Ang Hunahuna sa Bibliya

Praktikal Bang Magmakigdaiton?

DIHA sa iyang gibantog nga wali, si Jesu-Kristo miingon: “Malipayon ang mga makigdaiton.” Siya miingon usab: “Malipayon ang mga malumog-buot, sanglit sila magapanunod sa yuta.” (Mateo 5:5, 9) Ang pagkamakigdaiton naglangkit ug labaw pa kay sa pagkamalinawon o sa pagkakalmado. Ang tawong makigdaiton mouna sa pagpakighigala ug aktibo sa pagpalambo sa pakigdait.

Ang gikutlo sa ibabaw nga mga pulong ni Jesus praktikal ba sa atong panahon? Ang uban nagtuo nga aron magmalamposon niining modernong kalibotan, ang tawo kinahanglang makapataha, agresibo, ug mabangis pa gani. Maalamon bang tumpangan ang kasuko ug kasuko. O praktikal bang magmakigdaiton? Atong hisgotan ang tulo ka rason kon nganong kinahanglan nga atong palandongon ang mga pulong ni Jesus: “Malipayon ang mga makigdaiton.”

◼ KALMADONG KASINGKASING “Ang kalmado nga kasingkasing mao ang kinabuhi sa unod,” matod pa sa Proverbio 14:30. Daghang medikal nga report nagpakita nga ang kasuko ug pagkapungtanon makapahinabog estrok ug atake sa kasingkasing. Dili pa dugay, ang usa ka medikal nga basahon, sa dihang nagkomento bahin sa mga tawong dunay sakit sa kasingkasing, nagtandi sa pagsilaob sa kasuko ngadto sa hilo. Ang basahon miingon usab nga ang “grabeng kasuko makahatag ug sakit sa usa ka tawo.” Apan, ang mga tawong makigdaiton, makabaton ug “kalmado nga kasingkasing” ug makaanig kaayohan.

Usa ka pananglitan niini mao si Jim, nga usa ka 61-anyos nga karon magtutudlo na ug Bibliya sa usa ka komunidad sa mga Vietnamese sa Tinipong Bansa. Siya miingon: “Human sa unom ka tuig sa pagserbisyo sa militar ug tulo ka tuig sa panggubatan sa Vietnam, ako mismo nakaagi kon unsay kapintasan, kasuko, ug kaguol. Ako gihasol sa akong nangagi, nga tungod niini dili kaayo ako makatulog. Wala magdugay ang tensiyon maingon man ang sakit-sakit sa tiyan ug kaugatan nakaapektar sa akong panglawas.” Unsay nakahatag kaniya ug kahupayan? Siya mitubag: “Ang pagtuon sa Bibliya uban sa mga Saksi ni Jehova nakaluwas sa akong kinabuhi. Ang pagkahibalo bahin sa katuyoan sa Diyos alang sa usa ka malinawong bag-ong kalibotan ug pagtuon sa pagsul-ob sa “bag-ong pagkatawo” nakahatag kanako ug kalmadong kasingkasing. Tungod niini, miuswag pag-ayo ang kondisyon sa akong panglawas.” (Efeso 4:22-24; Isaias 65:17; Miqueas 4:1-4) Daghan pang uban ang nakahinapos sumala sa ilang naagian mismo nga ang pag-ugmad ug makigdaitong espiritu makapauswag sa emosyonal, pisikal, ug espirituwal nga kahimsog.—Proverbio 15:13.

◼ MAS MALIPAYONG MGA RELASYON Ang atong relasyon sa uban mas malipayon kon kita magpasundayag  ug makigdaitong espiritu. Ang Bibliya nag-ingon nga kinahanglang ‘isalikway ang kasuko ug kapungot ug sininggitay ug mapasipalahong sinultihan uban sa tanang pagkadaotan.’ (Efeso 4:31) Ang mga tawong agresibo kasagarang likayan sa uban ug tungod niini sila mag-inusara, nga walay mga higala nga kadangpan. Ang Proverbio 15:18 nag-ingon: “Ang usa ka masuk-anong tawo nagasugnib sa panaglalis, apan siya nga mahinay sa kasuko nagapalinaw sa panag-away.”

Si Andy, usa ka 42-anyos nga Kristohanong ansiyano sa New York City, nagdako uban sa mga tawo nga kanunayng init ug dugo. Siya miingon: “Ila akong gibutang sa boxing ring ug gibansay sa pagsinuntokay sa otso anyos pa lang ako. Dili tawo ang akong paglantaw sa kontra. Hinunoa, ako naghunahuna nga kon dili ako manuntok, ako ang masuntokan. Wala madugay nakig-anib ako sa usa ka gang. Kami nakaagi ug daghang lamok-lamok ug karambola. Makadaghan nang nationan ug pusil ang akong ulo ug daghang higayong gihanaan ug dunggab. Ang among panaghigalaay magubot ug nakighigala lang ako tungod sa kahadlok.”

Unsay nakatukmod kang Andy sa pagkahimong makigdaiton? Siya miingon: “Usa ka adlaw niana mitambong ako ug panagtigom diha sa Kingdom Hall sa mga Saksi ni Jehova, ug ako dayong namatikdan nga mahigugmaon ang mga tawo didto. Sukad niadto, ang akong pagpakig-uban niining makigdaitong mga tawo nakatabang kanako sa pag-ugmad ug usa ka kalmadong kasingkasing, ug kini sa ngadto-ngadto nakawala sa akong daang paagi sa paghunahuna. Ako nakakita ug daghang tinuod nga mga higala.”

◼ PAGLAOM ALANG SA UMAABOT Ang labing importanteng rason nga kita angay nga magmakigdaiton mao gayod kini: Kini nagpadayag nga kita nagpasidungog ug nagtahod sa kabubut-on sa atong Maglalalang nga iyang gipadayag kanato. Ang Pulong sa Diyos, ang Bibliya, nag-awhag kanato: “Pangitaa ang pakigdait, ug sunda kini.” (Salmo 34:14) Ang pagtuo nga naglungtad si Jehova nga Diyos ug dayon ang pagkat-on ug pagtuman sa iyang makahatag-ug-kinabuhi nga mga pagtulon-an magpaarang kanato nga mahimong iyang higala. Tungod niining malig-on nga relasyon, atong mabatonan ang “kalinaw sa Diyos.” Kini maoy usa ka hamili nga kalinaw bisag unsay pay mga kakulian sa kinabuhi.—Filipos 4:6, 7.

Dugang pa, pinaagi sa pagkamakigdaiton, kita nagpakita kang Jehova nga kita gustong mahimong ingon niana nga tawo. Kita makapamatuod sa Diyos karon nga kita mosunod sa mga kahikayan diha sa iyang gisaad nga malinawong bag-ong kalibotan. Sa dihang iya nang laglagon ang mga daotan ug magpaposible, sama sa giingon ni Jesus, sa mga malumog-buot sa ‘pagpanunod sa yuta,’ kita makadangat didto sa pagtagamtam niana. Pagkadako nga panalangin!—Salmo 37:10, 11; Proverbio 2:20-22.

Oo, ang praktikal nga bili sa mga pulong ni Jesus nga “malipayon ang makigdaiton” dayag nga makita. Kita makabaton ug kalmadong kasingkasing, makahuloganong mga relasyon, ug malig-ong paglaom sa umaabot. Kining mga panalangina atong maangkon kon atong himoon ang kutob sa atong maarangan nga ‘magmakigdaiton sa tanang tawo.’—Roma 12:18.

[Mga hulagway sa panid 28]

“Miuswag pag-ayo ang kondisyon sa akong panglawas.”—Jim

[Mga hulagway sa panid 29]

“Ako nakakita ug daghang tinuod nga mga higala.”—Andy