Pagpaniid sa Kalibotan

“Matag tuig duolan sa unom ka milyong bata—usa matag lima ka segundo—mamatay tungod kay sila walay igong makaon.”—JAMES T. MORRIS, EHEKUTIBONG DIREKTOR SA WORLD FOOD PROGRAMME

◼ Ang opisyal nga gidaghanon sa nangamatay sa Bagyong Katrina, nga mihapak sa habagatang bahin sa Tinipong Bansa sa Agosto 2005, maoy kapin sa 1,300.—THE WASHINGTON POST, U.S.A.

◼ Kapin sa 74,000 ang nangamatay tungod sa linog nga mitay-og sa amihanang Pakistan ug India sa Oktubre 2005.—BBC NEWS, BRITANYA.

◼ Sumala sa usa ka taho “halos 1.2 milyones ka tawo ang mangamatay sa mga aksidente sa trapiko sa tibuok kalibotan kada tuig.”—SOUTH AFRICAN MEDICAL JOURNAL, HABAGATANG APRIKA.

Makahasol nga mga Bahandi

Ang mga awtoridad sa Iglesya Romana Katolika naglibog kon unsaon pagpanalipod sa karaan na kaayong mga bahandi sa arte nga nag-adorno sa mga simbahan sa Peru. Sa milabayng unom ka tuig, 200 ka simbahan ang gilungkab sa mga kawatan. Sa miaging 15 ka tuig, sa Cuzco pa lang mga 5,000 ka buhat sa arte, nga kadaghanan mahalong mga oil painting, ang gikawat. Wala gayoy nasayod kon pila na ang nakawat sa tibuok nasod. Aron masanta ang mga kawatan, gitago sa ubang mga simbahan ang ilang mga buhat sa arte, apan diha sa dili maayong mga kahimtang. Usa ka parokya dunay koleksiyon sa mga oil painting nga ang uban niini gikutkot sa mga ilaga.

Pinlandia Kulang ug Hanas nga mga Trabahante

Ang mga kompaniya nga nagtaganag serbisyo ug ang mga industriya sa Pinlandia kulang kaayo ug hanas nga mga trabahanteng nakatapos ug bokasyonal nga kurso, sama sa mga panday, tubero, tig-welding, kantero, mekaniko, makinista, ug mga nars. Ngano? Kay ang gihatagag importansiya mao ang pagkab-ot ug taas nga edukasyon, matod sa mantalaang Helsingin Sanomat. “Dili makataronganon nga ang tanang tawo sa usa ka henerasyon pulos na lang doktor ug may degree sa arte ug siyensiya,” miingon si Heikki Ropponen sa Federation of Finnish Retailers. “Kinahanglang mas pabilhan ang bokasyonal nga pagbansay.”

Paborableng Desisyon sa Korte sa Pransiya

Sa Disyembre 1, 2005, ang Korte sa Apelasyon sa Paris nagmando sa tigdumala sa nasodnong kalihokan sa Pransiya nga ipakita ngadto sa mga Saksi ni Jehova ang mga dokumento sa kapolisan nga gigamit ingong pruyba kon nganong sila giapil sa listahan sa mga “kulto” sa 1996. Ang maong listahan gihimo panahon sa pribadong mga bista, ug ang kaundan sa mga dokumento wala ipahibalo aron kuno mapanalipdan ang ‘seguridad sa Estado ug publiko.’ Apan, nakita sa korte nga ang “gitimbangtimbang nga mga epekto” sa kalihokan sa mga Saksi sumala sa giingon niining mga dokumentoha, “walay gibug-aton.” Bisan pa niana, kini nga listahan subsob nga gigamit aron ipakamatarong ang mapihigong pagtratar sa mga Saksi ni Jehova sa Pransiya.

Ang “Berde nga Great Wall”

Dunay dagkong mga luna sa Tsina nga umaw na kaayo tungod sa sobrang pagpasibsib, hulaw, pagpamuril, ug sobrang pagpahimulos sa suplay sa tubig. Busa, gisugdan sa mga awtoridad sa Tsina “ang kinadak-ang ekolohikal nga proyekto nga nakita sa kalibotan sukad,” matod sa New Scientist. “Pinaagi niining programaha, nga nailhan ingong ang ‘berde nga great wall,’ daghan kaayong kahoy ang gipananom aron masanta ang pagkaylap sa abog.” Nananom usab ug mga sagbot ug kahoy-kahoy aron dili makankan ang abogong yuta. Kini nga proyekto gisugdan sa 1978 ug katunga sa 35 milyones ka ektaryang yuta ang natamnan na ug mga kahoyng mabuhi bisag wala kaayoy tubig.