka dolyares nga igasto sa pagdispatsar niana sa hustong paagi.”

Mga Bata Nabalaka sa Ilang Hitsura

Ang mga bata, bisan kadtong nag-edad ug kuwatro anyos pa lang “naningkamot nga maparehas ang ilang lawas sa kon unsay uso,” mireport ang Sunday Telegraph sa Sydney. Nakita diha sa gihimong panukiduki bahin sa batasan sa mga bata sa pagkaon ug sa ehersisyo nga ang mga batang babaye dili gustong motambok samtang ang mga batang lalaki gusto mahimong maskulado. “Gisundog lamang niining mga bataa ang ilang inahan nga dili kontento sa iyang lawas,” matod pa sa mga nanguna sa maong panukiduki.

Mga Bata Namalit Diha sa Internet

“Ang 20 porsiyento sa mga bata [sa United Kingdom] mamalit diha sa Internet nga wala mahibalo ang ilang ginikanan ug katunga kanila naggamit sa credit card sa ilang ginikanan,” mireport ang The Daily Telegraph sa London. Daghan sa mga bata ang nahibalo sa mga Web site ug password nga gigamit sa ilang mga ginikanan sa pagpamalit diha sa Internet—maong lagmit sayon ra kaayo nilang mahibaloan ang numero sa credit card sa ilang ginikanan. Walay kalibotan ang mga ginikanan nga mahimo kana sa ilang mga anak. Ang report miingon nga kompiyansa ra kaayo ang mga ginikanan ug wala sila mahibalo nga daghan na diay kaayog nahibaloan ang ilang mga anak. Gawas pa, kon mapasagdan ang mga bata, mameligro nga magamit sa uban ang credit card sa mga ginikanan. Aniay tambag alang sa mga ginikanan nga mopalit pinaagi sa Internet: “Likayi ang pag-save ug mga detalye bahin sa imong credit o debit card,” pamalit lamang diha sa kasaligang mga Web site, ug “ayaw kalimot pag-log out.”