Paagi 2

Palamboa ang Gugma sa Pamilya

Nganong hinungdanon kini? Ang mga bata kinahanglang pakitaan ug gugma, kay kon dili, sila magmaluya. Niadtong katuigan sa 1950, si M. F. Ashley Montagu, usa ka siyentipiko nga nagtuon bahin sa tawo ug kultura, nagsulat: “Ang bata kinahanglang busgon gayod sa gugma; himsog ang bata kon siya pakitaan ug gugma, ilabina sa iyang unang unom ka tuig sa kinabuhi.” Ang mga tigpanukiduki karon miuyon usab kang Montagu nga “ang mga bata nga kulang ug gugma mahimong dako nga problema unya.”

Ang problema: Ang pagkinabuhi niining walay gugma, hakog nga kalibotan nakadaot sa relasyon sa pamilya. (2 Timoteo 3:1-5) Tingali nakita sa mga magtiayon nga ang pinansiyal ug emosyonal nga suliran may kalabotan sa pagmatuto ug anak nakapasamot sa giatubang na nila nga mga problema sa kaminyoon. Pananglitan, ang tensiyon sa magtiayon nga may problema nang daan sa komunikasyon mosamot kon dili sila magkasinabot kon unsaon pagdisiplina sa bata ug kon unsay ilang ipremyo kaniya sa iyang pagbinuotan.

Ang solusyon: Paggugol ug panahon nga magkauban ingong pamilya. Ang magtiayon kinahanglang mogahin usab ug panahon nga magkauban. (Amos 3:3) Pahimusli ang panahon dihang mangatulog na ang mga anak. Ayaw usiki kining bililhong panahon atubangan sa TV. Buhia ang inyong paghigugmaay sama niadtong managtrato pa kamo pinaagi sa pagpadayag kanunay sa inyong gugma sa usag usa. (Proverbio 25:11; Awit ni Solomon 4:7-10) Inay ‘magpangita kanunay ug sayop,’ pangitag mga paagi matag adlaw sa pagdayeg sa imong kapikas.​—Salmo 103:9, 10; Proverbio 31:28.

Isulti sa imong mga anak nga sila imong gihigugma. Si Jehova nga Diyos naghatag ug panig-ingnan sa mga ginikanan pinaagi sa pagpadayag sa iyang gugma ngadto sa iyang Anak, si Jesus. (Mateo 3:17; 17:5) Si Fleck, usa ka amahan nga nagpuyo sa Austria, miingon: “Akong nakita nga ang mga anak samag mga bulak. Kining gagmayng mga tanom moatubang sa adlaw aron makadawat ug kahayag ug kainit, sa samang paagi ang mga anak magpangita usab sa ilang mga ginikanan ug gugma ug pasalig nga sila minahal nga mga sakop sa pamilya.”

Minyo ka man o nag-inusara nga ginikanan, kon imong tabangan ang imong pamilya sa paghigugma sa usag usa ug sa Diyos, mahimong tawhay ang inyong pagkinabuhi ingong pamilya.

Apan, unsay giingon sa Pulong sa Diyos bahin sa paggamit sa awtoridad ingong ginikanan?

[Blurb sa panid 4]

“Ang gugma . . . maoy usa ka hingpit nga bugkos sa panaghiusa.”​—Colosas 3:14