Pagkalipay Diha sa Paglaom

HIMALATYON na si Joe tungod sa iyang kanser. Diha sa iyang tupad ang iyang asawang si Kirsten ug ang pipila ka higala nga nag-estoryahanay. Si Kirsten mitan-aw sa iyang bana ug iyang nakita nga si Joe naghilak. Sa sinugdan, abi niyag gisakitan lang si Joe. Gisakitan tingali si Joe, apan niadtong higayona, gisultihan niya ang iyang asawa nga siya mihilak dili tungod sa kasakit.

“Sa maong malisod nga kahimtang,” matod ni Kirsten, “si Joe gialirongan sa iyang suod nga mga higala nga miduaw kaniya. Siya aduna usay bililhong paglaom diin siya mas masaligon niadtong tungora nga iya kining maangkon kay sa bisan unsang panahon sa iyang kinabuhi, ug siya nahibalo nga walay makaagaw niini gikan kaniya. Gani, siya miingon nga ang iyang mga luha maoy mga luha sa kalipay. Nianang gabhiona, si Joe namatay.”

Unsa ang paglaom nga nakapalig-on kang Joe samtang nagkagrabe ang iyang sakit? Ang saad ni Jehova nga Diyos nga kinabuhing walay kataposan uban ang hingpit nga panglawas sa usa ka paraisong yuta. (Salmo 37:10, 11, 29) Ang Pinadayag 21:3, 4 nag-ingon: “Ang tolda sa Diyos anaa uban sa mga tawo . . . Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang [lakip na ang daghang problema karon] nangagi na.”

Paglaom Bisan Alang sa mga Patay

Alang kang Joe, ang katumanan sa iyang paglaom nagkahulogan nga siya pagabanhawon. Sa pagkatinuod, siya nahupayan sa saad ni Jesus nga “ang tanan nga anaa sa handomanang lubnganan”—ang mga patay nga anaa sa panumdoman sa Diyos—pagabanhawon. (Juan 5:28, 29) Naguol ka ba tungod kay namatyan ka ug membro sa pamilya o higala? Kon mao, ang paglaom sa pagkabanhaw makapadasig kanimo. Tinuod, kini nga paglaom dili makahanaw sa atong pagbangotan sa dihang mamatay ang usa ka minahal. Si Jesus mismo “mihilak” sa pagkamatay sa iyang higalang si Lazaro. Apan ang atong paglaom makapahupay gayod sa atong kaguol.—Juan 11:14, 34, 35; 1 Tesalonica 4:13.

“Sa dihang namatay si Joe tungod sa kanser, abi nakog dili na ako magmalipayon pag-usab,” matod  ni Kirsten. Bisan karon, nga pipila ka tuig na ang milabay, akong nasabtan nga ang akong kinabuhi niining sistemaha dili na gayod sama kaniadto. Dili gayod mahulipan ang kahaw-ang nga gibilin ni Joe. Bisan pa niana, ako matinud-anong makaingon nga akong nabatonan pag-usab ang kalinaw sa hunahuna ug katagbawan.”

Ang mga komento ni Kirsten nagpahinumdom kanato nga niining sistemaha, kita dili magmalipayon sa bug-os sa tanang higayon. May mga kalipay ug kasakit ang kinabuhi. Ug may mga higayon nga kita angayng maguol, sa dihang ang pagmaya dili gayod angay. (Ecclesiastes 3:1, 4; 7:2-4) Ang pipila kanato nakigbisog usab sa depresyon, tungod sa lainlaing hinungdan. Bisan pa niana, ang mga saad sa Bibliya maoy tuboran sa dakong kahupayan, ug ang dili-hitupngan nga kaalam nga makaplagan nato sa Bibliya makatabang kanato sa paglikay sa daghang nagpahipi nga mga kalisdanan nga makapaguol. “Kon bahin sa nagapatalinghog kanako,” ang Diyos nag-ingon, “siya magapuyo sa kasegurohan ug dili matugaw sa kalisang sa katalagman.”—Proverbio 1:33.

Oo, si Jehova interesado gayod sa atong kaayohan. Buot niya nga kita magmalipayon—dili lamang taphaw kondili dulot gayod, ug dili lamang sa pipila ka tuig kondili hangtod sa kahangtoran! Busa, ang iyang Anak misulti niining mga pulonga nga mapadapat gayod sa tanang panahon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Maalamon kita kon atong buhaton ang iyang giingon.

[Kahon/Hulagway sa panid 9]

Siyam ka Kinahanglanon Aron Magmalipayon

1. Pag-ugmad ug espirituwal nga panglantaw sa kinabuhi.—Mateo 5:3.

2. Pagkakontento ug paglikay sa “gugma sa salapi.”—1 Timoteo 6:6-10.

3. Pagbutang sa paglingawlingaw sa hustong lugar.—2 Timoteo 3:1, 4.

4. Pagkamahinatagon ug paghimog mga butang nga makapalipay sa uban. —Buhat 20:35.

5. Pagkamapasalamaton ug paghunahuna sa mga panalangin nga imong nabatonan.—Colosas 3:15.

6. Pagbaton ug mapinasayloong tinamdan.—Mateo 6:14.

7. Maalamong pagpili sa imong mga pakig-ubanan.—Proverbio 13:20.

8. Pag-amping sa imong panglawas, ug paglikay sa makadaot nga mga bisyo. —2 Corinto 7:1.

9. ‘Pagmaya diha sa paglaom’ nga gipadayag sa Bibliya alang kanimo.—Roma 12:12.

[Mga hulagway sa panid 8, 9]

Ang pinasukad-sa-Bibliya nga paglaom sa kinabuhi sa usa ka bag-ong kalibotan maoy usa ka tuboran sa dakong kahupayan