Pagpaniid sa Kalibotan

◼ Sa mga 2,000 ka tawo nga gisurbi didto sa Germany, mga 40 porsiyento sa mga tin-edyer nga nag-edad ug 14 ngadto sa 19 anyos nagtuo nga okey ra ang pagtapos sa usa ka relasyon pinaagig text message o e-mail. Kapin sa 80 porsiyento sa mga nag-edad ug 50 pataas nag-isip niini nga dili nahiangay.—FRANKFURTER NEUE PRESSE, GERMANY.

◼ Gibanabana nga 2.3 trilyones ka text message ang napadala sa tibuok kalibotan sulod sa tuig 2008.—HITU NEWS, TAHITI.

◼ “Ang pagpanigarilyo makapamubo sa kinabuhi sa aberids nga lima ngadto sa napulo ka tuig.”—UC BERKELEY WELLNESS LETTER, U.S.A.

◼ Gibanabana nga moabot ug 60 porsiyento sa mga kompiyuter nga gigamit diha sa mga opisina sa Amerika gipasagdang nag-andar sa tibuok gabii. Tungod niini, mga 14.4 milyones ka toneladang carbon dioxide ang nabuga sa mga planta sa koryente kada tuig.—WORLD WATCH, U.S.A.

Mga Bus Nag-anunsiyo ug Ateyismo

“Tingali walay Diyos. Busa ayaw nag kabalaka ug paglipaylipay na lang.” Kining mga pulonga gipaskin diha sa 200 ka bus sa London, England; ug sa laing 600 ka bus sa tibuok nasod; ug diha sa duha ka dagkong mga eskrin sa TV sa Oxford Street, sa London, nagtaho ang mantalaang The Guardian. Ang mga nagmugna niini miingon nga ila kining gihimo sa pagtubag sa relihiyosong paanunsiyo nga kadtong mga dili magtutuo maimpiyerno. Ang pulong “tingali” gigamit agig pagsunod sa mga balaod sa Advertising Standards Authority sa Britanya, kay dili gayod mapamatud-an nga walay Diyos. Ang katuyoan niini nga kampanya mao ang pagdasig sa daghan pang mga ateyista sa pagpadayag nga sila ateyista.

Mga Risgo sa Pagpaahat sa Pagpanganak

Sa Amerika, nagkadaghan ang mga bata nga ahat nga gipanganak—pinaagig pagpabati ug ahat o kaha pinaagig Cesarean—aron dili maglisod ang inahan. Apan “sukwahi sa gituohan kaniadto, ang kataposang mga semana sa pagmabdos hinungdanon kaayo,” matod pa sa The Wall Street Journal. Ang pagtuon sa mga 15,000 ka bag-ong natawo nga mga bata nagpakita nga sa matag semana nga magpabilin ang bata sa tagoangkan gikan sa ika-32 ngadto sa ika-39 nga semana, dunay 23 porsiyento nga pagkunhod sa kombulsiyon, pagdalag sa mata ug panit, problema sa pagginhawa, ug pagdugo sa utok. Ang mga bata nga matawo gikan sa 32 ngadto sa 36 ka semana dakog purohan nga makaagom ug mga problema sa kinaiya ug sa pangutok. Busa ang American College of Obstetricians and Gynecologists nag-ingon nga labing maayo kon ang mga bata dili ipahimugso “nga wala pay 39 ka semana gawas lang kon dunay mga komplikasyon,” matod pa sa Journal.

Pagsaka ug Hagdan Makaayo sa Panglawas

“Ang regular nga pagsaka ug hagdan maoy simple ug praktikal nga paagi sa pagmentinar ug maayong panglawas,” nagtaho ang basahon bahin sa medisina nga The Lancet sa Britanya. Gihangyo sa mga tigdukiduki ang 69 ka empleyado sa opisina sa pagsaka ug hagdan imbes sa pagsakay ug elebetor. Paglabayg 12 ka semana, ang gidaghanon sa oksiheno nga magamit sa ilang lawas misaka ug 8.6 porsiyento, nga “nagpakunhod ug 15% nga posibilidad nga mamatay sa bisan unsang hinungdan.” Nakita sa mga empleyado nga mius-os ang ilang “presyon sa dugo, kolesterol, timbang, sukod sa hawak, ug miniwang-niwang sila.”