“Giniyahan sa Espiritu sa Diyos” nga Distritong Kombensiyon sa mga Saksi ni Jehova

◼ LIBOLIBO niining tulo-ka-adlaw nga kombensiyon, nga nagsugod sa Amerika niadtong Mayo 23-25, gipahigayon na diha sa libolibo ka siyudad sa tibuok kalibotan. Niadtong 2007, kapig 12 milyones ang nanambong sa kapig 3,200 ka kombensiyon!

Dinhi sa Pilipinas karong tuiga, ang mga sesyon kasagarang magsugod sa alas 8:20 s.b. nga sugdan ug musika. Ang tema sa Biyernes, nga gipasukad sa Juan 16:13, maoy “Ang Espiritu . . . Magatultol Kaninyo Ngadto sa Tibuok nga Kamatuoran.” Pipila sa mga pakigpulong mao, “Nganong Magpagiya sa Espiritu sa Diyos?” ug “Ang Balaang Espiritu​—Gigamit sa Paglalang!” Ang simposyum nga “Mga Matinumanon sa Kakaraanan​—Giniyahan sa Espiritu sa Diyos” maglakip sa mga bahin nga “Sa Panahon ni Moises,” “Sa mga Adlaw sa mga Maghuhukom,” ug “Sa Unang Siglo.” Ang yawing pakigpulong, “Ang Papel sa Balaang Espiritu sa Pagtuman sa Katuyoan ni Jehova,” magtapos sa sesyon sa buntag.

Ang unang bahin sa Biyernes sa hapon maoy “Tubag sa mga Pangutana Bahin sa Balaang Espiritu,” nga sundan sa mga pakigpulong nga “Ginasusi sa Espiritu . . . ang Lawom nga mga Butang sa Diyos” ug “Mahimong mga Tigpaminaw ug Tigtuman sa Pulong sa Diyos.” Ang simposyum nga “Mga Batan-on​—Magpagiya sa Balaang Espiritu!” naglakip sa mga bahin nga “Diha sa Eskuylahan,” “Diha sa Trabahoan,” “Diha sa Pamilya,” “Diha sa Kongregasyon,” “Samtang Naglingawlingaw,” ug “Sa Dihang Nag-inusara.” Ang programa sa Biyernes taposon pinaagig usa ka linaing pakigpulong nga nag-ulohang “Mga Batan-on​—Ampingi ang Inyong Relasyon Kang Jehova!” Kining pakigpulonga makatabang kanila sa paghimo niana.

Ang tema sa Sabado maoy “Nagapugas Alang sa Espiritu,” nga gipasukad sa Galacia 6:8. Ang sesyon sa buntag maglakip sa tulo-ka-bahin nga simposyum nga nag-ulohang “Giniyahan sa Espiritu sa Diyos Diha sa Atong Ministeryo.” Ang sesyon sa buntag taposon pinaagig pakigpulong sa bawtismo, nga human niana bawtismohan ang mga kandidato.

Ang unang pakigpulong sa Sabado sa hapon nag-ulohan ug “Mga Magsusulat sa Bibliya​—‘Giagak sa Balaang Espiritu,’” nga sundan sa lima-ka-bahin nga simposyum nga “Gipalig-on sa Balaang Espiritu” “Sa Pagsukol sa Tentasyon,” “Sa Pagsagubang sa Kaluya ug Kahigawad,” “Sa Paglahutay Ilalom sa Paglutos,” “Sa Pagpakigbisog Batok sa Makadaot nga Impluwensiya,” ug “Sa Paglahutay sa Kalisdanan.” Ang programa sa Sabado taposon pinaagig usa pa ka linaing pakigpulong nga nag-ulohang “Magpabilin Kamo sa Gugma sa Diyos.”

Ang programa sa Dominggo sa buntag maghisgot sa tema nga “Magpadayon sa Paglakaw Pinaagi sa Espiritu,” nga gipasukad sa Galacia 5:16. Ang siyam-ka-bahin nga simposyum nga nag-ulohang “Ugmara ang ‘Bunga sa Espiritu’” maghisgot sa matag usa ka bahin sa bunga sa espiritu nga gihisgotan sa Galacia 5:22, 23. Ang sesyon sa buntag taposon pinaagi sa pakigpulong publiko nga “Tagamtama ang mga Panalangin Pinaagi sa Giniyahan sa Espiritu nga Hari ni Jehova!” Ang linaing bahin sa sesyon sa hapon mao ang drama nga “Ayawg Biyai ‘ang Gugma nga Imong Nabatonan sa Sinugdan.’” Ipasundayag niini ang mga tinamdan ug mga kahimtang nga lagmit nahitabo sa mga Kristohanon sa hinapos nga bahin sa unang siglo. Ang kombensiyon taposon pinaagig pakigpulong nga nag-ulohang “Maunongong Mag-alagad Uban sa Giniyahan-sa-Espiritu nga Organisasyon ni Jehova.”

Pagplano sa pagtambong. Aron makahibalo ka sa dapit nga kinadul-an kanimo, pangutana sa mga Saksi ni Jehova sa inyong lugar o pagsulat sa magpapatik niining magasina.