Pagpaniid sa Kalibotan

◼ Sulod sa 15-ka-bulan nga yugto, 82 ka bag-ong natawo nga mga bata ang giabandonar diha sa kadalanan sa Mexico City, ang 27 kanila patay na sa dihang nakaplagan.​—EL UNIVERSAL, MEXICO.

◼ Ang mga pagtuon labot sa mga langob sa duha ka nasodnong parke sa California, U.S.A., misangpot sa pagkadiskobre ug 27 ka bag-ong mga espisye sa mananap. “Nagpamatuod lamang kini kon unsa ka gamay ang atong nahibaloan bahin sa kalibotan sa atong palibot,” nag-ingon si Joel Despain, usa ka espesyalista sa mga langob sa National Park Service.—SMITHSONIAN, U.S.A.

◼ Bayente porsiyento sa populasyon sa kalibotan walay mainom nga limpiyong tubig. Kuwarenta porsiyento ang walay paninugdang mga sistema sa sanitasyon.—MILENIO, MEXICO.

◼ Ang mga mangingilot nakapatay ug tali sa 20,000 ug 30,000 ka mananap kada tuig sa Serengeti National Park lamang.​—THE DAILY NEWS, TANZANIA.

◼ Ang mga pagtuon nga gihimo sa Barcelona, Espanya, nagpadayag nga 1 sa matag 3 ka estudyante nga nag-edad ug 16 anyos ang regular nga nagyupyop ug marijuana.​—LA VANGUARDIA, ESPANYA.

Mga Kagaw Diha sa Opisina

Gisukod sa mga mikrobiologo sa Unibersidad sa Arizona ang gidaghanon sa bakterya diha sa mga opisina sa daghang siyudad sa U.S. Ilang nakaplagan nga “ang lima ka dapit nga kinadaghanag kagaw mao ang (sugod sa kinadaghanan) mga telepono, ibabaw sa lamesa, pislitanan sa water fountain, ablihanan sa microwave ug mga keyboard,” nag-ingon ang mantalaang Globe and Mail. Sumala sa taho, “ang kasagarang lamesa sa opisina maoy 100 ka pilo nga mas daghag bakterya kay sa lamesa sa kosina ug 400 ka pilo nga mas daghag bakterya kay sa kasagarang inodoro.”

“Kristiyano sa Pulong Lamang”

Ang Pilipinas gitawag nga bugtong Kristiyano nga nasod sa Asia. Apan, si Obispo Efraim Tendero sa Konsilyo sa Pilipinas sa Ebanghelikal nga mga Iglesya nag-ingon: “Kadaghanan kanato mga Kristiyano sa pulong lamang apan dili sa buhat.” Sumala sa giingon sa Manila Bulletin, sa bahin tungod kini sa mga pangulo sa simbahan, kinsa napakyas sa “pagtabang sa mga tawo sa pagkahibalo ug pagpabili sa kon unsay gitudlo sa Bibliya.” Ang ubang mga wali sa simbahan giingon nga nagpasiugda sa politika inay sa Kasulatan.

Mga Tawo ug mga Mananap Nakigbisog Aron Makakaon

“Ang mga taho bahin sa mga amo ug mga hyena nga miatake sa mga komunidad diha sa gihampak-sa-hulaw nga Somalia nag-anam ka komon,” nag-ingon ang mantalaan sa Nairobi nga The East African. Ang usa ka bugnoay tungod sa tubig miresulta sa kamatayon sa ubay-ubayng mga amo ug pagkasamdan sa pipila ka tigbuhig hayop. Ang panon sa mga unggoy giingon nga mangatang diha sa “mga kinasang-an sa dalan o diha sa mga taytayan” ug manglayat ngadto sa mga trak nga naghatod ug mga abot ngadto sa lokal nga mga merkado. “Kasagaran makakita ka ug mga mananap nga mangawat ug mga sipi sa saging o [dagkong] mga pakwan,” midugang ang mantalaan.

Ang mga Barko Nakaapektar sa Klima sa Kabaybayonan

Ang pag-agi sa daghang barko diha sa puliki nga hikting mga agianan sa kadagatan makaapektar sa klima diha sa kabaybayonan, nagtaho ang mantalaan sa Alemanya nga Kölner Stadt-Anzeiger. Ang mga tigpanukiduki sa Max Planck Institute for Meteorology, Hamburg, nag-analisar sa panganod ibabaw sa English Channel. Ilang nakaplagan nga ang mga panganod ibabaw sa kabaybayonan nagkanipis, samtang kadtong anaa sa ibabaw sa hikting mga agianan sa dagat mas baga. Ang hinungdan niining talagsaong kahimtang mao ang mga binuga sa mga panghaw sa barko. Ang mga partikulo sa anuos nga gibuga sa mga barko gituohan nga nagsilbing uyok sa nanibug-ok nga alisngaw, nga makapadaghan sa mga tinulo sa tubig. “Sa milabayng 50 ka tuig,” matod pa sa mantalaan, “kapin sa upat ka pilo ang pag-uswag sa gidaghanon sa sugnod nga nagamit sa mga barko.”