Ang Hunahuna sa Bibliya

Gitakda na ba Daan ang Imong Umaabot?

Daghang tawo nagtuo nga gitakda na daan sa Diyos ang ilang kinabuhi ug umaabot. Sila nagtuo nga gimbut-an nang daan sa Diyos ang ilang kinabuhi gikan sa pagsamkon hangtod sa kamatayon. ‘Kon buot hunahunaon,’ matod nila, ‘ang Diyos gamhanan sa ngatanan ug nahibalo sa tanan, busa nasayod gayod siya sa tanang detalye bahin sa miagi, sa karon, ug sa umaabot.’

UNSAY imong hunahuna? Gitakda na bang daan sa Diyos ang atong kinabuhi ug dulnganan? Sa laing pagkasulti, aduna ba gayod kitay kagawasan sa pagpili? Unsay giingon sa Bibliya?

Bug-os Bang Nahibalo Daan ang Diyos o Mopili Siya Kon Unsay Iyang Gustong Mahibaloan?

Ang Bibliya nag-ingon nga ang Diyos may katakos sa pagkahibalo daan. Sumala sa Isaias 46:10, sa pagsugod pa lang siya mahibalo na kon unsay dangatan. Migamit pa gani siyag mga tawo sa pagsulat sa mga tagna. (2 Pedro 1:21) Dugang pa, ang maong mga tagna matuman gayod kay ang Diyos dunay kaalam ug gahom sa pagtuman sa tanang detalye niana. Busa ang Diyos dili lang makahibalo daan kondili makatakda daan ug mga hitabo kon buot niya. Apan gitakda ba daan sa Diyos ang dulnganan sa matag tawo o ang gidaghanon sa maluwas? Dili, sumala sa Bibliya.

Ang Bibliya nagtudlo nga ang Diyos mapilion kon bahin sa pagtakda daan sa umaabot. Pananglitan, ang Diyos nagtagna nga “usa ka dakong panon” sa matarong nga mga tawo ang makalabang buhi sa dihang laglagon na ang mga daotan sa kataposan sa presenteng sistema sa mga butang. (Pinadayag 7:9, 14) Apan matikdi nga ang Diyos wala maghatag ug espesipikong gidaghanon sa dakong panon. Ngano man? Wala niya gitakda daan ang dulnganan sa mga tawo. Ang Diyos maoy sama sa usa ka mahigugmaong amahan sa usa ka dakong pamilya. Siya nahibalo nga ang pipila sa Iyang mga anak mobalos sa paghigugma Kaniya, apan Siya wala magtakda daan kon pila kanila ang mobalos sa paghigugma Kaniya.

Itandi ang paggamit sa Diyos sa iyang katakos sa pagtakda daan sa iyang paggamit sa iyang gahom. Kay Labing Gamhanan, ang gahom sa Diyos walay kinutoban. (Salmo 91:1; Isaias 40:26, 28) Apan gamiton ba niya ang iyang gahom nga walay kutokuto? Dili. Pananglitan, wala dayon niya gamita ang iyang gahom batok sa Babilonya, nga kaaway sa karaang Israel, kondili naghulat siya sa hustong panahon. “Ako nagpadayon sa pagpugong-sa-kaugalingon,” nag-ingon ang Diyos. (Isaias 42:14) Ingon usab niini ang iyang gihimo maylabot sa iyang katakos sa pagkahibalo daan o pagtakda daan. Si Jehova nagpugong agig pagtahod sa iyang gihatag kanato nga kagawasan sa pagpili.

 Dili buot ingnon nga ang Diyos dili hingpit kay iyang gipugngan ang iyang gahom. Kini nakapahimaya hinuon sa iyang pagkahalangdon, ug tungod niini kita natukmod sa paghigugma kaniya, kay kini nagpakita nga iyang gipasundayag ang iyang pagkasoberano dili lang pinaagi sa iyang walay kinutobang kahibalo ug gahom kondili pinaagi usab sa gugma ug pagtahod sa kagawasan sa iyang intelihenteng mga linalang.

Sa laing bahin, kon gitakda na daan sa Diyos ang tanang butang, hasta grabeng mga aksidente ug daotang mga buhat, dili ba ato siyang mabasol sa tanang kagul-anan ug pag-antos sa kalibotan? Busa kon timbang-timbangon pag-ayo, ang doktrina bahin sa pagtakda daan wala magpasidungog sa Diyos, kondili nakadaot hinuon kini sa iyang dungog. Gihulagway siya niini nga daotan, dili makataronganon, ug dili mahigugmaon, nga sukwahi kaayo sa giingon sa Bibliya bahin kaniya.​—Deuteronomio 32:4.

Ikaw ang Mopili

Pinaagi sa iyang alagad nga si Moises, ang Diyos miingon sa nasod sa Israel: “Gibutang ko ang kinabuhi ug ang kamatayon sa imong atubangan, . . . ug kinahanglan nga pilion mo ang kinabuhi . . . pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya; kay siya mao ang imong kinabuhi ug ang gitas-on sa imong mga adlaw.” (Deuteronomio 30:19, 20) Kon gitakda pa daan sa Diyos ang matag Israelinhon sa paghigugma kaniya ug makabaton ug kinabuhi o kaha sa pagsalikway kaniya ug silotag kamatayon, ang Iyang gipamulong dili tinuod ug walay kahulogan. Motuo ka ba nga ang Diyos, nga “mahigugmaon sa hustisya” ug ang larawan gayod sa gugma, molihok nga mahariharion?​—Salmo 37:28; 1 Juan 4:8.

Ang pag-awhag sa Diyos sa iyang mga alagad sa pagpili sa kinabuhi labaw nang ikapadapat karon kay ang katumanan sa mga tagna sa Bibliya nagpakita nga kita nagakaduol na gayod sa kataposan sa presenteng sistema sa mga butang. (Mateo 24:3-9; 2 Timoteo 3:1-5) Unsay angay natong himoon kon kinabuhi ang atong pilion? Sama sa gihimo sa karaang mga Israelinhon.

Unsay Angay Nimong Himoon Kon ‘Kinabuhi ang Imong Pilion’?

Atong pilion ang kinabuhi pinaagi sa “paghigugma kang Jehova,” “pagpamati sa iyang tingog,” ug “pag-unong kaniya.” Siyempre, mahimo lamang nato kini kon kita nakaila gayod sa Diyos ug nakasabot sa iyang mga gikinahanglan kanato. Sa dihang nag-ampo sa Diyos, si Jesu-Kristo nag-ingon: ‘Kini mao ang kinabuhing dayon: nga ang mga tawo moila kanimo, ang bugtong matuod nga Diyos, ug kang Jesu-Kristo nga imong gipadala.’​—Italiko amoa; Juan 17:3, Maayong Balita Biblia.

Kanang bililhong kahibalo makita diha sa Balaang Bibliya, nga tukmang gitawag nga Pulong sa Diyos. (Juan 17:17; 2 Timoteo 3:16) Sa pagkatinuod, kini nga gasa sa Diyos dayag nga nagpamatuod nga wala gitakda daan sa Diyos ang atong umaabot kondili gusto niya nga mopili kita pinasukad sa kahibalo nga iyang gitagana.​—Isaias 48:17, 18.

Sa pagkamatuod ang Diyos nag-ingon kanato pinaagi sa Bibliya: ‘Kini ang akong katuyoan alang sa tawo ug sa yuta, ug kini ang kinahanglan ninyong himoon aron makabaton kamog kinabuhing walay kataposan. Anaa ra kaninyo kon kamo mamati ba kanako o dili.’ Hingpit gayod nga pagkatimbang ang katakos sa Diyos sa pagtakda daan ug ang iyang pagtahod sa atong kagawasan sa pagpili! Mopili ka ba sa kinabuhi “pinaagi sa pagpamati sa . . . tingog [sa Diyos] ug sa pag-unong kaniya”?

NAKAPAMALANDONG KA BA?

◼ Diin kutob gigamit sa Diyos ang iyang katakos sa pagkahibalo daan?​—Deuteronomio 30:19, 20; Isaias 46:10.

◼ Nganong wala itakda daan sa Diyos ang tanang butang, lakip ang daotang mga butang nga mahitabo sa mga tawo?​—Deuteronomio 32:4.

◼ Unsa gayoy magtino sa atong umaabot?​—Juan 17:3.

[Blurb sa panid 13]

Ang Bibliya nagtudlo nga ang Diyos mapilion kon bahin sa pagtakda daan sa umaabot