Pagpaniid sa Kalibotan

◼ “Mga 30 porsiyento sa mga tin-edyer sa Amerika mamabdos nga wala pay 20 anyos.”—CENTERS FOR DISEASE CONTROL AND PREVENTION, U.S.A.

◼ Nakita diha sa usa ka pagtuon sa 420 ka lalaki sa Amerika nga “mga biktima sa kapintasan diha sa panimalay” nga “mga tulo sa 10 ang gidagmalan o giabusohan.”—AMERICAN JOURNAL OF PREVENTIVE MEDICINE.

Makakat-on bag Daghang Pinulongan ang mga Bata?

Ang mga ginikanan mahadlok nga kon maladlad ang ilang gagmayng mga anak ug laing pinulongan, maglisod sila sa pagsulti sa ilang kaugalingong pinulongan. Apan dili kana tinuod, nag-ingon ang usa ka grupo sa mga tigdukiduki nga gidumala sa neuroscientist nga si Laura-Ann Petitto sa Toronto, Canada. “Ang mga tisyu sa nerbiyos . . . napahimutang ug andam na sa pagkat-on ug pinulongan,” nag-ingon si Petitto, “ug kini may katakos sa pagkat-on ug daghang pinulongan.” Diha sa eskuylahan, ang mga bata nga makasultig duha ka pinulongan mas hawod kay sa mga bata nga nagsultig usa lang ka pinulongan. Apan ang Toronto Star nag-ingon nga “ang mga ginikanan kinahanglang maoy mangunay sa pagtudlo sa ilang mga anak ug laing pinulongan aron makabenepisyo ang ilang mga anak.”

Ang Pornograpiya Makatugaw sa mga Bata

Nagkaus-os ang edad sa mga bata nga makakitag makadaot nga pornograpiya ug mapintas nga mga video diha sa Internet. Sumala kang Heinz-Peter Meidinger, tsirman sa German Association of Philologists, ang mga batang lalaki nga nag-edad ug 12 ug kapin pa nahibalo kon unsaon sa pagpangita ug kon asa pangitaon ang grabeng kapintasan ug ang law-ayng pornograpiya diha sa Internet. Ang mga bata morag wala maapektohi ug walay interes, apan ang tinuod daghan ang nakurat ug natugaw inigkakita niini. Giawhag ni Meidinger nga angayng magpakitag interes ang mga ginikanan kon unsay gihunahuna ug ginatan-aw sa ilang mga anak diha sa kompiyuter.

Nangandam sa Panagbulag

Daghang Australiano naghimog kasabotan una pa magpakasal nga nagtakda ug mga kondisyones sa matag usa dihang mag-uban na sila, nagtaho ang Sunday Telegraph sa Sydney. Gipadayag diha sa kasabotan kon unsaon pagbahin sa ilang mga kabtangan ug kuwarta engkasog magbulag sila. Espesipikong gihisgotan diha sa kasabotan ang paagi sa pagkinabuhi sa matag kapikas sa pagpatunhay sa kaminyoon. Giklaro diha sa kasabotan kon kinsay magluto, manglimpiyo, magdrayb, kon magbuhi bag mananap diha sa balay, kon pilay kinahanglang timbang sa matag usa, kon kinsay mopasuroy-suroy sa iro, ug kon kinsay molabay sa basura. Ang abogada nga si Christine Jeffress miingon nga ang mga tawo “wala na kaayo maglaom nga molungtad hangtod sa hangtod ang ilang relasyon.”

Mga Ginikanan Naglisod sa Pagpakitag Pagmahal

“Nagkadaghan ang mga ginikanan nga nagkinahanglag giya kon unsaon pagtratar sa ilang mga anak, kay sila daw dili makamao sa pagpakitag pagmahal kanila,” nag-ingon ang magasing Newsweek Polska sa Poland. Ang mga ginikanan kinahanglang tudloan sa simpleng paagi sa pagpakitag pagmahal, sama sa paghalog, pagpakigdula, ug pagkanta ngadto sa ilang mga anak. Hinungdanon kaayo kini sa mga anak aron dili sila modako nga badlongon. Apan gipakita sa panukiduki nga “taliwala sa mga pamilya nga taga-Poland, ang pagtan-awg telebisyon ug pagpamalit maoy nanguna sa labing kasagarang mga paagi sa paggugol sa mga ginikanan ug panahon uban sa ilang mga anak.” Ikaunom lang ang pagpakigdula kanila.